મેન્સ ક્રિકેટ એશિયા કપ શરૂ થાય તે પહેલા ભારતીય સ્ટાર ઓલરાઉન્ડર હાર્દિક પંડ્યા નવા લુકમાં જોવા મળ્યો છે. દુબઈ પહોંચ્યા પછી તેણે પોતાના વાળ રંગી લીધા છે. હાર્દિક આ નવી સ્ટાઇલમાં ખૂબ જ કૂલ લાગી રહ્યો છે. ચાહકો આ અંગે અલગ અલગ પ્રતિક્રિયાઓ આપી રહ્યા છે.
તમને જણાવી દઈએ કે ભારતીય ક્રિકેટ ટીમ આજે તા. 5 સપ્ટેમ્બરથી દુબઈમાં પ્રેક્ટિસ શરૂ કરી છે. સૂર્યકુમાર યાદવ, શિવમ દુબે, અભિષેક શર્મા સહિત મોટાભાગના ખેલાડીઓ ગુરુવારે દુબઈ પહોંચી ગયા હતા.
ગુરુવારે જ્યારે હાર્દિક પંડ્યા મુંબઈ એરપોર્ટ પર જોવા મળ્યો ત્યારે તે આ લુકમાં નહોતો, તેના વાળ પણ કાળા હતા. શુક્રવારે સવારે લગભગ 3-4 વાગ્યે હાર્દિક પંડ્યાએ તેના નવા લુકના ફોટા ઇન્સ્ટાગ્રામ પર શેર કર્યા.
એશિયા કપ માટે હાર્દિક પંડ્યાનો નવો લુક
ભારતીય ક્રિકેટ ટીમનો પહેલો મુકાબલો 10 સપ્ટેમ્બરે UAE સાથે છે અને બીજી મેચમાં તેનો સામનો પાકિસ્તાન સાથે થશે. ઓલરાઉન્ડર ખેલાડી હાર્દિક પંડ્યાએ આ પહેલા પોતાનો આખો લુક બદલી નાખ્યો છે. વાળ કાપવાની સાથે, તેણે તેને સંપૂર્ણપણે રંગી દીધા છે. તેણે પોતે ઇન્સ્ટાગ્રામ પર તેનો ફોટો શેર કર્યો છે અને કેપ્શનમાં લખ્યું છે, “NEW ME!.” હાર્દિકના ચાહકો પણ આ નવા લુકને પસંદ કરી રહ્યા છે, જોકે કેટલાક યુઝર્સ તેને છાપરી સ્ટાઇલ પણ કહી રહ્યા છે.
નવી હેરસ્ટાઇલ ચર્ચાનો વિષય બની
હાર્દિક પંડ્યા હંમેશા પોતાના ફેશનેબલ લુક અને સ્ટાઇલ માટે જાણીતા છે. આ વખતે તેણે સોશિયલ મીડિયા પ્લેટફોર્મ ઇન્સ્ટાગ્રામ પર પોતાની નવી તસવીરો શેર કરી છે, જેમાં તેની હેરસ્ટાઇલ સૌથી વધુ ચર્ચામાં છે. હાર્દિકે પોતાના વાળ સેન્ડી બ્લોન્ડ રંગથી રંગ્યા છે. ચાહકોને તેનો નવો લુક ખૂબ જ અલગ અને આકર્ષક લાગી રહ્યો છે, જોકે ઘણા લોકો તેને પહેલી નજરે ઓળખી શક્યા નહીં. પંડ્યાએ આ લુકમાં પોઝ આપતા ઘણા ફોટા પોસ્ટ કર્યા છે, જે હવે વાયરલ થયા છે.
હાર્દિક પંડ્યા ભારતનો મેચ વિનર ખેલાડી છે
ઓલરાઉન્ડર હાર્દિક પંડ્યા એશિયા કપ 2025 માં એક્સ-ફેક્ટર સાબિત થઈ શકે છે. તે એક સિનિયર ખેલાડી છે અને બોલિંગ, બેટિંગ તેમજ ફિલ્ડિંગમાં મહત્વપૂર્ણ યોગદાન આપે છે. તે નીચલા મધ્યમ ક્રમને મજબૂત બનાવે છે અને તેના બોલથી બેટ્સમેનોને પણ મુશ્કેલીમાં મૂકી શકે છે. હાર્દિકે ભારત માટે 114 આંતરરાષ્ટ્રીય T20 મેચોમાં 1812 રન બનાવ્યા છે અને 94 વિકેટ લીધી છે.
એશિયા કપ માટે ભારતનો કાર્યક્રમ
સૂર્યકુમાર યાદવ અને ટીમનો પહેલો મુકાબલો 10 સપ્ટેમ્બરે યુએઈ સાથે છે. ત્યારબાદ 14 સપ્ટેમ્બરે પાકિસ્તાન અને 19 સપ્ટેમ્બરે ઓમાન સાથે છે. એશિયા કપના ગ્રુપ બીમાં અફઘાનિસ્તાન, શ્રીલંકા, બાંગ્લાદેશ અને હોંગકોંગ છે. ગ્રુપ સ્ટેજમાં, બધી ટીમો એકબીજા સાથે 1-1 મેચ રમશે, ત્યારબાદ ટોચની 2 ટીમો સુપર-4માં પ્રવેશ કરશે અને અન્ય ટીમો બહાર થઈ જશે.
