જર્મનીના તમામ એરપોર્ટના કર્મચારીઓએ એક દિવસની હડતાળનું એલાન કર્યું છે. આ કારણે સોમવારે (ભારતીય સમય મુજબ) દેશભરમાં હવાઈ મુસાફરી ઠપ્પ થઈ ગઈ છે. હડતાળના પરિણામે દેશભરના 13 મુખ્ય એરપોર્ટ પર 3,400 ફ્લાઇટ્સ રદ કરવામાં આવી હતી, જેમાં ફ્રેન્કફર્ટ અને મ્યુનિક જેવા મુખ્ય એરપોર્ટનો સમાવેશ થાય છે. આના કારણે 5 લાખથી વધુ મુસાફરો પ્રભાવિત થયા છે.
દેશમાં 25 લાખ સરકારી કર્મચારીઓ ધરાવતા વર્ડી યુનિયને પગાર વધારાની માંગણી સાથે આ હડતાળનું એલાન આપ્યું હતું. જર્મન સમય મુજબ આ હડતાલ સોમવારથી શરૂ થવાની હતી પરંતુ તે રવિવારે નિર્ધારિત સમયના એક દિવસ પહેલા શરૂ કરવામાં આવી હતી. આ હડતાળમાં જાહેર વિભાગના કર્મચારીઓ, ગ્રાઉન્ડ સ્ટાફ અને સુરક્ષા ગાર્ડનો સમાવેશ થાય છે. આના કારણે મોટાભાગના જર્મન એરપોર્ટ પર વિમાનોની અવરજવર અટકી ગઈ હતી.
કામદાર યુનિયનની માંગ – પગારમાં 8% વધારો
કામદાર સંઘ એરપોર્ટ કર્મચારીઓ માટે 8% પગાર વધારો અથવા દર મહિને લઘુત્તમ 34,000 રૂપિયા (350 યુરો) પગાર વધારો કરવાની માંગ કરી રહ્યું છે. છેલ્લા ઘણા મહિનાઓથી કામદાર સંઘ કર્મચારીઓ માટે એક નવા કરાર પર વાટાઘાટો કરી રહ્યું હતું. આ કરાર હેઠળ માંગણીઓ કરવામાં આવી રહી હતી કે કોર્પોરેટ કામદારોની આરોગ્ય અને સલામતી વ્યવસ્થામાં સુધારો કરવામાં આવે, વધુ રજાઓ આપવામાં આવે, વાર્ષિક બોનસમાં 50% વધારો કરવામાં આવે અને કર્મચારીઓને તેમના નિયમિત અને ફરજિયાત તબીબી પરીક્ષણો માટે ડૉક્ટર પસંદ કરવાની સ્વતંત્રતા આપવામાં આવે.
રજાઓના કારણે મુસાફરોને વધુ મુશ્કેલીમાં મુકાયા
હેમ્બર્ગ એરપોર્ટના પ્રવક્તા કાત્જા બ્રોમે જણાવ્યું હતું કે ટ્રેડ યુનિયનનું વર્તન અપ્રમાણિક હતું. સોમવારે એરપોર્ટથી ઉપડવાની 143 ફ્લાઇટ્સ રદ કરવામાં આવી છે. આ હડતાળ કોઈપણ સૂચના વિના શરૂ કરવામાં આવી છે. તેમણે કહ્યું કે હાલમાં દેશમાં રજાઓનો સમય ચાલી રહ્યો છે જેના કારણે લોકોને ઘણી સમસ્યાઓનો સામનો કરવો પડી રહ્યો છે. સોમવાર સાંજથી એરપોર્ટ પર સામાન્ય કામગીરી ફરી શરૂ થવાની અપેક્ષા છે. બ્રોમે કહ્યું કે રવિવારના વિરોધથી હજારો મુસાફરો નારાજ થશે જેમને આ બાબત સાથે કોઈ લેવાદેવા નથી. દરમિયાન વર્ડી યુનિયનના પ્રવક્તાએ જણાવ્યું હતું કે અમે સ્વીકારીએ છીએ કે આ હડતાળ ઘણા લોકોને અસર કરશે પરંતુ સરકાર તરફથી વધુ સારી ઓફર મેળવવા માટે અમારે આ મુશ્કેલી ઊભી કરવી પડી.
