ભારતીય મૂળની અવકાશયાત્રી સુનીતા વિલિયમ્સ (Sunita Williams) ફરી એકવાર અવકાશમાં (Space) ઉડાન ભરવા જઈ રહી છે. તે શનિવારે નાસાના ‘સ્ટારલાઇનર’માં અવકાશમાં ઉડાન ભરશે જે આજે રાત્રે 10 વાગ્યે ફ્લોરિડાના કેનેડી સ્પેસ સેન્ટરથી ટેકઓફ કરશે.
આ પહેલા અમેરિકન સ્પેસ એજન્સી નાસા અને એરક્રાફ્ટ ઉત્પાદક બોઈંગના સંયુક્ત મિશનમાં કેટલીક સમસ્યાઓ આવી હતી. 7 મેના રોજ અવકાશયાનના ઓક્સિજન વાલ્વમાં તકનીકી ખામીને કારણે તેમની ઉડાન રદ કરવામાં આવી હતી. મિશન અંગે અમેરિકાની સ્પેસ એજન્સી નાસાએ કહ્યું કે જો બધુ બરાબર રહ્યું તો સ્ટારલાઈનર ઈન્ટરનેશનલ સ્પેસ સ્ટેશન પર ડોક કરશે ત્યારબાદ સુનિતા વિલિયમ્સ અને બૂચ વિલ્મોર તેમના સાથીદારો સાથે સ્ટારલાઈનર સ્પેસક્રાફ્ટ અને તેની સબ-સિસ્ટમનું પરીક્ષણ કરવા લગભગ એક અઠવાડિયા સુધી સ્ટેશન પર રહેશે.
નાસાના જણાવ્યા અનુસાર ભ્રમણકક્ષામાં ફરતા ઈન્ટરનેશનલ સ્પેસ સ્ટેશન (ISS) માટે ફ્લાઈટ આજે ફ્લોરિડાના કેનેડી સ્પેસ સેન્ટરથી ભારતીય સમય અનુસાર રાત્રે 10 વાગ્યે ઉડાન ભરશે. વિલિયમ્સ અને સાથી NASA અવકાશયાત્રી બૂચ વિલ્મોર યુએસ સ્પેસ એજન્સીના કોમર્શિયલ ક્રૂ પ્રોગ્રામના ભાગ રૂપે સ્ટારલાઇનર અવકાશયાનમાં ઉડાન ભરનારા પ્રથમ માનવી હશે.
સ્ટારલાઈનર અવકાશયાનને રોકેટ કંપની યુનાઈટેડ લોન્ચ એલાયન્સ (યુએલએ) તરફથી એટલાસ 5 રોકેટ પર અવકાશમાં મોકલવામાં આવશે. તે રવિવારે ISS સાથે ડોક કરશે અને અવકાશયાત્રીઓ લગભગ એક અઠવાડિયા સુધી ISS પર વિવિધ પરીક્ષણો કરશે. નાસાએ કહ્યું કે સ્ટારલાઈનર ત્યારપછી ISSથી અલગ થઈને 10 જૂને દક્ષિણ-પશ્ચિમ યુનાઈટેડ સ્ટેટ્સમાં પેરાશૂટ અને એરબેગની મદદથી પૃથ્વીના વાતાવરણ અને જમીન પર પાછા ફરશે.
જો આ મિશન સફળ થશે તો નાસા ઇન્ટરનેશનલ સ્પેસ સ્ટેશન પર ક્રૂ રોટેશન મિશન માટે સ્ટારલાઇનર અને તેની સિસ્ટમ્સને પ્રમાણિત કરવાની અંતિમ પ્રક્રિયા શરૂ કરશે. સ્ટારલાઈનર કેપ્સ્યુલ ચાર અવકાશયાત્રીઓ, ક્રૂ અને કાર્ગોના મિશ્રણને NASA મિશન માટે પૃથ્વીની નિચલી કક્ષામાં લઈ જશે.
તમને જણાવી દઈએ કે સુનીતા વિલિયમ્સે અંતરિક્ષમાં રેકોર્ડ 322 દિવસ વિતાવ્યા છે અને તેમના નામે સૌથી વધુ કલાકો સુધી સ્પેસવોક કરનાર મહિલા વૈજ્ઞાનિક હોવાનો રેકોર્ડ છે. વિલિયમ્સ પહેલીવાર 9 ડિસેમ્બર 2006ના રોજ અવકાશમાં ગયા હતા અને 22 જૂન 2007 સુધી અવકાશમાં રહ્યા હતા. સુનીતા વિલિયમ્સે રેકોર્ડ 29 કલાક અને 17 મિનિટ સુધી ચાર વખત સ્પેસવોક કર્યું હતું. આ પછી સુનિતા વિલિયમ્સ 14 જુલાઈ 2012ના રોજ બીજી વખત અવકાશ યાત્રા પર ગયા અને 18 નવેમ્બર 2012 સુધી અવકાશમાં રહ્યા હત્.
