રોયલ ચેલેન્જર્સ બેંગ્લોર (RCB) ના સમર્થકોને મોટી રાહત મળી છે. કર્ણાટક રાજ્ય ક્રિકેટ એસોસિએશન (KSCA) ને કર્ણાટક સરકારના ગૃહ વિભાગ તરફથી બેંગલુરુના એમ. ચિન્નાસ્વામી સ્ટેડિયમમાં આંતરરાષ્ટ્રીય ક્રિકેટ અને ઇન્ડિયન પ્રીમિયર લીગ (IPL) મેચોનું આયોજન કરવા માટે સત્તાવાર મંજૂરી મળી ગઈ છે. KSCA ના પ્રમુખ બી.કે. વેંકટેશ પ્રસાદ કર્ણાટકમાં IPL પાછું લાવવા માટે સંપૂર્ણપણે પ્રતિબદ્ધ છે. તેમણે તમામ સુરક્ષા અને વહીવટી ચિંતાઓને દૂર કરવા માટે રાજ્ય સરકાર અને સંબંધિત અધિકારીઓ સાથે ઘણી મહત્વપૂર્ણ બેઠકો યોજી હતી.
બે દિવસ પહેલા જ RCB એ ચિન્નાસ્વામી સ્ટેડિયમમાં AI-આધારિત કેમેરા લગાવવાની જાહેરાત કરી હતી. આ કેમેરા દર્શકોની હિલચાલ અને ભીડ નિયંત્રણ પર વધુ સારી રીતે નજર રાખશે. આ પગલાને સ્ટેડિયમની મંજૂરીમાં એક મુખ્ય પરિબળ માનવામાં આવે છે. જો કે ચોક્કસ શરતો અને માર્ગદર્શિકા પૂર્ણ થયા પછી જ આ મંજૂરીનો સંપૂર્ણ અમલ કરવામાં આવશે. KSCA એ પહેલાથી જ નિષ્ણાત સમીક્ષા સમિતિને વિગતવાર પાલન રોડમેપ સબમિટ કરી દીધો છે જેમાં સુરક્ષા, ટ્રાફિક વ્યવસ્થાપન અને કટોકટી પ્રોટોકોલ સંબંધિત તમામ પાસાઓને આવરી લેવામાં આવ્યા છે.
KSCA ના સત્તાવાર પ્રવક્તા વિનય મૃત્યુંજયએ પુષ્ટિ આપી હતી કે એસોસિએશન સરકાર દ્વારા નક્કી કરાયેલી બધી શરતોને અત્યંત નિષ્ઠા અને ગંભીરતાથી લાગુ કરશે. KSCA ના પ્રમુખ પ્રસાદ ટૂંક સમયમાં એક પ્રેસ કોન્ફરન્સ યોજીને આ મંજૂરી સંબંધિત બધી વિગતો શેર કરે તેવી અપેક્ષા છે.
હવે મોટો પ્રશ્ન એ છે કે શું RCB IPL 2026 માં ચિન્નાસ્વામી સ્ટેડિયમમાં તેની બધી ઘરેલું મેચ રમશે કે કેટલીક મેચ શહેરની બહાર રમાશે. ફ્રેન્ચાઇઝ આગામી દિવસોમાં આ અંગે સ્પષ્ટતા કરે તેવી અપેક્ષા છે કારણ કે IPL 2026 ની શરૂઆતને ફક્ત બે મહિના બાકી છે. આ નિર્ણયથી ચિન્નાસ્વામી સ્ટેડિયમમાં IPL અને આંતરરાષ્ટ્રીય ક્રિકેટની વાપસીની આશા મજબૂત થઈ છે જેનાથી RCB ચાહકોમાં ભારે ઉત્સાહ ફેલાયો છે.
નોંધનીય છે કે 4 જૂનના રોજ બનેલી દુ:ખદ ઘટના બાદ જેમાં બાળકો સહિત 11 લોકોના મોત થયા હતા. ચિન્નાસ્વામી સ્ટેડિયમમાં તમામ ક્રિકેટ પ્રવૃત્તિઓ સ્થગિત કરવામાં આવી હતી. આના કારણે મહિલા વર્લ્ડ કપની મેચોને અન્ય સ્થળે ખસેડવાની ફરજ પડી. દરમિયાન IPL 2026 માટે RCB ને તેના ઘરેલું મેચો માટે નવી મુંબઈ અને રાયપુરને વૈકલ્પિક સ્થળો તરીકે ધ્યાનમાં લેવાની ફરજ પડી હતી.
