નવી દિલ્હી: સંસદનું વિશેષ સત્ર આજે સોમવારે તા. 18 સપ્ટેમ્બરથી શરૂ થયું છે. વડાપ્રધાન નરેન્દ્ર મોદીએ ગૃહને સંબોધિત કરતાં કહ્યું, નવા ગૃહમાં જતા પહેલા આ પ્રેરણાદાયી ક્ષણો અને ઇતિહાસની મહત્વપૂર્ણ ક્ષણોને યાદ કરીને આગળ વધવાની તક છે. આપણે બધા આ ઐતિહાસિક ઇમારતને વિદાય આપી રહ્યા છીએ. આઝાદી પહેલા આ ગૃહ કાઉન્સિલનું સ્થાન હતું. આઝાદી પછી તેને સંસદ ભવન તરીકે માન્યતા મળી.
એ સાચું છે કે આ ઈમારત બનાવવાનો નિર્ણય વિદેશી શાસકોનો હતો પરંતુ આપણે એ ક્યારેય ભૂલીશું નહીં અને ગર્વથી કહીશું કે આ ભવનના નિર્માણમાં દેશવાસીઓનો પરસેવો ભળેલો છે. આ ગૃહના નિર્માણમાં પૈસા પણ આપણા દેશવાસીઓના જ રોકાયા હતા.
પીએમ મોદીએ કહ્યું, 75 વર્ષની સફરમાં આ ગૃહમાં ઘણી લોકતાંત્રિક નીતિઓ ઘડવામાં આવી છે. ગૃહ તેનું સાક્ષી રહ્યું છે. આપણે ભલે નવી ઈમારતમાં જઈએ પરંતુ જૂની ઈમારત પણ ભવિષ્યની પેઢીઓને પ્રેરણા આપતી રહેશે. ભારતની લોકશાહીની સુવર્ણ યાત્રાનું આ એક મહત્વપૂર્ણ પ્રકરણ છે.
પીએમ મોદીએ કહ્યું, ભારતને એ વાત પર ગર્વ થશે કે જી-20ની ભારતની અધ્યક્ષતા દરમિયાન આફ્રિકન યુનિયન જી-20નું સભ્ય બન્યું. આફ્રિકન યુનિયનની અપેક્ષાઓ પૂરી કરવી એ ભારતનું નસીબ હતું. G-20 સમિટમાં આ ઘોષણા પર સર્વસંમતિથી હસ્તાક્ષર કરવામાં આવ્યા તે ભારતની તાકાત છે. આપણા બધા માટે ગર્વની વાત છે કે ભારત વિશ્વ મિત્ર તરીકે પોતાનું સ્થાન બનાવવામાં સફળ રહ્યું છે. આખી દુનિયા ભારતમાં પોતાના મિત્રને જોઈ રહી છે.
ગરીબ બાળક સંસદમાં પહોંચ્યો
પીએમ મોદી પીએમ મોદીએ કહ્યું, જ્યારે હું પહેલીવાર સંસદનો સભ્ય બન્યો, જ્યારે હું સાંસદ તરીકે આ ગૃહમાં પહેલીવાર પ્રવેશ્યો ત્યારે આ સંસદભવનના દરવાજે માથું ટેકવીને હું આ લોકશાહીના મંદિરમાં આદરપૂર્વક પ્રવેશ્યો હતો. આ ભારતની લોકશાહીની તાકાત છે. રેલવે પ્લેટફોર્મ પર રહેતો ચા વેચતો ગરીબ બાળક સંસદમાં પહોંચ્યો હતો. મેં ક્યારેય વિચાર્યું ન હતું કે દેશ મને આટલો આશીર્વાદ આપશે અને મને આટલો પ્રેમ કરશે.
જૂના સંસંદભવનને છોડતી વખતે મન અનેક યાદોથી ભરાઈ જાય છે
પીએમ મોદીએ કહ્યું, જ્યારે દેશે ત્રણ પીએમ ગુમાવ્યા ત્યારે આ ગૃહ આંસુઓથી ભરાઈ ગયું હતું. અનેક પડકારો હોવા છતાં, દરેક સ્પીકરોએ બંને ગૃહોને સરળતાથી ચલાવ્યા છે. PM મોદીએ કહ્યું, આ ગૃહને વિદાય આપવી એ ખૂબ જ ભાવનાત્મક ક્ષણ છે, જો કોઈ પરિવાર જૂનું ઘર છોડીને નવા મકાનમાં જાય છે, તો ઘણી યાદો તેને થોડી ક્ષણો માટે હચમચાવી દે છે અને જ્યારે આપણે આ ગૃહ છોડી રહ્યા છીએ ત્યારે આપણું મન ભરાઈ જાય છે.
સંસદને બચાવવા માટે ગોળીઓ ખાનારને સલામ
પીએમ મોદીએ કહ્યું, આ ગૃહ પર આતંકવાદી હુમલો થયો હતો. તે હુમલો લોકશાહીની માતા, આપણા આત્મા પર થયો હતો. આ દેશ તે ઘટનાને ક્યારેય ભૂલી શકશે નહીં. પરંતુ હું તેમને પણ સલામ કરું છું જેમણે ગૃહને બચાવવા અને સભ્યને બચાવવા આતંકવાદીઓ સામે લડતી વખતે છાતી પર ગોળીઓ ખાધી હતી.
