દિલ્હીની રાઉઝ એવન્યુ કોર્ટે કોંગ્રેસના ભૂતપૂર્વ અધ્યક્ષ અને રાજ્યસભા સાંસદ સોનિયા ગાંધીને નોટિસ ફટકારી છે. સ્પેશિયલ જજની કોર્ટે સોનિયા ગાંધીને 1980માં ભારતીય નાગરિકતા મેળવતા પહેલા મતદાર યાદીમાં તેમનું નામ ઉમેરવાના આરોપસર નોટિસ ફટકારી છે.
એક અરજીના અસ્વીકાર સામે કોર્ટમાં રિવિઝન અરજી દાખલ કરવામાં આવી હતી, જેના સંદર્ભમાં કોર્ટે સોનિયા ગાંધીને નોટિસ જારી કરી હતી. સોનિયા ગાંધીને ભારતીય નાગરિકતા પ્રાપ્ત કરતા પહેલા મતદાર યાદીમાં તેમનું નામ સામેલ કરવા અંગે નોટિસ જારી કરવામાં આવી છે. આ સંદર્ભમાં એક અરજી ફગાવી દેવામાં આવી હતી, અને તેની સામે સુધારણા અરજી દાખલ કરવામાં આવી છે.
આ કેસની સુનાવણી કરતા કોર્ટે સોનિયા ગાંધીને નોટિસ જારી કરી છે. આ નોટિસમાં આરોપ લગાવવામાં આવ્યો કે તેમણે 1983માં નાગરિકતા પ્રાપ્ત કરતા પહેલા 1980ની મતદાર યાદીમાં તેમનું નામ ઉમેર્યું હતું.
સોનિયા ગાંધી વિરુદ્ધ અરજી દાખલ
અરજદાર વિકાસ ત્રિપાઠીએ સોનિયા ગાંધી વિરુદ્ધ FIR નોંધવાની વિનંતીને નકારી કાઢવાના મેજિસ્ટ્રેટ કોર્ટના આદેશને પડકાર્યો છે. તેમણે આરોપ લગાવ્યો છે કે સોનિયા ગાંધીનું નામ 1980 માં નવી દિલ્હી વિધાનસભા મતવિસ્તારની મતદાર યાદીમાં સામેલ કરવામાં આવ્યું હતું, જોકે તેઓ 1983 માં ભારતીય નાગરિક બન્યા હતા. અરજીમાં જણાવાયું છે કે આ સૂચવે છે કે શરૂઆતમાં તેમનું નામ ઉમેરવા માટે બનાવટી દસ્તાવેજોનો ઉપયોગ કરવામાં આવ્યો હોઈ શકે છે.
વિકાસ ત્રિપાઠીએ દલીલ કરી હતી કે આ કેસ એક દખલપાત્ર ગુનો છે અને એફઆઈઆર નોંધવી જોઈએ. એડિશનલ ચીફ જ્યુડિશિયલ મેજિસ્ટ્રેટ (ACMM) વૈભવ ચૌરસિયાએ 11 સપ્ટેમ્બરના રોજ આપેલા આદેશમાં અરજી ફગાવી દીધી હતી. ACMM એ જણાવ્યું હતું કે મતદાર યાદી સંબંધિત મુદ્દાઓની તપાસ કરવી કોર્ટના અધિકારક્ષેત્રની બહાર છે અને તે બંધારણની કલમ 329નું ઉલ્લંઘન કરશે, કારણ કે બંધારણીય સંસ્થાઓને આવા મામલાઓની દેખરેખ રાખવાનો અધિકાર છે. પરિણામે વિકાસ ત્રિપાઠીએ કોર્ટમાં નવી અરજી દાખલ કરી અને સોનિયા ગાંધીને નોટિસ જારી કરવામાં આવી.
કોર્ટે સોનિયા ગાંધી પાસેથી જવાબ માંગ્યો
રાઉઝ એવન્યુ કોર્ટે સોનિયા ગાંધી અને દિલ્હી પોલીસને નાગરિકતા પ્રાપ્ત કર્યા વિના મતદાર યાદીમાં કથિત રીતે છેતરપિંડીથી નામોનો સમાવેશ કરવા બદલ દાખલ કરાયેલી સુધારણા અરજી પર જવાબ માંગવા માટે નોટિસ જારી કરી છે. અરજદારે જણાવ્યું હતું કે સોનિયા ગાંધીએ 30 એપ્રિલ, 1983 ના રોજ નાગરિકતા મેળવી હતી, જ્યારે તેમનું નામ 1980 ની મતદાર યાદીમાં સામેલ હતું.
અરજીમાં પ્રશ્ન ઉઠાવવામાં આવ્યો હતો કે 1980 માં નવી દિલ્હીની મતદાર યાદીમાં તેમનું નામ કેવી રીતે સામેલ થયું. 1982માં સોનિયા ગાંધીનું નામ મતદાર યાદીમાંથી કાઢી નાખવામાં આવ્યું હતું. તે શા માટે કાઢી નાખવામાં આવ્યું? અરજીમાં સવાલ ઉઠાવવામાં આવ્યા હતા કે 1980માં જ્યારે તેમણે 1983માં નાગરિકતા મેળવી ત્યારે મતદાર યાદીમાં તેમનું નામ સામેલ કરવા માટે કયા દસ્તાવેજોનો ઉપયોગ કરવામાં આવ્યો હતો. શું નકલી દસ્તાવેજોનો ઉપયોગ કરવામાં આવ્યો હતો?
