બોલિવૂડ એક્ટર ગોવિંદાને પગમાં ગોળી વાગવાથી ઈજા થઈ છે. પિસ્તોલ સાફ કરતી વખતે તેમને પોતાની જ પિસ્તોલથી ગોળી વાગી ગઈ હતી. આ ઘટના મંગળવારે સવારે લગભગ 4.45 વાગ્યે બની હતી. ઓપરેશન બાદ તેમના પગમાંથી ગોળી કાઢી લેવામાં આવી છે. અભિનેતા હાલ ખતરાની બહાર છે. ઘટના બની ત્યારે ગોવિંદા ઘરમાં એકલા હતા. તેમની પાસે લાઇસન્સવાળી રિવોલ્વર છે. રિવોલ્વરથી ભૂલથી ગોળી નીકળી હતી જે તેમના પગમાં વાગી હતી. આ બાબતે કોઈ ફરિયાદ નોંધાઈ નથી.
સૂત્રોના જણાવ્યા અનુસાર ગોવિંદાને તેની રિવોલ્વર સાફ કરતી વખતે મિસફાયરને કારણે ગોળી વાગી હતી. મુંબઈ પોલીસ ઘટનાસ્થળે પહોંચી અને તેની રિવોલ્વર જપ્ત કરી લીધી છે. ગોળી વાગવાને કારણે તેમના પગમાંથી ઘણું લોહી વહી રહ્યું હતું. તેમને સારવાર માટે અંધેરીની કૃતિ કેર હોસ્પિટલમાં દાખલ કરવામાં આવ્યા છે. હોસ્પિટલ સાથે જોડાયેલા સૂત્રોના જણાવ્યા અનુસાર પ્રાથમિક સારવાર બાદ ગોવિંદા હવે ખતરાની બહાર છે. તેમની પુત્રી ટીના (નર્મદા) હાલમાં તેમની સાથે હોસ્પિટલમાં છે જ્યારે તેમની પત્ની સુનિતા કોલકાતામાં છે જ્યાં ગોવિંદાનો કાર્યક્રમ થવાનો હતો.
ડોક્ટરો અને ફેન્સને આભાર
દરમિયાન ગોવિંદાએ આ બાબતે પોતાનું નિવેદન આપ્યું છે. તેમણે કહ્યું કે તમારા આશીર્વાદથી હું ઠીક છું. ભૂલથી ગોળી નીકળી હતી જેને ઓપરેશન બાદ દૂર કરવામાં આવી છે. ડોકટરો અને તમારા બધાની પ્રાર્થનાઓ માટે આભાર.
એક કાર્યક્રમમાં હાજરી આપવા માટે કોલકાતા જવાના હતા
ગોવિંદાના મેનેજર શશિ સિન્હાએ જણાવ્યું કે તેઓ એક કાર્યક્રમ માટે કોલકાતા જઈ રહ્યા હતા. ફ્લાઇટ 6 વાગ્યાની હતી. પિસ્તોલ કબાટમાં રાખતી વખતે મિસ ફાયરિંગ થયું અને તેમને ઘૂંટણની નીચે ગોળી વાગી. તેમને તાત્કાલિક અંધેરીની હોસ્પિટલમાં લઈ જવામાં આવ્યા. ગોળી બહાર કાઢવામાં આવી છે. તેની હાલત ખતરાની બહાર છે. ગભરાવાની જરૂર નથી.
કાશ્મીરા ગોવિંદાને મળવા હોસ્પિટલ પહોંચી
ગોવિંદાના ભત્રીજા કૃષ્ણાની પત્ની કાશ્મીરા શાહ કૃતિ કેર હોસ્પિટલ પહોંચી છે. એક સમય એવો હતો જ્યારે કાશ્મીરા અને ગોવિંદાની પત્ની સુનીતા વચ્ચેની લડાઈ ચર્ચામાં હતી. ગોવિંદા અને કૃષ્ણા વચ્ચે વિવાદ ત્યારે શરૂ થયો જ્યારે 2018માં કૃષ્ણાની પત્ની કાશ્મીરા શાહે ટ્વીટ કર્યું હતું કે કેટલાક લોકો પૈસા માટે ડાન્સ કરે છે. આ ટ્વિટ પર સુનીતા આહુજાએ કહ્યું હતું કે આ ટ્વિટ ગોવિંદા વિરુદ્ધ કરવામાં આવી છે. આ પછી ગોવિંદા-સુનીતાએ કૃષ્ણા-કાશ્મીરા સાથેના તમામ સંબંધો ખતમ કરી દીધા.
