વડોદરા: શહેરમાં દિવસે દિવસે ગુનાખોરી રેશિયો ચિંતાજનક ઉંચો જઇ રહ્યો છે. એકતરફ શહેરમાં નિંદ્રાધીન પોલીસના કારણે સતત ચોરીના બનાવો બની રહ્યા છે. ત્યારે બીજી તરફ વહેલી સવારે માત્ર 30 મિનિટમાં ચેઇન સ્નેચિંગ ટોળકીએ મોર્નિંગ વોકમાં નીકળેલી ત્રણ મહિલાઓને નિશાન બનાવી ગળામાંથી સોનાની ચેઇનની લૂંટ ચલાવી ફરાર થઇ ગયા હતા. જોકે 24 કલાકમાં અછોડા તુટ્યાનો આ ચોથો બનાવ છે. શહેરના ખોડિયારનગર ચાર રસ્તા, કારેલીબાગ અને સમા ચાણક્યપુરી પાસે સવારે 6:45 વાગ્યાથી લઇને 7:15 વાગ્યાના સમયગાળામાં બનેલા ત્રણ બનાવોએ ચકચાર જગાવી મૂકી હતી. આ ઉપરાંત રવિવારે વારસિયા વિસ્તારમાં પણ મહિલાનો અછોડો તૂટ્યો હતો.
અછોડા તુટયાના પ્રથમ બનાવમાં શહેરના 134, વૈકુંઠ-2, ન્યુ વીઆઇપી રોડ ઉપર રહેતા અરૂણાબહેન દયાપ્રસાદ ત્રિવેદી(ઉં.55) સવારે 6:45 વાગ્યે પતિ સાથે મોર્નિંગ વોકમાં નીકળ્યા હતા. દંપતી ચાલતા ખોડિયારનગર ચાર રસ્તા, બ્રહ્માનગર પાસેથી પસાર થતા હતા. તે સમયે બ્લેક કલરની બાઇક પર ધસી આવેલા અજાણ્યા બે શખ્સો પૈકી એકે અરૂણાબહેનના ગળામાંથી રૂપિયા 35 હજારની કિંમતની દોઢ તોલાનો સોનાની ચેઇનની લૂંટ ચલાવી ફરાર થઇ ગયા હતા. દરમિયાન આ બનાવની જાણ હરણી પોલીસને થતાં તુરંત જ પોલીસ સ્થળ પર દોડી ગઇ હતી અને લૂંટારુ ટોળકીનો ભોગ બનેલા અરૂણાબહેન ત્રિવેદી પાસેથી વિગત મેળવી તપાસ શરૂ કરી હતી.
અછોડા તુટયાના બીજા બનાવમાં ખોડિયારનગર પાસેના બનાવના અડધા કલાક બાદ એટલે કે, સવારે 7:15 કલાકે સમા ચાણક્યપુરી જીગર વિદ્યાલય પાસેથી ચાલતા જઇ રહેલા 50 વર્ષીય ગંગોત્રીબહેન મહેન્દ્રપ્રસાદ રાયને(રહે, બી-19, તક્ષશિલા સોસાયટી, વિભાગ-2, ન્યુ સમા રોડ, વડોદરા) નિશાન બનાવ્યા હતા. બાઇક પર ધસી આવેલા લૂંટારાઓએ ગંગોત્રીબહેન કંઇ સમજે તે પહેલાં તેઓના ગળામાંથી રૂપિયા 30 હજારની કિંમતની સોનાની ચેઇન લૂંટી ફરાર થઇ ગયા હતા. આ બનાવ અંગેની જાણ સમા પોલીસને થતાં પોલીસ સ્થળ પર દોડી ગઇ હતી અને ટોળકીનો ભોગ બનેલા ગંગોત્રીબહેન પાસેથી વિગતો મેળવી તપાસ શરૂ કરી હતી.
અછોડા તુટયાના ત્રીજા બનાવમાં શહેરના વારસિયા વિસ્તારમાં આવેલી નવનીત પાર્ક સોસાયટીમાં રહેતા 69 વર્ષીય જશોદાબેન સોલંકી રસ્તાના ડિવાઈડર ઉગેલા છોડ ઉપરથી ફૂલ તોડવા માટે ગયા હતા. ફૂલ તોડતી વખતે અજાણ્યો યુવક પાછળથી આવી તેમના ગળામાંથી રૂપિયા 30 હજારની કિંમતનું એક તોલાનું સોનાનું મંગળસૂત્ર તોડી નજીકમાં પાર્ક કરેલી બાઇક લઈ નાસી છૂટ્યો હતો. વૃદ્ધાની ફરિયાદના આધારે વારસીયા પોલીસે અજાણ્યા બાઇક સવાર વિરુદ્ધ ગુનો નોંધી તેની ધરપકડના ચક્રો ગતિમાન કર્યાં છે.
અછોડા તુટયાના ચોથા બનાવમાં કારેલીબાગ વિસ્તારના કલાકુંજ સોસાયટીમાં રહેતા 40 વર્ષીય રાજન ગોપાલભાઈ સોની મોર્નિંગ વોકમાં નીકળ્યા હતા. તેઓ ચાલતા એલએનટી સર્કલ થઇ મુક્તાનંદ સર્કલ પાસવાથી પસાર થતા હતા. તે સમયે બ્લેક કલરની બાઇક પર ધસી આવેલા અજાણ્યા બે શખ્સો પૈકી એકે રાજનભાઈના ગળામાંથી રૂપિયા 30 હજારની કિંમતની સોનાની ચેઇનની લૂંટ ચલાવી ફરાર થઇ ગયા હતા.
આ બનાવ અંગેની જાણ કારેલીબાગ પોલીસે રાજનભાઈ પાસેથી વિગતો મેળવી તપાસ શરૂ કરી હતી. વહેલી સવારે બનેલા આ બનાવોમાં એક જ ટોળકી હોવાનું અનુમાન છે, ત્યારે હરણી પોલીસે, કારેલીબાગ પોલીસે અને સમા પોલીસે બનાવના ભેદ ઉકેલવા માટે બનાવ બનેલા સ્થળોની આસપાસમાંથી CCTV ફૂટેજ મેળવવાની તજવીજ હાથ ધરી છે અને અછોડા તોડ અજાણ્યા લૂંટારાઓ સામે લૂંટનો ગુનો નોંધી તપાસ શરૂ કરી છે.
