ઈરાનના સૌથી વરિષ્ઠ શિયા ધાર્મિક નેતા ગ્રાન્ડ આયાતુલ્લાહ નાસિર મકારિમ શિરાઝીએ યુએસ રાષ્ટ્રપતિ ડોનાલ્ડ ટ્રમ્પ અને ઇઝરાયલી વડા પ્રધાન બેન્જામિન નેતન્યાહૂ વિરુદ્ધ ધાર્મિક ફતવો બહાર પાડ્યો છે. તેમણે આ બંને નેતાઓને અલ્લાહના દુશ્મન ગણાવ્યા છે. તેમણે વિશ્વભરના મુસ્લિમોને એક થવા અને ઈરાન પર હુમલો કરવા બદલ આ નેતાઓને પસ્તાવો કરવા દબાણ કરવા પણ કહ્યું છે.
મકારિમ શિરાઝીએ તેમના ફતવામાં કહ્યું કે જે કોઈ ઈરાનના સર્વોચ્ચ નેતા અથવા કોઈપણ મરજાને નુકસાન પહોંચાડવાનો અથવા ધમકી આપવાનો પ્રયાસ કરશે તે મોહરિબ એટલે કે યુદ્ધપ્રેમી ગુનેગાર હશે. ફતવો ઇસ્લામિક કાયદાનું અર્થઘટન છે. તે મરજા દ્વારા જારી કરવામાં આવે છે. મરજા બારાહ ઇમામીને શિયા મુસ્લિમોનું સર્વોચ્ચ ધાર્મિક પદ કહેવામાં આવે છે.
અરાધચીએ કહ્યું – જો ટ્રમ્પ સમાધાન ઇચ્છે છે તો પહેલા પોતાની ભાષા બદલે
ઈરાનના વિદેશ પ્રધાન અબ્બાસ અરાઘચીએ અમેરિકી રાષ્ટ્રપતિ ડોનાલ્ડ ટ્રમ્પને ચેતવણી આપી છે કે તેઓ ઈરાનના સુપ્રીમ લીડર આયાતુલ્લાહ ખામેનીની વિરુદ્ધ અપશબ્દોનો ઉપયોગ બંધ કરે. અરાઘચીએ સોશિયલ મીડિયા પર લખ્યું છે કે ટ્રમ્પનું વલણ માત્ર ખામેનીને જ નહીં પરંતુ તેમના લાખો સમર્થકોનું પણ અપમાન કરે છે. જો ટ્રમ્પ ઈરાન સાથે સમાધાન ઇચ્છે છે તો તેમણે પોતાની ભાષા બદલવી પડશે. અરાઘચીનું આ નિવેદન ટ્રમ્પના તે દાવા પછી આવ્યું છે જેમાં અમેરિકી રાષ્ટ્રપતિએ કહ્યું હતું કે તેમણે ખામેનીને મરતા બચાવ્યા, નહીં તો તેઓ ખૂબ જ ખરાબ મૃત્યુ પામ્યા હોત.
ઈરાન પાસે અણુ બોમ્બ બનાવવા માટે યુરેનિયમ છે
યુએનની આંતરરાષ્ટ્રીય પરમાણુ ઉર્જા એજન્સી (IAEA) એ રવિવારે કહ્યું કે ઈરાન થોડા મહિનામાં તેનો પરમાણુ કાર્યક્રમ ફરી શરૂ કરી શકે છે. જ્યારે અમેરિકાએ બી-2 બોમ્બરથી હુમલો કરીને ઈરાનના ફોર્ડો, નાતાન્ઝ અને ઇસ્ફહાન પરમાણુ સ્થળોનો નાશ કરવાનો દાવો કર્યો હતો.
IAEA ના ડિરેક્ટર રાફેલ ગ્રોસીએ એક ન્યૂઝ ચેનલને આપેલા ઇન્ટરવ્યુમાં જણાવ્યું હતું કે ઈરાનની કેટલીક પરમાણુ સુવિધાઓ હજુ પણ અકબંધ છે. તેમણે કહ્યું – ઈરાન પાસે 60% શુદ્ધ યુરેનિયમનો સ્ટોક છે, જે પરમાણુ બોમ્બ બનાવવા માટે પૂરતો છે. હજુ સુધી સ્પષ્ટ નથી કે આ સ્ટોક અમેરિકાના હુમલા પહેલા દૂર કરવામાં આવ્યો હતો કે તેનો નાશ કરવામાં આવ્યો હતો.
બીજી તરફ ઈરાને ઈઝરાયલ સાથે યુદ્ધવિરામ પર શંકા વ્યક્ત કરી છે. ઈરાનના ચીફ ઓફ સ્ટાફ અબ્દુલરહીમ મૌસાવીએ રવિવારે સાઉદી સંરક્ષણ પ્રધાન પ્રિન્સ ખાલિદ બિન સલમાન સાથે ફોન પર વાતચીતમાં કહ્યું- અમને દુશ્મન (ઈઝરાયલ) સાથે યુદ્ધવિરામ પર શંકા છે. જો ફરીથી કોઈ હુમલો થશે તો અમે યોગ્ય જવાબ આપીશું.
મૌસાવીએ કહ્યું કે જ્યારે ઈરાન અમેરિકા સાથે પરમાણુ વાટાઘાટોમાં વ્યસ્ત હતું, ત્યારે ઈઝરાયલે તેના પર હુમલો કર્યો અને અમેરિકાએ તેનું સમર્થન કર્યું. આ દર્શાવે છે કે આ બંને દેશો કોઈપણ આંતરરાષ્ટ્રીય નિયમો અને કાયદાઓનું પાલન કરતા નથી. તેમણે એમ પણ કહ્યું – અમે યુદ્ધ શરૂ કર્યું ન હતું પરંતુ અમે હુમલાખોરને અમારી સંપૂર્ણ તાકાતથી જવાબ આપ્યો.
જણાવી દઈએ કે ઇઝરાયલ અને ઈરાન વચ્ચે 12 દિવસની લડાઈ પછી 24 જૂને યુદ્ધવિરામ થયો. યુએસ રાષ્ટ્રપતિ ડોનાલ્ડ ટ્રમ્પે આ જાહેરાત કરી હતી.
