નવી દિલ્હીઃ ભારતીય જનતા પાર્ટી હરિયાણામાં સતત ત્રીજી વખત સરકાર બનાવવા તરફ આગળ વધી રહી છે. 90 સીટોવાળી વિધાનસભામાં ભાજપ 50 સીટો પર આગળ છે. આ ચૂંટણીમાં તમામની નજર હિસાર સીટ પર હતી. કારણ કે અહીંથી દેશની સૌથી ધનિક મહિલા સાવિત્રી જિંદાલે અપક્ષ ઉમેદવાર તરીકે ચૂંટણી લડી હતી. હવે તેઓ આ બેઠક પરથી જીત્યા છે.
- સાવિત્ર જિંદાલ હરિયાણાની હિસાર બેઠક પર ચૂંટણી જીત્યા
- સાવિત્રી જિંદાલને 49,231 વોટ, કોંગ્રેસના ઉમેદવારને 30,290 જ્યારે ભાજપના ઉમેદવાર કમલ ગુપ્તાને 17,385 મતો મળ્યાં
કુરુક્ષેત્રના ભાજપ સાંસદ નવીન જિંદાલની માતા સાવિત્રી જિંદાલે તેમના નજીકના હરીફ અને કોંગ્રેસના ઉમેદવાર રામ નિવાસ રાણાને 18,941 મતોથી હરાવ્યા હતા. સાવિત્રી જિંદાલને 49,231 વોટ મળ્યા જ્યારે કોંગ્રેસના ઉમેદવારને 30,290 વોટ મળ્યા. જ્યારે ભાજપના ઉમેદવાર અને વિદાય લેતા ધારાસભ્ય કમલ ગુપ્તા 17,385 મતો સાથે ત્રીજા ક્રમે છે.
તમને જણાવી દઈએ કે ફોર્બ્સ ઈન્ડિયાએ આ વર્ષે સાવિત્રી જિંદાલને દેશની સૌથી અમીર મહિલા તરીકે જાહેર કરી હતી. સાવિત્રીના પતિ ઓપી જિંદાલનું વર્ષ 2005માં નિધન થયું હતું, ત્યારથી તે પોતાના પતિની કંપનીની સંપૂર્ણ જવાબદારી સંભાળી રહી છે. ભારતની સૌથી અમીર મહિલાની યાદીમાં સાવિત્રી જિંદાલ ટોચ પર છે. તેમની કુલ નેટવર્થ $39.5 બિલિયન છે.
પતિના અવસાન બાદ તેમણે રાજકારણમાં પ્રવેશ કર્યો
સાવિત્રી જિંદાલે 2005માં તેમના પતિના અવસાન બાદ રાજકારણમાં પ્રવેશ કર્યો હતો. 2005 માં તેણીએ કોંગ્રેસની ટિકિટ પર હરિયાણાની હિસાર બેઠક પરથી ચૂંટણી લડી અને જીતી. સાવિત્રી જિંદાલ 2013 સુધી હિસાર બેઠક પર હતા. ત્યાર બાદ તેમણે ફરીથી 2009 માં તે જ બેઠક પરથી ચૂંટણી જીતી હતી. તેઓ 2013 સુધી આ બેઠક પર હતા.
હિસારનું જાતિ સમીકરણ શું છે?
હિસારમાં 31 હજાર પંજાબી, 24 હજાર વણિક, 17 હજાર સૈની, 16 હજાર જાટ અને 11 હજાર બ્રાહ્મણ મતદારો છે. હિસાર સીટ પર યોજાયેલી 17 ચૂંટણીમાં 14 વખત વૈશ્ય, બે વખત પંજાબી અને એક વખત સૈની જાતિના ધારાસભ્ય બન્યા છે. હિસાર વિધાનસભા સીટ પર વૈશ્ય મતદારોની સારી સંખ્યા છે. જો હિસાર શહેરમાં કુલ મતદારોની વાત કરીએ તો 87243 પુરૂષ અને 777782 મહિલા મતદારો છે.
ભાજપ રાજ્યમાં ત્રીજી વખત સરકાર બનાવશે
હરિયાણાની 90 વિધાનસભા સીટો પર 5 ઓક્ટોબરે મતદાન થયું હતું. આ વખતે કોંગ્રેસ અને ભાજપ વચ્ચે સીધો મુકાબલો હતો. હરિયાણામાં છેલ્લા 10 વર્ષથી ભાજપની સરકાર હતી. આ વિધાનસભા ચૂંટણીમાં પણ ભાજપે ચમત્કાર કર્યો છે. રાજ્યમાં ભાજપ 49 બેઠકો પર આગળ છે જ્યારે કોંગ્રેસ 36 બેઠકો પર આગળ છે. ઈન્ડિયન નેશનલ લોકદળ 2 સીટો પર અને અપક્ષો 3 સીટો પર આગળ છે
