હિમાચલ પ્રદેશ: વડાપ્રધાન નરેન્દ્ર મોદી (PM Narendra Modi) આજે એટલે કે બુધવારે હિમાચલ પ્રદેશની (Himachal Pradesh) મુલાકાતે છે. મોદીએ કાંગડાના ચંબી મેદાનથી હિમાચલના લોકોને સંબોધિત કર્યા હતા. આ દરમિયાન પીએમ મોદીએ કોંગ્રેસ (Congress) પર અનેક વખત પ્રહાર કર્યા હતા. કોંગ્રેસને ભષ્ટાચારની (Corruption) પાર્ટી ગણાવી હતી. તેમજ કોંગ્રેસ દેશના વિકાસના કામમાં અવરોધનું કામ કરે છે તેમ પણ કહ્યું હતું.
હિમાચલમાં પીએમ મોદીએ હિમાચલવાસીઓનું સંબોધન કરતા કહ્યું કે હિમાચલ પ્રદેશમાં ‘ડબલ એન્જિન’વાળી સ્થિર અને મજબૂત સરકારની જરૂર છે. અને માત્ર ભાજપ સરકાર જ હિમાચલ પ્રદેશના લોકોને સ્થિરતા અને સુશાસન આપી શકે છે. કોંગ્રેસ હિમાચલ પ્રદેશમાં ક્યારેય સ્થિર સરકાર આપી શકતી નથી અને ઈચ્છતી પણ નથી. આખા દેશમાં કોંગ્રેસની સરકાર માત્ર બે-ત્રણ જગ્યાએ જ રહી ગઈ છે. અને શું તમે ક્યારેય તે સ્થળોએથી આવતા વિકાસના સમાચાર સાંભળ્યા છે? માત્ર અને માત્ર ઝઘડાના અહેવાલો છે. કોંગ્રેસમાં આજે પણ પરિવારનું શાસન ચાલુ છે. કોંગ્રેસ એટલે ભ્રષ્ટાચાર, કોંગ્રેસ એટલે વિકાસમાં અવરોધ. આવી સ્થિતિમાં આ સરકાર રાજ્યનો વિકાસ કેવી રીતે કરી શકે?
“જૂની પરંપરા બદલાઈ રહી છે, ભાજપ જીતી રહ્યું છે”
પીએમ મોદીએ કોંગ્રેસ પર પ્રહારો કર્યા અને કહ્યું કે જ્યારે કોંગ્રેસ કેન્દ્રમાં સત્તા પર હતી ત્યારે રાજ્ય સાથે “દગો” કરવાનો આરોપ પણ લગાવ્યો. રાજ્યમાં સૌથી વધુ વિધાનસભા બેઠકો કાંગડા જિલ્લામાં છે. અહીં રેલીને સંબોધતા વડાપ્રધાને કહ્યું કે આ વખતે ઉત્તરાખંડના લોકોએ પણ જૂની પરંપરા બદલી અને ભાજપને જીત અપાવી. ઉત્તર પ્રદેશમાં પણ 40 વર્ષ પછી એવું બન્યું છે કે જ્યારે કોઈ પાર્ટી ફરીથી જીતી અને સંપૂર્ણ બહુમતી સાથે સતત બીજી વખત સરકારમાં આવી હોય. મણિપુરમાં પણ ફરી ભાજપની સરકાર આવી છે. અને મને પૂરો વિશ્વાસ છે કે હિમાચલમાં ફરી એકવાર ભાજપની સરકાર આવશે. જો રાજ્યમાં કોંગ્રેસની સરકાર બનશે તો તે વિકાસને અવરોધશે.
“કોંગ્રેસ અસ્થિરતાની ખાતરી આપે છે”
પીએમ મોદીએ હિમાચલવાસીઓને કહ્યું કે અમે એવી રાજકીય પરંપરા બનાવવા માંગીએ છીએ કે અમે સરકારમાં એવા કામ કરીએ કે મતદારો અમને વારંવાર તક આપે. એટલા માટે અમે દરેક જગ્યાએ, દરેક સ્તરે વિકાસ અને દેશ માટે કામ કરી રહ્યા છીએ. પીએમ મોદીએ કહ્યું કે કોંગ્રેસ મતલબ અસ્થિરતાની ગેરંટી, આ સાથે જ પીએમ મોદીએ કોંગ્રેસ પર પ્રહાર કરતા કહ્યું કે કોંગ્રેસ એટલે ભ્રષ્ટાચાર, કૌભાંડની ગેરંટી અને કોંગ્રેસ એટલે વિકાસના કામોમાં અવરોધની ગેરંટી.
“અમે જે કહીએ છીએ તે કરીએ છીએ”
તમિલનાડુ, બિહાર, ઉત્તર પ્રદેશ અને પશ્ચિમ બંગાળના ઉદાહરણને આપીને પીએમ મોદીએ કહ્યું કે કોંગ્રેસ સામે લોકોમાં એટલો ગુસ્સો છે કે દાયકાઓથી કોંગ્રેસ ઘણા રાજ્યોમાં સત્તામાં પાછા ફરવાની તક મળી નથી. ઘણા રાજ્યોમાં સત્તામાં આવ્યા બાદ ભારતીય જનતા પાર્ટી (BJP)ની સરકારમાં વાપસીનો ઉલ્લેખ કરતા વડાપ્રધાને કહ્યું કે ભાજપ સુશાસન અને લોકોમાં ગરીબ તરફી નીતિઓ માટે ઓળખાય છે અને તેથી તે સરકારમાં આવે છે. તેમણે કહ્યું કે ભાજપ માત્ર જનતાને એટલું જ કહે છે કે જે તે કરી શકે છે અને ત્યાર બાદ ભાજપ તેના વચનો પૂરા કરવા માટે સંપૂર્ણ તાકાત લગાવે છે. મોદીએ કહ્યું કે અન્ય રાજકીય પક્ષોના મૂળ હજુ પણ પારિવારિક શાસન અને વોટ બેંકના રાજકારણમાં છે.
