ઇઝરાયલે ગાઝામાં ફરી હુમલા શરૂ કર્યા છે. ઇઝરાયલ સંરક્ષણ દળોના જણાવ્યા અનુસાર વાયુસેનાએ ગાઝામાં હમાસના ઠેકાણાઓ પર હવાઈ હુમલો કર્યો છે. અલ જઝીરાના મતે આ હુમલાઓમાં અત્યાર સુધીમાં 326 લોકોના મોત થયા છે. સેંકડો ઘાયલ થયા છે. 19 જાન્યુઆરીએ ઇઝરાયલ-હમાસ યુદ્ધવિરામ શરૂ થયા પછી ગાઝામાં ઇઝરાયલનો આ સૌથી મોટો હુમલો છે. ઇઝરાયલી સૈન્યનું કહેવું છે કે તેઓ હુમલાની યોજના બનાવી રહેલા આતંકવાદીઓને નિશાન બનાવી રહ્યા હતા.
ઇઝરાયલે છેલ્લા બે અઠવાડિયાથી ગાઝામાં ખોરાક, દવા, બળતણ અને અન્ય પુરવઠાના પ્રવાહને અવરોધિત કર્યો છે અને હમાસને યુદ્ધવિરામ કરારમાં ફેરફારો સ્વીકારવાની માંગ કરી છે. ઇઝરાયલી સંરક્ષણ મંત્રીએ કહ્યું કે અમે ગાઝામાં નર્કના દરવાજા ખોલીશું. ઇઝરાયલી વડા પ્રધાન બેન્જામિન નેતન્યાહૂએ કહ્યું કે તેમણે હુમલાઓનો આદેશ આપ્યો કારણ કે યુદ્ધવિરામ વાટાઘાટો આગળ વધી રહી ન હતી. નેતન્યાહૂએ ઘણી વખત ફરીથી યુદ્ધ શરૂ કરવાની ધમકી આપી છે. ઇઝરાયલના સંરક્ષણ પ્રધાન ઇઝરાયલ કાત્ઝે ચેતવણી આપી છે કે જો બંધકોને મુક્ત કરવામાં નહીં આવે તો ગાઝામાં નર્કના દરવાજા ખોલવામાં આવશે.
હમાસે ઇઝરાયલી હવાઈ હુમલાઓને યુદ્ધવિરામનું ઉલ્લંઘન ગણાવ્યું છે. હમાસે ધમકી આપી છે કે આ પગલાથી તેની કસ્ટડીમાં રહેલા ઇઝરાયલી બંધકોના જીવ જોખમમાં મુકાશે. હમાસે કહ્યું કે ઇઝરાયલે કોઈપણ ઉશ્કેરણી વિના હુમલાઓ કર્યા હતા.
જણાવી દઈએ કે યુદ્ધવિરામનો પહેલો તબક્કો 1 માર્ચના રોજ સમાપ્ત થયો. પ્રથમ તબક્કામાં હમાસે 8 મૃતદેહો સહિત 33 બંધકોને મુક્ત કર્યા છે. દરમિયાન ઇઝરાયલે 2,000 થી વધુ પેલેસ્ટિનિયન કેદીઓને મુક્ત કર્યા છે. ઇઝરાયલ અને હમાસ વચ્ચે યુદ્ધવિરામના બીજા તબક્કાની વાતચીત હજુ શરૂ થઈ નથી. આ તબક્કામાં લગભગ 60 બંધકોને મુક્ત કરવાના હતા. ઉપરાંત યુદ્ધને સંપૂર્ણપણે સમાપ્ત કરવા પર ચર્ચા થવાની હતી. હમાસ પાસે હાલમાં 24 જીવંત બંધકો અને 35 મૃતદેહો છે.
યુદ્ધવિરામ કરાર ત્રણ તબક્કામાં પૂર્ણ થવાનો હતો
ઇઝરાયલ અને પેલેસ્ટાઇન વચ્ચેનો યુદ્ધવિરામ કરાર ત્રણ તબક્કામાં પૂર્ણ થવાનો હતો. આ સમયગાળા દરમિયાન બંને પક્ષો વચ્ચે કેદીઓના વિનિમય અંગે એક કરાર થયો હતો. પહેલો તબક્કો પૂર્ણ થઈ ગયો છે. બીજા તબક્કામાં આ મામલો ઉકેલાઈ શક્યો નહીં. પ્રથમ તબક્કામાં 19 જાન્યુઆરીથી 1 માર્ચ સુધી ગાઝામાં સંપૂર્ણ યુદ્ધવિરામ હતો. હમાસે 33 ઇઝરાયલી બંધકોને મુક્ત કર્યા. ઇઝરાયલ દરરોજ પોતાના એક બંધકના બદલામાં 33 પેલેસ્ટિનિયન કેદીઓને મુક્ત કરશે. દરેક ઇઝરાયલી મહિલા સૈનિક માટે 50 પેલેસ્ટિનિયન કેદીઓને મુક્ત કરવામાં આવશે.
બીજા તબક્કામાં એવું કહેવામાં આવ્યું હતું કે જો પહેલા તબક્કાના 16મા દિવસ સુધી એટલે કે 3 ફેબ્રુઆરી સુધી બધું બરાબર રહ્યું, તો બીજા તબક્કાની યોજના પર ચર્ચા શરૂ થશે. આ સમય દરમિયાન કોઈ હુમલો થશે નહીં. બાકીના જે બંધકો જીવિત છે તેમને મુક્ત કરવામાં આવશે. જોકે હજુ સુધી વાટાઘાટો શરૂ થઈ નથી. ઇઝરાયલ 1,000 પેલેસ્ટિનિયન કેદીઓને મુક્ત કરશે જેમાંથી લગભગ 190 કેદીઓને 15 વર્ષથી વધુ સમયથી સજા ફટકારવામાં આવી છે.
ત્રીજા તબક્કા આ સોદાના છેલ્લા તબક્કામાં ગાઝાનું પુનર્વસન કરવામાં આવશે. આમાં 3 થી 5 વર્ષ લાગશે. હમાસની કેદમાં માર્યા ગયેલા બંધકોના મૃતદેહો પણ ઇઝરાયલને સોંપવામાં આવશે.
