ઇંગ્લેન્ડના ભૂતપૂર્વ ક્રિકેટર રોબિન સ્મિથનું 62 વર્ષની વયે અવસાન થયું છે. સ્મિથે 1988 થી 1996 દરમિયાન ઇંગ્લેન્ડ માટે 62 ટેસ્ટ મેચ અને 71 વનડે રમી હતી. તેઓ 1992ના વર્લ્ડ કપમાં રનર-અપ ટીમ (ઇંગ્લેન્ડ)નો ભાગ હતા. તેમના પરિવારે તેમના નિધનની પુષ્ટિ કરી છે. આ દુઃખદ સમાચારથી ક્રિકેટ જગતમાં શોકનો માહોલ છવાઈ ગયો છે.
રોબિન સ્મિથની કારકિર્દીની વાત કરીએ તો તેમણે ઇંગ્લેન્ડ માટે 62 ટેસ્ટ મેચ રમી હતી. આ સમયગાળા દરમિયાન તેમણે 43.67 ની સરેરાશથી 4,236 રન બનાવ્યા હતા, જેમાં નવ સદીનો સમાવેશ થાય છે, જેમાંથી ત્રણ વેસ્ટ ઇન્ડીઝ સામે હતી. તેમનો સર્વોચ્ચ ટેસ્ટ સ્કોર 175 હતો જે તેમણે 1994માં વેસ્ટ ઇન્ડીઝ સામે બનાવ્યો હતો. સ્મિથે હેમ્પશાયરનું પ્રતિનિધિત્વ કરતા કાઉન્ટી ક્રિકેટ પણ રમ્યું હતું. સ્મિથે 2004માં ક્રિકેટના તમામ સ્વરૂપોમાંથી નિવૃત્તિ લીધી હતી અને ત્યારથી તેમનું માનસિક સ્વાસ્થ્ય બગડ્યું હતું.
રોબિન સ્મિથની ODI ફોર્મેટમાં ઐતિહાસિક ઇનિંગ
સ્મિથે 1993માં ઓસ્ટ્રેલિયા સામે ઐતિહાસિક ઇનિંગ રમી હતી. તેમણે અણનમ 167 રન બનાવ્યા હતા, જે આ ફોર્મેટમાં ઇંગ્લેન્ડના બેટ્સમેન દ્વારા સૌથી વધુ વ્યક્તિગત સ્કોર હતો. સ્મિથનો રેકોર્ડ 23 વર્ષ સુધી ટકી રહ્યો. 2016માં એલેક્સ હેલ્સે આ રેકોર્ડ તોડ્યો. ત્યારબાદ હેલ્સે 2016માં પાકિસ્તાન સામે 171 રન બનાવ્યા. ODIમાં તેમણે 71 મેચોમાં 70 ઇનિંગમાં 39.01 ની સરેરાશથી 2419 રન બનાવ્યા હતા.
રોબિન સ્મિથના પરિવાર દ્વારા જારી કરાયેલા એક નિવેદનમાં પુષ્ટિ આપવામાં આવી છે કે સ્મિથનું સોમવારે દક્ષિણ પર્થ સ્થિત તેમના એપાર્ટમેન્ટમાં અવસાન થયું. ઇંગ્લેન્ડ અને વેલ્સ ક્રિકેટ બોર્ડ (ECB) ના ચેરમેન રિચાર્ડ થોમ્પસને સ્મિથના નિધન પર શોક વ્યક્ત કર્યો. હેમ્પશાયર ક્રિકેટ ક્લબે પણ સ્મિથને શ્રદ્ધાંજલિ આપી. થોમ્પસને કહ્યું કે રોબિન સ્મિથ એક એવા ખેલાડી હતા જેમણે વિશ્વના કેટલાક ઝડપી બોલરો સાથે તાલમેલ રાખ્યો હતો અને પડકારજનક અભિગમ સાથે આક્રમક ઝડપી બોલિંગનો સામનો કર્યો હતો. તેમણે એવું એવી રીતે કર્યું જેનાથી અંગ્રેજી ચાહકોને ખૂબ ગર્વ થયો.
