કોકટેલ 2’નો કાઉન્ટડાઉન શરૂ! 18 માર્ચે થિયેટરમાં મળશે ખાસ ટ્રીટ
હોમી અડાજાણિયાની અપકમિંગ ફિલ્મ ‘કોકટેલ 2’ ફરી એકવાર ચર્ચામાં આવી ગઈ છે. શાહિદ કપૂર, રશ્મિકા મંદાના અને કૃતિ સેનનની મુખ્ય ભૂમિકાવાળી આ ફિલ્મનો ફર્સ્ટ લુક સોશિયલ મીડિયા પર સામે આવ્યો છે, જેને લઈને ફેન્સમાં ભારે ઉત્સાહ જોવા મળી રહ્યો છે. ખાસ વાત એ છે કે ફિલ્મનો ટીઝર 18 માર્ચે થિયેટરમાં જ રિલીઝ થશે અને તે પણ ‘ધુરંધર 2’ સાથે જોડાઈને દર્શાવવામાં આવશે
શાહિદ, રશ્મિકા અને કૃતિએ પોતાના સોશિયલ મીડિયા હેન્ડલ પર ફિલ્મના પોસ્ટર્સ શેર કર્યા છે. ત્રણેયે એકસરખું કેપ્શન લખ્યું કે, “વધુ માહિતી માટે આ બુધવારે, 18 માર્ચે થિયેટરમાં આવજો.” પોસ્ટર્સમાં ફિલ્મની ગ્લેમરસ અને યંગ વાઇબ સ્પષ્ટ દેખાઈ રહી છે, એક પોસ્ટરમાં ત્રિપુટી કારમાં બીચ વેકેશન પર નીકળી હોય એવું લાગી રહ્યું છે, જેનાથી ફિલ્મના મૂડને લઈને પણ ચર્ચા વધી છે.
રશ્મિકા સફેદ ડ્રેસ અને સનગ્લાસિસમાં ખૂબ જ સ્ટાઇલિશ દેખાઈ રહી છે, જ્યારે શાહિદ રંગીન શર્ટમાં સનસેટ બેકગ્રાઉન્ડ સાથે નજરે પડે છે. બીજી તરફ કૃતિનો પોસ્ટર પણ અલગ અંદાજમાં છે, જેમાં તેના પગ પર બનેલું “Catch the sea” ટેટૂ ખાસ ધ્યાન ખેંચે છે. હોમી અડાજાણિયાએ પણ પોસ્ટર્સ શેર કરીને સ્પષ્ટ લખ્યું કે ‘કોકટેલ 2’નો સ્નીક પીક 18 માર્ચે માત્ર થિયેટરમાં જ જોવા મળશે.
આ ફિલ્મ હોમી અડાજાણિયાની જ 2012ની હિટ ફિલ્મ ‘કોકટેલ’નો સીક્વલ છે. પહેલી ફિલ્મમાં સૈફ અલી ખાન, દીપિકા પાદુકોણ અને ડાયાના પેન્ટી જોવા મળ્યા હતા અને ફિલ્મને યુવા દર્શકો તરફથી જબરદસ્ત પ્રતિસાદ મળ્યો હતો. હવે સીક્વલમાં નવી સ્ટારકાસ્ટ સાથે ફરી એકવાર પ્રેમ, ગ્લેમર અને સંબંધોની ઉથલપાથલ જોવા મળશે એવી અટકળો છે.
અહેવાલો મુજબ ફિલ્મ 19 જૂને સિનેમાઘરોમાં રિલીઝ થશે. ફિલ્મમાં શાહિદ, રશ્મિકા અને કૃતિ વચ્ચે લવ ટ્રાયએંગલ જોવા મળી શકે છે તેવી ચર્ચા પણ ચાલી રહી છે. ફર્સ્ટ લુક બાદ સૌની નજર 18 માર્ચે થિયેટરમાં આવનારા ટીઝર પર ટકી ગઈ છે
