નવી દિલ્હી: આ વર્ષે ચોમાસું (Monsoon) ભરપૂર રહ્યું છે. દેશના મોટા ભાગના રાજ્યોમાં સારો વરસાદ પડ્યો છે. ઘણા રાજ્યોમાં તો એટલો ધમધોકાર વરસાદ (Rain) પડ્યો કે લોકોએ પૂરનો સામનો કરવો પડ્યો છે. સામાન્ય રીતે ગણેશ ઉત્સવ બાદ સપ્ટેમ્બર મહિનાના અંતથી ધીમે ધીમે ચોમાસું વિદાય લેતું હોય છે, પરંતુ આ વર્ષે ઓક્ટોબર મહિનો અડધો પૂરો થયો છતાં દેશભરમાં વરસાદ વરસી રહ્યો છે. ઉત્તરના કેટલાંક રાજ્યોમાં ભારે વરસાદના લીધે પાણી ભરાઈ જવાની ઘટનાઓ હજુ પણ સામે આવી રહી છે ત્યારે હવામાન વિભાગની (Weather Department) આગાહીએ બધાને ચોંકાવી દીધા છે.
દેશના ઘણા રાજ્યોમાં આ દિવસોમાં હવામાન ઝડપથી બદલાઈ રહ્યું છે. ઉત્તર ભારતમાં લાંબા વરસાદ બાદ હળવી ઠંડી પડવા માંડી છે. પહાડો પર હિમવર્ષા શરૂ થઈ ગઈ છે. બીજી તરફ મેદાની રાજ્યોના ઘણા વિસ્તારો વરસાદની અસરથી લડી રહ્યા છે. યુપીના નીચાણવાળા વિસ્તારોમાં વરસાદના લીધે પાણી ભરાઈ રહ્યા છે અને નદીઓના જળસ્તરમાં વધારો થયો છે. દરમિયાન, દેશના કેટલાક રાજ્યો એવા છે જ્યાં વરસાદ સતત તબાહી મચાવી રહ્યો છે.
હવામાન વિભાગે ચેતવણી જારી કરી છે કે તામિલનાડુ, પુડુચેરી અને કરાઈકલ, કેરળ અને માહેમાં 17 ઓક્ટોબર સુધી વાવાઝોડું અને મધ્યમથી ભારે વરસાદ થઈ શકે છે. આ સિવાય 15 અને 17 ઓક્ટોબરે દક્ષિણ આંતરિક કર્ણાટક અને કોસ્ટલ કર્ણાટકમાં ભારે વરસાદની સંભાવના છે. આંદામાનમાં છૂટાછવાયા સ્થળોએ ભારેથી મધ્યમ વરસાદની સંભાવના છે. નિકોબાર ટાપુઓ પર 15 અને 17 ઓક્ટોબરે પણ હળવોથી મધ્યમ વરસાદ પડી શકે છે.
આ વિસ્તારોમાં શુષ્ક હવામાન રહેશે
હવામાનની આગાહી કરતી એજન્સી સ્કાયમેટ અનુસાર, પશ્ચિમ હિમાલય, પંજાબ, હરિયાણા, ઉત્તર પ્રદેશ, બિહાર, રાજસ્થાન, ગુજરાત અને મધ્યપ્રદેશ અને પશ્ચિમ બંગાળના મોટાભાગના વિસ્તારોમાં હવામાન સૂકું રહેવાની શક્યતા છે.
અહીં ભારે વરસાદની સંભાવના છે
તે જ સમયે, મધ્ય મહારાષ્ટ્ર, મરાઠવાડા, તેલંગાણા, કર્ણાટક, રાયલસીમા, તમિલનાડુના ભાગો, કેરળ અને આંદામાન અને નિકોબાર ટાપુઓ પર હળવાથી મધ્યમ વરસાદ સાથે છૂટાછવાયા ભારે વરસાદ થઈ શકે છે. દરિયાકાંઠાના ઓડિશા અને દક્ષિણ છત્તીસગઢમાં એક કે બે ભારે વરસાદ સાથે હળવોથી મધ્યમ વરસાદ પડી શકે છે.
આ વિસ્તારોમાં હળવો વરસાદ
ઓડિશા, વિદર્ભના ભાગો, ઉત્તર મધ્ય મહારાષ્ટ્ર, લક્ષદ્વીપ, આસામના ભાગો, અરુણાચલ પ્રદેશ, નાગાલેન્ડ અને મણિપુરમાં હળવાથી મધ્યમ વરસાદની શક્યતા છે. ઉત્તર છત્તીસગઢ, ગંગાના પશ્ચિમ બંગાળ અને ઝારખંડમાં એક કે બે સ્થળોએ હળવો વરસાદ પડી શકે છે.
