ભારત અને દક્ષિણ આફ્રિકા વચ્ચેની ODI સીરિઝનો પ્રારંભ તા.30 નવેમ્બરે રાંચી સ્ટેડિયમ ખાતે થશે. ટેસ્ટ સીરિઝ પૂરી થયા બાદ બંને ટીમો હવે વનડે ફોર્મેટમાં ટક્કર માટે તૈયાર છે. ટીમ ઈન્ડિયાના મોટા ખેલાડીઓ વિરાટ કોહલી અને રોહિત શર્મા પણ રાંચી પહોંચી ગયા છે. ખાસ વાત એ છે કે આ વર્ષ 2025ની આ ODI સીરિઝ બંને સ્ટાર ખેલાડીઓ માટે છેલ્લી ગણાય છે. આવનાર વર્ષે ઇંગ્લેન્ડ પ્રવાસ દરમિયાન નવી રણનીતિ હેઠળ ODI ટીમમાં મર્યાદિત ફેરફાર કરવાની યોજના છે.
રાંચી પહોંચી ચૂકેલા ખેલાડીઓમાંથી કોહલીનો એક ખાસ વીડિયો સામેય આવ્યો છે. જેમાં તે પૂર્વ ભારતીય કેપ્ટન એમએસ ધોનીના ઘરે ડિનર પાર્ટીમાં હાજર દેખાઈ રહ્યો છે. 2020માં આંતરરાષ્ટ્રીય ક્રિકેટમાંથી નિવૃત્તિ લઈ ચૂકેલા ધોની હાલમાં રાંચીમાં પોતાના ફાર્મહાઉસમાં રહે છે અને સમય-સમયે ટીમ ઈન્ડિયાના ખેલાડીઓ સાથે મુલાકાત રાખે છે.
ડિનર પાર્ટી પછીનો એક વીડિયો ખાસ ચર્ચામાં છે. તેમાં ધોની પોતાની કારમાં વિરાટ કોહલીને ટીમ હોટેલ સુધી છોડી રહ્યો છે. ક્રિકેટપ્રેમીઓએ આ વીડિયો ખૂબ પસંદ કર્યો છે કારણ કે બંને ખેલાડીઓ વચ્ચેની મિત્રતા અને માન-આદર વર્ષોથી ભારતીય ક્રિકેટની ઓળખ છે. કોહલીએ આંતરરાષ્ટ્રીય કારકિર્દીની શરૂઆત ધોનીની કેપ્ટનશીપ હેઠળ કરી હતી. બાદમાં ધોનીએ કેપ્ટનશીપ છોડતાં ટીમની આગેવાની કોહલીને સોંપી હતી.
કોહલી માટે આ ODI શ્રેણી મહત્વપૂર્ણ
દક્ષિણ આફ્રિકા સામેની આ શ્રેણી વિરાટ કોહલી માટે ખૂબ જ મહત્વપૂર્ણ માનવામાં આવી રહી છે. ઓસ્ટ્રેલિયા સામેની છેલ્લી ODI સીરિઝમાં કોહલી શરૂઆતની બે મેચમાં રન બનાવવામાં નિષ્ફળ ગયો હતો પરંતુ ત્રીજી મેચમાં તેણે મજબૂત અણનમ અડધી સદી ફટકારી હતી. આ કારણે હવે પ્રેક્ષકોને તેની પાસેથી શ્રેષ્ઠ પ્રદર્શનની અપેક્ષા છે. દક્ષિણ આફ્રિકા વિરુદ્ધ કોહલીનું વનડે રેકોર્ડ પણ અત્યાર સુધી ખૂબ જ પ્રભાવશાળી રહ્યું છે.
હવે નજર રહેશે કે રાંચી ODIમાં ભારતીય ટીમ કેવી શરૂઆત કરે છે અને ધોનીની હાજરીથી મળેલા મોરાલ બૂસ્ટનો કેટલો લાભ ખેલાડીઓ લઈ શકે છે.
