નવી દિલ્હી: ભારત(India) અને પાકિસ્તાન(Pakistan)ના ક્રિકેટ ચાહકો માટે એક સારા સમાચાર છે. આવતા વર્ષે ભારતીય ટીમ(Team India) એશિયા કપ(Asia Cup) માટે પાકિસ્તાનનો પ્રવાસ કરી શકે છે. પાકિસ્તાનને આ ટુર્નામેન્ટની યજમાની મળી છે. BCCI એશિયા કપ માટે ટીમ મોકલવા માટે તૈયાર છે. જો આમ થશે તો ટીમ ઈન્ડિયા 2008 પછી પહેલીવાર પાકિસ્તાન જશે. વાસ્તવમાં એશિયા કપ બાદ ભારત આવતા વર્ષે જ ODI વર્લ્ડ કપનું આયોજન કરશે. આવી સ્થિતિમાં, એવું કહેવામાં આવી રહ્યું છે કે BCCI કોઈ વિવાદ ઇચ્છતું નથી. જો ભારતીય ટીમ પાકિસ્તાન જાય છે તો પાકિસ્તાની ટીમ પણ વર્લ્ડ કપ માટે કોઈપણ વિવાદ વગર ભારતનો પ્રવાસ કરી શકે છે. જો કે, આ અંગે હજુ મામલો અટવાયેલો છે. બોર્ડે કહ્યું છે કે ટીમ મોકલવાનો અંતિમ નિર્ણય સરકારનો રહેશે. કેન્દ્ર સરકાર પરવાનગી આપશે તો જ ભારતીય ટીમ ત્યાં જશે.
2027 સુધી પાકિસ્તાન સાથે કોઈ દ્વિપક્ષીય શ્રેણી નહીં
જોકે, ભારતીય ટીમ 2027 સુધી પાકિસ્તાન સામે કોઈ દ્વિપક્ષીય શ્રેણી રમશે નહીં. બોર્ડે તેનો 2023 થી 2027 સુધીનો કાર્યક્રમ જાહેર કર્યો છે. બીસીસીઆઈ દ્વારા રાજ્ય ક્રિકેટ બોર્ડને મોકલવામાં આવેલા ભાવિ કાર્યક્રમોની યાદીમાં પાકિસ્તાનની કોલમ ખાલી રાખવામાં આવી છે. આ જ પત્રમાં કહેવામાં આવ્યું છે કે ટીમ ઈન્ડિયા એશિયા કપ માટે પાકિસ્તાન જશે, પરંતુ સરકારનો નિર્ણય અંતિમ રહેશે. ભારતીય ટીમ ICC અથવા ACC ટૂર્નામેન્ટ રમવા સિવાય 38 ટેસ્ટ રમશે. આમાં ભારતમાં 20 ટેસ્ટ રમાશે, 18 વિદેશમાં. ભારત આ પાંચ વર્ષમાં 42 વનડે પણ રમશે. જેમાંથી 21 મેચ ઘરઆંગણે અને 21 મેચ બહાર રમાશે. ભારત 2023-2027 વચ્ચે કુલ 61 T20 મેચ રમશે. 31 T20 ઘરઆંગણે અને 30 બહાર રમાશે.
આઈપીએલ અને આઈસીસી ટુર્નામેન્ટમાં દ્વિપક્ષીય શ્રેણી મેચો પર દબાણ ઓછું
દ્વિપક્ષીય શ્રેણીમાં ભારતની મેચોની સંખ્યા છેલ્લા પાંચ વર્ષની સરખામણીએ ઘટી છે. 2018-2022 ની વચ્ચે, ભારતે દ્વિપક્ષીય શ્રેણીમાં 163 મેચ રમી. તે જ સમયે, આગામી પાંચ વર્ષમાં, ભારત દ્વિપક્ષીય શ્રેણીમાં માત્ર 141 મેચ રમશે. 22 મેચ ઓછી હોવાથી ખેલાડીઓ પર કામનું દબાણ થોડું ઓછું થશે. જો કે, દર વર્ષે ઓછામાં ઓછી એક ICC ટુર્નામેન્ટ હોય છે. આ કારણે દ્વિપક્ષીય શ્રેણીની મેચો પણ ટૂંકી રાખવામાં આવી છે. આ સિવાય IPL માટે દર વર્ષે 75-80 દિવસ રાખવામાં આવ્યા છે. ખેલાડીઓએ પણ આ લીગમાં રમવાનું રહેશે.
