ઇઝરાયલી સેનાએ ગાઝા પર જોરદાર હવાઈ હુમલો કર્યો. આ હુમલામાં ઓછામાં ઓછા 34 પેલેસ્ટિનિયનોના મોત થયાના અહેવાલ છે. અલ જઝીરાના અહેવાલ મુજબ, ઇઝરાયલી સેના દ્વારા કરવામાં આવેલો આ ખૂબ જ ઘાતક હુમલો હતો. સ્થાનિક હોસ્પિટલ દ્વારા મૃત્યુની પુષ્ટિ કરવામાં આવી છે.
ઇઝરાયલી દળોએ બંધકનો મૃતદેહ મેળવ્યો
ઇઝરાયલી સેનાએ હુમલા દરમિયાન ગાઝામાંથી એક થાઈ બંધકનો મૃતદેહ શોધી કાઢ્યો છે. IDF એ જણાવ્યું હતું કે 7 ઓક્ટોબર 2023 ના રોજ હમાસના આતંકવાદીઓ દ્વારા તેનું અપહરણ કરવામાં આવ્યું હતું. આ સમય દરમિયાન હમાસના આતંકવાદીઓએ ઇઝરાયલમાં 1200 લોકોની હત્યા કરી હતી. એટલું જ નહીં, હમાસે 238 ઇઝરાયલી નાગરિકો અને કેટલાક વિદેશીઓનું અપહરણ કર્યું હતું. આના જવાબમાં, ઇઝરાયલી સેના ગાઝા પર સતત હુમલા કરી રહી છે.
યુદ્ધવિરામ ભંગ બાદ ઇઝરાયલી સેનાએ ફરી હુમલો કર્યો
19 જાન્યુઆરી 2025 ના રોજ કતારની મધ્યસ્થી હેઠળ ગાઝા અને હમાસ વચ્ચે યુદ્ધવિરામ પર હસ્તાક્ષર થયા હતા. પરંતુ આ પછી, હમાસે કેટલાક બંધકોને મુક્ત કરવા માટે પોતાની શરતો મૂકી અને પોતાની માંગણીઓ પૂર્ણ ન થાય ત્યાં સુધી બંધકોને મુક્ત કર્યા નહીં. આ કારણે ઇઝરાયલી સેનાએ ફરીથી ગાઝામાં ભૂમિ કાર્યવાહી શરૂ કરી. હવે ઇઝરાયલી સેનાએ ગાઝાના ઘણા ભાગો પર સંપૂર્ણ નિયંત્રણ મેળવી લીધું છે.
હમાસ દ્વારા અપહરણ કરાયેલ થાઈ નાગરિક કોણ હતો?
ઇઝરાયલના વડા પ્રધાન કાર્યાલયે શનિવારે જણાવ્યું હતું કે થાઇ નાગરિક નટ્ટાપોંગ પિન્ટાનો મૃતદેહ એક ખાસ લશ્કરી કાર્યવાહીમાં પરત કરવામાં આવ્યો હતો. સરકારે જણાવ્યું હતું કે પિન્ટાનું કિબુત્ઝ નીર ઓઝથી અપહરણ કરવામાં આવ્યું હતું અને યુદ્ધની શરૂઆતમાં કેદમાં મારી નાખવામાં આવ્યું હતું. ગાઝામાં હજુ પણ 55 બંધકો બાકી છે, જેમાંથી અડધાથી વધુ લોકો મૃત્યુ પામ્યા હોવાનું ઇઝરાયલ કહે છે. સંરક્ષણ પ્રધાને શનિવારે જણાવ્યું હતું કે પિન્ટાનો મૃતદેહ રફાહ વિસ્તારમાંથી મળી આવ્યો હતો. તે કૃષિ કાર્ય માટે થાઇલેન્ડથી ઇઝરાયલ આવ્યો હતો.
