આઈપીએલની (IPL) 16મી આવૃત્તિ ભારતમાં 31મી માર્ચથી શરૂ થવાની છે. ત્યારે મેચ ફિક્સિંગને (Match Fixing) લઈને એક મોટું સત્ય સામે આવ્યું છે. મેચ ફિક્સિંગ અને સટ્ટાબાજી એ રમતગમતની (Sports) દુનિયાના બે કાળા સત્ય છે જેને કોઈ ક્યારેય નકારી શકે નહીં. ભલે ગમે તેટલું કહેવામાં આવે કે હવે રમત તેના દૂષણથી દૂર છે પરંતુ તે સંપૂર્ણપણે કરવું અથવા 100 ટકા કહેવું શક્ય નથી. મેચ ફિક્સિંગ અંગે એક એવો અહેવાલ સામે આવ્યો છે જેણે ફરી એકવાર રમત જગતનું છુપાયેલું સત્ય બધાની સામે લાવી દીધું છે. આ મુજબ વર્ષ 2022માં કુલ 1212 આંતરરાષ્ટ્રીય મેચો શંકાના દાયરામાં હતી. 2021ની સરખામણીમાં આ સંખ્યામાં 34 ટકાનો વધારો થયો છે. 2022માં કુલ 8 લાખ 50 હજાર મેચો પર નજર રાખવામાં આવી હતી જેમાંથી 1200થી વધુ શંકાસ્પદ મળી આવી હતી. વર્ષ 2013માં કથિત સ્પોટ ફિક્સિંગ બાદ બીસીસીઆઈ (BCCI) પણ ખૂબ સતર્ક છે. Sportradarએ તેના અહેવાલમાં એવું પણ જણાવ્યું હતું કે તેણે IPL મેચો દરમિયાન સટ્ટાબાજી અને મેચ ફિક્સિંગ જેવા ભ્રષ્ટાચારને શોધવા માટે 2020 માં BCCIના ભ્રષ્ટાચાર વિરોધી એકમ સાથે પણ ભાગીદારી કરી હતી.
કઈ લીગમાંથી સટ્ટાબાજીનું કેટલું ટર્નઓવર
સટ્ટાબાજી આજકાલ સામાન્ય બની રહી છે. જ્યારે તે ઉચ્ચ સ્તરે પહોંચે છે, ત્યારે તે મેચ ફિક્સિંગનું સ્વરૂપ પણ લે છે. આ રિપોર્ટમાં દર્શાવેલ ડેટા અનુસાર લગભગ 135 મિલિયન યુરો એટલે કે લગભગ 1200 કરોડ રૂપિયા સટ્ટાબાજીનું ટર્નઓવર એટલે કે સટ્ટાબાજીની કમાણી IPLમાંથી આવે છે. જે વિશ્વભરની તમામ લીગ અનુસાર ચોથા નંબરની સૌથી વધુ રકમ છે. બીજી તરફ એકંદર રમતના સંદર્ભમાં ક્રિકેટ 67 મિલિયન યુરોના સૌથી વધુ સટ્ટાબાજીના ટર્નઓવર સાથે પાંચમા નંબરે આવે છે.
આઈપીએલ શરૂ થવામાં એક સપ્તાહથી પણ ઓછો સમય બાકી છે ત્યારે આ અહેવાલ સામે આવ્યો છે. આ અહેવાલ સ્પોર્ટ રડાર દ્વારા પ્રકાશિત કરવામાં આવ્યો છે જેમાં સંપૂર્ણ સંખ્યાઓનું વિગતવાર વર્ણન કરવામાં આવ્યું છે. જે મુજબ વર્ષ 2022 માં 1212 મેચોમાં 12 રમતો સામેલ હતી જે શંકાસ્પદ મળી હતી અને આ મેચો 92 દેશો અને પાંચ ઉપખંડોમાં રમાઈ હતી. આ અંતર્ગત તમામ મોટી ટુર્નામેન્ટ શંકાના દાયરામાં આવે છે. કારણ કે વર્ષ 2022માં ફૂટબોલનો ફિફા વર્લ્ડ કપ પણ યોજાયો હતો. મહિલા અને પુરૂષ ક્રિકેટ ટીમનો વર્લ્ડ કપ અને એશિયા કપ પણ યોજાયો હતો. રિપોર્ટ અનુસાર મોટાભાગની ફૂટબોલ મેચ શંકાના દાયરામાં છે. જ્યારે ક્રિકેટની ઘણી મેચો પણ આ યાદીમાં સામેલ છે.
ક્રિકેટની પણ અનેક મેચ શંકાના દાયરામાં
આ રિપોર્ટમાં ઘણા ગ્રાફિક્સ બતાવવામાં આવ્યા છે જે મુજબ વર્ષ 2022માં કુલ 13 ક્રિકેટ મેચો શંકાના દાયરામાં જોવા મળી છે. જો આપણે ક્રિકેટ સાથે જોડાયેલી તાજેતરની ઘટનાને યાદ કરીએ તો મહિલા T20 વર્લ્ડ કપ દરમિયાન બાંગ્લાદેશની એક ચેનલ દ્વારા એક અહેવાલ પ્રકાશિત કરવામાં આવ્યો હતો. આ રિપોર્ટમાં જણાવવામાં આવ્યું હતું કે બે બાંગ્લાદેશી ક્રિકેટર કંઈક વાતચીત કરતા પકડાઈ હતી. તેમાંથી એકની વર્લ્ડ કપ ટીમમાં પસંદગી થઈ ન હતી અને બીજી તે ટીમનો ભાગ હતી. તેનો રિપોર્ટ ICCને પણ મોકલવામાં આવ્યો હતો. અત્યારે ખાસ વાત એ છે કે જે ક્રિકેટ મેચો શંકાના દાયરામાં હતી તેમાંથી એક પણ મેચ ભારતમાં નહોતી.
