સુરત: જીવનમાં દરેક વ્યક્તિનો પોતાનો સંઘર્ષ હોય છે. તકલીફ આવે ત્યારે ઘણા લોકો કિસ્મત અને ભગવાનને દોષ દઈ હાથ પર હાથ મુકી બેસી રહે છે તો કેટલાંક મુઠ્ઠી ઊંચેરા માનવીઓ પરેશાનીઓને પરાસ્ત કરી સફળતાનો માર્ગ કંડારે છે. આવી જ કહાની છે સુરતના એક દિવ્યાંગ વિદ્યાર્થીની. એક હાથ વિના માત્ર અંગૂઠાથી પેપર લખી સુરતના દિવ્યાંગ વિદ્યાર્થીએ ધો. 10ની પરીક્ષા એ-1 ગ્રેડ સાથે પાસ કરી છે.
અડગ મનના માનવીને હિમાલય પણ નડતો નથી, તે કહેવતને સુરતના દિવ્યાંગ વિદ્યાર્થી મિતવા ભરતભાઈ સોડવડિયાએ સાચી સાબિત કરી છે. મિતવા મોટા વરાછાની સંસ્કારતીર્થ જ્ઞાનપીઠ શાળામાં ભણે છે. આજે જાહેર થયેલા ગુજરાત શિક્ષણ બોર્ડની ધો. 10ની પરીક્ષા મિતવાએ 95.83 પર્સન્ટાઈલ એ-1 ગ્રેડ સાથે પાસ કરી છે.
વીજકરંટ લાગતા મિતવાનો હાથ કાપવો પડ્યો હતો
મિતવા જન્મથી દિવ્યાંગ નહોતો. વર્ષ 2013માં મિતવાને વીજ કરંટ લાગ્યો હતો. આ ઘટનાને લીધે મિતવાનો જમણો હાથ કાપવો પડ્યો હતો. ડાબા હાથની ચાર આંગળીઓ પણ કાપવી પડી હતી. આમ મિતવા પાસે એક અંગુઠો જ હતો. હથેળીમાં એક માત્ર અંગૂઠો હોય તેમ છતાં મિતવાએ અંગૂઠા છાપ બની રહેવાનું પસંદ કર્યું નહીં. તેણે બોર્ડની પરીક્ષા આપી અને પાસ થયો.
મિતવાએ કહ્યું કે, દુર્ઘટનામાં જમણો હાથ કપાયો ત્યારે હતાશ થઈ ગયો હતો. પરિવાર અને શાળાએ સપોર્ટ કર્યો. વળી, હું પહેલાંથી ડાબોડી હતો. તેથી અંગૂઠાથી લખવાની પ્રેક્ટિસ કરી. હથેળીમાં એક પણ આંગળી નહીં હોય લખવામાં ખૂબ તકલીફ પડતી હતી, પરંતુ હાર્યા વિના પ્રેક્ટિસ કરતો રહ્યો. આંગળી નહીં હોય હથેળીથી પ્રેસર આપી અંગૂઠામાં પેન પકડી લખતો. ધો. 10ની પરીક્ષામાં લખવાની સ્પીડ જરૂરી હોય રોજ બે કલાક લખતો હતો. તેના લીધે રિવિઝન પણ થઈ જતું. અને કોઈ પણ લહિયા વિના ધો. 10 બોર્ડની પરીક્ષાના તમામ પેપર જાતે જ લખ્યાં.
ધો. 10 બોર્ડની પરીક્ષા એ-1 ગ્રેડ સાથે પાસ કરી દિવ્યાંગ મિતવાએ સાબિત કરી દીધું છે કે મક્કમ નિર્ધાર હોય તો કોઈ જ કાર્ય અશક્ય નથી. હવે મિતવાને કલેક્ટર બનવું છે અને તેને માટે તે મહેનત કરવા તૈયાર છે. નાની નાની સમસ્યાથી નાસીપાસ થઈ જનારાઓ માટે મિતવાનો કિસ્સો ખરેખર પ્રેરણાદાયી છે.
