રાજસ્થાનના રણમાં સ્થિત જેસલમેર જિલ્લામાં બનેલી એક ઘટનાએ સૌને ચોંકાવી દીધા છે. જેસલમેરના રેતાળ ટેકરાઓમાં એક ખેતરમાં ટ્યુબવેલ ખોદતી વખતે પાણી ધરતી ચીરીને બહાર આવ્યું. આ પાણીની ગતિ એટલી બધી હતી કે તે લગભગ ત્રણથી ચાર ફૂટ ઉંચે ઉછળી રહ્યું હતુ. તે પછી લગભગ 50 કલાક સુધી આ જ ઝડપે પાણી નીકળતું રહ્યું. કોઈને સમજાયું નહીં કે આ કેવી રીતે થઈ રહ્યું છે? શનિવારે સવારે 5 વાગ્યે જમીનમાંથી પાણી નીકળવાનું શરૂ થયું હતું જે સોમવારે સવારે 7 વાગ્યે આપોઆપ બંધ થઈ ગયું હતું.
મળતી માહિતી મુજબ આ ચોંકાવનારી ઘટના વિક્રમ સિંહ ભાટીના ખેતરમાં બની હતી. તેમનું ખેતર જેસલમેરના કેનાલ વિસ્તારના ચક 27 બીડીના તીન જોરા માઇનોર પાસે છે. વિક્રમ સિંહ ભાજપના મોહનગઢ વિભાગ અધ્યક્ષ છે. તે પોતાના ખેતરમાં ટ્યુબવેલ ખોદતો હતો. આ માટે ટ્યુબવેલ ખોદવાનું મશીન મુકવામાં આવ્યું હતું. શનિવારે સવારે પાંચ વાગ્યાના સુમારે અચાનક ધરતીમાંથી પાણી ફૂટી નીકળ્યું હતું. પાણીનું દબાણ એટલું બધું હતું કે તે ત્રણથી ચાર ફૂટની ઊંચાઈએ ઉછળતું રહ્યું. આ જોઈને વિક્રમસિંહ અને આસપાસના લોકો ગભરાઈ ગયા હતા. આ ઘટના ત્યારે બની જ્યારે ટ્યુબવેલ 850 ફૂટની ઉંડાઈ સુધી ખોદવામાં આવ્યો હતો. ત્યાર બાદ પાઈપ બહાર કાઢતી વખતે તેજ ગતિએ પાણી નીકળવા લાગ્યું હતું.
થોડી જ વારમાં ટ્યુબવેલ ખોદતું મશીન પણ પાણીના વહેણને કારણે ડૂબવા લાગ્યું હતું. ત્યાં કામ કરતા લોકોએ પાણી રોકવાનો પ્રયાસ કર્યો પણ નિષ્ફળ ગયા. તેઓએ વિચાર્યું કે થોડા સમય પછી પાણી ઓછું થઈ જશે. પરંતુ આવું ન થયું. જમીનમાંથી એ જ ઝડપે પાણી નીકળતું રહ્યું. આ પાણી ધીમે ધીમે તેમના ખેતરમાં ફેલાઈ ગયું. બાદમાં તેણે ખેતરની સીમાઓ તોડવાનું શરૂ કર્યું. તેમણે આ અંગે પ્રશાસનને જાણ કરી હતી. થોડી જ વારમાં આ વાત સોશિયલ મીડિયા પર ફેમસ થઈ ગઈ અને તેનો વીડિયો વાયરલ થઈ ગયો. વિક્રમ સિંહનું કહેવું છે કે સતત વહેણને કારણે ખેતરમાં ચારથી પાંચ ફૂટ પાણી ભરાઈ ગયું હતું.
આ પર મોહનગઢના નાયબ તહસીલદાર લલિત ચરણ ત્યાં પહોંચ્યા. સ્થિતિ જોઈને તેમણે વિસ્તારના લોકોને એડવાઈઝરી જારી કરી. જ્યાંથી પાણી નીકળતું હોય ત્યાંથી 500 મીટરની ત્રિજ્યામાં કોઈએ ન જવું જોઈએ તેવું કહેવામાં આવ્યું હતું. પરંતુ શનિવારે દિવસભર અને રાત્રે પણ પાણી વહેતું બંધ થયું ન હતું. રવિવારે પણ દિવસભર એક જ ઝડપે અને દબાણથી પાણી વહેતું રહ્યું હતું. જેના કારણે ચારેબાજુ પાણી ભરાઈ ગયા હતા.
સોમવારે સવારે 7 વાગ્યે પાણી વહેતું બંધ થયું
ત્યારબાદ સાંજે કેઇર્ન વેદા ઇન્ડિયા કંપની, ઓએનજીસી અને ઓઇલ ઇન્ડિયા કંપનીના કર્મચારીઓ ઘટનાસ્થળે પહોંચ્યા હતા. પણ વાત તેમની સમજ બહાર રહી. રવિવારે પણ આખી રાત વહી ગયા બાદ સોમવારે સવારે સાત વાગ્યાની આસપાસ પાણી પોતાની મેળે બંધ થઈ ગયું હતું. પરંતુ દબાણમાં આટલું પાણી કેવી રીતે બહાર આવ્યું તે કોઈને સમજાયું નહીં. સોમવારે સવારે પાણી બંધ થતાં વહીવટીતંત્ર અને ખેતર માલિકે રાહતનો શ્વાસ લીધો હતો. આ પાણી અને ત્યાંની માટીના સેમ્પલ લેવામાં આવ્યા છે. તેમણે સામાન્ય જનતાને અપીલ કરી છે કે કોઈ પણ ગ્રામીણ ટ્યુબવેલના 500 મીટર વિસ્તારમાં પ્રવેશ કરશે નહીં. આ સાથે આ વિસ્તારમાં પશુઓને જતા રોકવાનું પણ કહેવામાં આવ્યું છે. તેમણે કહ્યું કે જ્યાં સુધી નિષ્ણાતોના અભિપ્રાય ન આવે ત્યાં સુધી ખેડૂતોને અટવાયેલા સાધનોને બહાર કાઢવાનો પ્રયાસ ન કરવાનો આદેશ આપવામાં આવ્યો છે.
