સુરત: (Surat) ડિંડોલીના આરડી નગરમાં મોડી રાત્રે સાડા નવ વાગ્યે ગેસનો (Gas leakage ) બાટલો લિકેજ રહી જતાં બ્લાસ્ટ (Blast) થયો હતો. આ ઘટનામાં મકાન માલિક સહિત સાત વ્યક્તિઓને નાની-મોટી ગંભીર ઇજા પહોંચતા તેઓને સિવિલમાં લઇ જવામાં આવ્યા હતા.
- રાત્રે સાડા નવ વાગ્યે મહિલા ગેસનો ચૂલો સળગાવવા ગઈ ત્યારે અચાનક બ્લાસ્ટ થયો,
- પાંચ કિલોના ગેસના બોટલમાં લીકેજ હોવાને કારણે આગ લાગ્યાનું અનુમાન, પ્રચંડ ધડાકાને કારણે પડોશીઓ પણ દોડી આવ્યા
પ્રાપ્ત વિગતો મુજબ ડિંડોલી નવાગામ પાસે આવેલા આરડી નગરમાં છોટેરામ બાલકિશન ચંદ્રવંશી, તેમની પત્ની સંતોષીદેવી, પુત્રો પવન, શ્રવણ અને સુમનકુમાર ઘરે હાજર હતા. આ દરમિયાન તેમના સંબંધીઓ શ્રવણ છોટેરામ, રાહુલ રાજદિપ પ્રસાદ, કંચન પવિત્રસિંગ ત્યાં આવ્યા હતા. રાત્રે સાડા નવ વાગ્યે સંતોષી દેવી ગેસ સિલિન્ડર શરૂ કરવા માટે ગઇ ત્યારે અચાનક બ્લાસ્ટ થયો હતો. રસોડામાં પડેલા પાંચ કિલોના ગેસના બોટલમાં લીકેજ રહી ગયું હતું અને સાતેય વ્યક્તિ ગંભીર રીતે દાઝી ગયા હતા. ધડાકો એટલો પ્રચંડ હતો કે, આજુબાજુના લોકો આવી ગયા હતા અને તેઓએ આગ ઉપર કાબુ મેળવ્યો હતો. આ મામલે પોલીસને જાણ કરવામાં આવતા પોલીસનો સ્ટાફ આવી પહોંચ્યો હતો. પોલીસે ઇજાગ્રસ્ત તમામને નવી સિવિલ હોસ્પિટલમાં મોકલી આપ્યા હતા. જ્યાં તેઓની તબિયત સારી હોવાનું ડોક્ટરોએ કહ્યું હતું.
ડિંડોલીના નવાગામમાં ગેસનો બાટલો લીક થતાં આગ : 7 દાઝી ગયા: તમામને નવી સિવિલ હોસ્પિટલમાં સારવાર માટે ખસેડાયા
પીડિત છોટેલાલ રામકિશોર રામે કહ્યું કે, અમે બિહારના વતની છે. બે દીકરા, ભાણેજ, પત્ની અને વૃદ્ધ સંબંધી સાથે એક જ રૂમમાં રહેતા હતા. શનિવારની સાંજે સાંજે 7:30 વાગે ગેસ લીકેજ થતા રૂમ બહાર મૂકી દીધી હતી. ત્યારબાદ સૂવાના સમય એ એટલે કે, રાત્રે 9:30 વાગે ગેસ લીકેજવાળી બોટલ ગેલેરીમાંથી રૂમમાં લાવતા જ ભડકા સાથે આગ પકડાય ગઈ હતી. અમારું આખું પરિવાર આગની ઝપેટમાં આવી ગયું હતું. આગ એટલી વિકરાળ હતી કે બાજુની રૂમમાં પણ આગ ફેલાઈ હતી. જોકે બાજુની રૂમમાં કોઈ દાઝ્યું ન હતું.
ઘટનાની જાણ બાદ પાડોશી અને ફળિયાવાસીઓ દોડી આવ્યા હતા. તાત્કાલિક 108ને ફોન કરી તમામને સિવિલ લઈ જવાયા હતા. ગેસ લીકેજવાળી બોટલ માંથી દુર્ગંધ આવી રહી હતી. બાજુના મકાનમાં સ્ટવ સળગાવતા જ આગ પકડાય ગઈ હતી. આગને ઓલાવવાની કોશિષ કરીએ એ પહેલાં આખો રૂમ ઝપેટમાં આવી ગયો હતો. વૃદ્ધ કંચનભાઈ અને રાહુલ અને હું એટલે છોટેલાલ ત્રણેય ગંભીર રીતે દાઝી ગયા છે. જેમની સિવિલમાં સારવાર ચાલી રહી છે.
