ડોનાલ્ડ ટ્રમ્પના ભારત પર ટેરિફ બોમ્બ બાદ આ વાતની ચર્ચા આખી દુનિયામાં થઈ રહી છે. યુએસ કાયદા નિર્માતાઓ પોતે ટ્રમ્પના નિર્ણયનો વિરોધ કરી રહ્યા છે અને તેને અમેરિકનોના હિતોની વિરુદ્ધ ગણાવી રહ્યા છે. જોકે ટ્રમ્પ મક્કમ છે, ભારત દ્વારા રશિયન તેલ ખરીદવા સામે ટેરિફ લાદવાને યોગ્ય ગણાવી રહ્યા છે.
રશિયન તેલ ખરીદવા સામે ધમકી આપી
આ દરમિયાન ડોનાલ્ડ ટ્રમ્પના ટોચના આર્થિક સલાહકારે પણ ભારત સરકારને રશિયન તેલ ખરીદવા સામે ધમકી આપી છે. યુએસ નેશનલ ઇકોનોમિક કાઉન્સિલના ડિરેક્ટર કેવિન હેસેટે ચેતવણી આપી છે કે જો ભારત રશિયન ક્રૂડ ઓઇલના વેપારને રોકવામાં નિષ્ફળ જાય તો યુએસ રાષ્ટ્રપતિ કોઈપણ રીતે ટેરિફ દૂર કરવાના નથી.
કેવિન હેસેટે ભારત સરકાર પર હુમલો કર્યો અને કહ્યું કે યુએસ-ભારત વેપાર વાટાઘાટો પણ હવે ‘જટિલ’ બની ગઈ છે અને ભારત અમેરિકન ઉત્પાદનો માટે તેનું બજાર ખોલવામાં “હઠીલું” વલણ અપનાવી રહ્યું છે.
હેસેટે વધુમાં કહ્યું કે જો ભારત નહીં ઝૂકે તો મને નથી લાગતું કે રાષ્ટ્રપતિ ટ્રમ્પ એવા લોકોમાંના એક છે જે ઝૂકશે. બુધવારે અમેરિકાએ ભારતીય માલ પરના ટેરિફને બમણા કરીને 50 ટકા કર્યા, જે બ્રાઝિલ સિવાયના કોઈપણ દેશ પર સૌથી વધુ છે. આમાં ભારત દ્વારા રશિયન ક્રૂડ ઓઇલની ખરીદી પર વધારાની 25 ટકા ડ્યુટીનો સમાવેશ થાય છે.
હેસેટે કહ્યું કે ભારત સાથેની વેપાર વાટાઘાટો પણ “જટિલ” છે અને દાવો કર્યો છે કે ટ્રમ્પે ફક્ત રૂસ પર શાંતિ સ્થાપવા અને લાખો લોકોના જીવ બચાવવા માટે દબાણ લાવવા માટે ટેરિફ લાદ્યા છે.
ભારતનું શું વલણ છે?
ભારતે કહ્યું છે કે તે અમેરિકાના દબાણ સામે ઝૂકશે નહીં. વડા પ્રધાન નરેન્દ્ર મોદીએ દેશના ખેડૂતોના હિત સાથે “ક્યારેય સમાધાન નહીં” કરવાની પ્રતિજ્ઞા લીધી છે. સરકારનો અંદાજ છે કે આ ટેરિફથી અમેરિકામાં 48.2 અબજ ડોલરની ભારતીય નિકાસને અસર થશે.
