થોડા દિવસો પહેલાં સુરતના એક પોલીસ કર્મીએ ઝેર પીધા બાદ અર્ધબેહોશ થયેલી મહિલાને ખભા પર ઉંચકી દોડી પીસીઆર વાનમાં હોસ્પિટલ પહોંચાડી જીવ બચાવ્યો હતો, હવે ફરી એકવાર સુરત પોલીસની સતર્કતા અને માનવતાનું ઉદાહરણ જોવા મળ્યું છે.
સુરત કોર્ટ પાસે એક વૃદ્ધ દંપતીને અકસ્માત નડ્યો હતો. આ વૃદ્ધ દંપતી રસ્તા પર ઈજાગ્રસ્ત હાલતમાં કણસી રહ્યું હતું ત્યારે સુરતની એક મહિલા પોલીસ ઈન્સપેક્ટર સતર્કતા અને માનવતાનું ઉદાહરણ પુરું પાડી બંનેનો જીવ બચાવ્યો હતો.
સુરત કોર્ટ પાસે એક વૃદ્ધ દંપતી અકસ્માતનો ભોગ બનતાં સલાબતપુરા પોલીસ સ્ટેશનના પીઆઈ શીતલ એ. શાહે તત્કાળ સ્થળ પર દોડી ગયા હતા અને દંપતીને હોસ્પિટલ પહોંચાડયા હતા.
પ્રાપ્ત માહિતી અનુસાર કોર્ટ નજીક એક વૃદ્ધ દંપતીને અજાણ્યા વાહન દ્વારા અથડામણ થતાં બંને ગંભીર રીતે ઘાયલ થયા હતા. દંપતી રસ્તા પર પડી ગયેલાં હતાં અને આસપાસનાં લોકો એમ્બ્યુલન્સ માટે રાહ જોઈ રહ્યાં હતાં. તેવી ઘડીમાં પીઆઈ શીતલ એ. શાહ તેમના સ્ટાફ સાથે સ્થળ પર પહોંચ્યા અને કોઈપણ વિલંબ કર્યા વિના પોલીસ વાન રસ્તા પર ઉભી રાખીને દંપતીને ઉપાડી સીધા સિવિલ હોસ્પિટલ ખાતે ખસેડ્યાં.
પીઆઈ શીતલ શાહ સ્વયં હોસ્પિટલ સુધી આવ્યા અને ત્યાં દંપતીને સારવાર મળે તેની દેખરેખ રાખી. હોસ્પિટલ સ્ટાફ સાથે સંકલન કરીને તાત્કાલિક સારવાર શરૂ કરાવવામાં આવી. પ્રતિદર્શીઓ અને સ્થાનિક લોકોનું કહેવું છે કે, પોલીસ સામાન્ય રીતે ઘટના પછી આવે છે એવી માન્યતા હોય છે, પણ અહીં તો સલાબતપુરા પોલીસનો પ્રતિસાદ તરત મળી ગયો. પી.આઈ.શીતલ શાહની માનવતાપૂર્ણ કામગીરી સરાહનીય છે.
