રત્નકલાકારોની હડતાળ બાદ સુરતનું તંત્ર હરકતમાં આવ્યું છે. HVK ડાયમંડ કંપની સામે હવે કાયદેસરની કાર્યવાહી થવા માંડી છે. રત્નકલાકારોની હડતાળ બાદ મળેલી ફરિયાદોના પગલે ફેક્ટરી ઇન્સ્પેક્ટરે સ્થળ તપાસ કરી હતી. ફેક્ટરી પર કેટલીક ગંભીર ખામીઓ મળી આવતા ફેક્ટરી ઈન્સ્પેક્ટરે HVK કંપનીને તાત્કાલિક નોટિસ ફટકારી હતી.
ફેક્ટરી ઇન્સ્પેક્ટરે આરોપોની તપાસ માટે કંપનીની જગ્યાએ સરપ્રાઈઝ ચેકિંગ કર્યું હતું. તપાસ દરમિયાન જોવા મળ્યું કે રત્નકલાકારોને કાયદેસર હક્ક રજા મળતી નથી. રત્નકલાકારોના આરામ માટે કોઇ વિશિષ્ટ આરામગૃહ ઉપલબ્ધ નથી. ફાયર સેફટીની પૂરતી વ્યવસ્થા નથી. કામદારો માટે યોગ્ય ભોજન ખંડની સુવિધા નથી. રત્નકલાકારોએ મુશ્કેલીજનક પરિસ્થિતિમાં કામ કરવું પડી રહ્યું છે. એચવીકેની ફેક્ટરીમાં તાત્કાલિક સારવાર માટે પ્રથમોપચાર કેન્દ્ર પણ મોજૂદ નથી.
આ તમામ મુદ્દાઓ એક ફેક્ટરીના ફેક્ટરી અધિનિયમ મુજબ ફરજિયાત હોય છે. તેથી, ફેક્ટરી ઇન્સ્પેક્ટરે કંપનીને તાત્કાલિક આ તમામ સુવિધાઓ ઉપલબ્ધ કરાવવા માટે કડક નોટિસ ફટકારી છે. નોટિસમાં સ્પષ્ટ જણાવાયું છે કે જો નિર્ધારિત ગાળામાં આ ખામીઓ દૂર નહીં થાય, તો કંપની વિરુદ્ધ કાયદેસરની કાર્યવાહી હાથ ધરવામાં આવશે.
ડાયમંડ વર્કર યુનિયનના ઉપપ્રમુખ ભાવેશ ટાંકએ મીડિયા સાથે વાત કરતાં જણાવ્યું કે, અમે સમયસર અધિકારીઓને તમામ ફરિયાદો અને પુરાવાઓ આપ્યા હતા. આજે ફેક્ટરી ઇન્સ્પેક્ટરે અમારા પ્રશ્નો અંગે ગંભીરતાપૂર્વક કાર્યવાહી કરી છે, જે કામદારો માટે ન્યાયની આશા જગાવે છે. અમે માંગીએ છીએ કે તમામ રત્નકલાકારોને યોગ્ય અને અધિકાર મળે.
નોંધનીય છે કે રત્નકલાકારોની હડતાળ દરમ્યાન “ડાયમંડ વર્કર યુનિયન” દ્વારા ફેક્ટરીમાં કાર્યદશાની નબળી સ્થિતિ, કામદારોના હક્કો અને જીવનસાધન સુવિધાઓના અભાવ અંગે શક્ય તેટલી સરકારી એજન્સીઓને લેખિતમાં ફરિયાદ કરવામાં આવી હતી.
