બાંગ્લાદેશના ફાસ્ટ બોલર મુસ્તફિઝુર રહેમાનની IPLમાં ભાગીદારી અંગેનો વિવાદ ચાલુ છે. દરમિયાન રમતગમત મંત્રાલયના એક સૂત્રએ જણાવ્યું હતું કે ભારતની રમત નીતિ બાંગ્લાદેશ સાથે દ્વિપક્ષીય ક્રિકેટ શ્રેણી અથવા બાંગ્લાદેશી ખેલાડીઓને IPLમાં રમવાથી પ્રતિબંધિત કરતી નથી. આવો પ્રતિબંધ ફક્ત પાકિસ્તાન ટીમ અને તેના ખેલાડીઓ પર લાગુ પડે છે. મુસ્તફિઝુર IPL 2026 માં રમશે કે નહીં તે નિર્ણય BCCI પર છે સરકાર પર નહીં.
દરમિયાન BCCI ના એક અધિકારીએ IANS ને જણાવ્યું હતું કે તે અમારા હાથમાં નથી. બાંગ્લાદેશી ખેલાડીઓને લીગમાં રમવાથી રોકવા અંગે અમને સરકાર તરફથી કોઈ સૂચના મળી નથી. અમે વધુ કંઈ કહી શકતા નથી. બાંગ્લાદેશમાં હિન્દુઓ વિરુદ્ધ હિંસા વચ્ચે રહેમાનની IPLમાં ભાગીદારીનો વિરોધ થઈ રહ્યો છે, જ્યાં છેલ્લા 13 દિવસમાં ત્રણ હિન્દુઓ માર્યા ગયા છે. IPL 2026 26 માર્ચથી શરૂ થશે, લીગની અંતિમ મેચ 31 મેના રોજ યોજાશે.
શિવસેનાના નેતા સંજય નિરૂપમે KKRના માલિક શાહરૂખ ખાનને બાંગ્લાદેશી ક્રિકેટર મુસ્તફિઝુર રહેમાનને ટીમમાંથી દૂર કરવા અપીલ કરી છે. નિરૂપમે કહ્યું, “જ્યારે આખો દેશ બાંગ્લાદેશથી ગુસ્સે અને નારાજ છે ત્યારે અમે તેમને વિનંતી કરીએ છીએ કે તે બાંગ્લાદેશી ખેલાડીને ટીમમાંથી દૂર કરે. દરમિયાન શિવસેના (UBT) ના પ્રવક્તા આનંદ દુબેએ કહ્યું, “બાંગ્લાદેશી ખેલાડીઓને ભારતીય ભૂમિ પર IPLમાં રમવાની મંજૂરી આપવી જોઈએ નહીં.”
KKR એ રહેમાનને ₹9.2 કરોડમાં ખરીદ્યો
રહેમાનને શાહરૂખની ફ્રેન્ચાઇઝી કોલકાતા નાઈટ રાઇડર્સ (KKR) દ્વારા ગયા મહિને અબુ ધાબીમાં યોજાયેલી IPL મીની-હરાજીમાં ₹9.2 કરોડમાં ખરીદવામાં આવ્યો હતો. તે IPLમાં અત્યાર સુધીનો સૌથી મોંઘો બાંગ્લાદેશી ખેલાડી બન્યો છે.
