રાજકોટ : સાયબર ગઠિયાઓએ રાજકોટ સેશન્સ કોર્ટના નિવૃત્ત આસિસ્ટન્ટ ક્લાર્ક અને તેના પત્નીને 45 દિવસ સુધી ડિજિટલ એરેસ્ટ કરીને 88 લાખની છેતરપિંડી કરી છે. આરોપીએ દિલ્હી ક્રાઇમ બ્રાન્ચ અધિકારીની ઓળખ આપીને મની લોન્ડરિંગ અને ડ્રગ્સના કેસમાં આખી જિંદગી જેલમાં રહેવાની વૃદ્ધ કપલને ધમકી આપીને ફસાવ્યા, તેમજ ગોલ્ડલોન લેવડાવીને પણ પૈસા ઉલેચ્યા હતાં. 69 વર્ષીય વૃદ્ધ દિનેશભાઈ દેલવાડિયાની ફરિયાદના આધારે સાયબર ક્રાઈમ પોલીસે આ મામલે તપાસ હાથ ધરીને ત્રણ આરોપીની ધરપકડ કરી છે.
ફરિયાદી દિનેશભાઇ જીવણભાઇ દેલવાડીયા (ઉ.વ.69)એ ફરિયાદમાં જણાવ્યું હતું કે, હું અને મારા પત્ની અનિતા સાથે રહીએ છીએ. હું રાજકોટ સેસન્સ કોર્ટમાં આસિસ્ટન્ટ કલાર્ક તરીકે નોકરી કરતો હતો, હાલ રીટાયર્ડ છું અને બોલબાલા ટ્રસ્ટમાં છેલ્લા 5 વર્ષથી કમિટી મેમ્બર તરીકે સેવા આપુ છું. ગત તા. 08 જુલાઈ, 2025ના રોજ હું તથા મારી પત્ની ઘરે હતાં. ત્યારે સવારના 8 વાગ્યા આસપાસ મને અજાણ્યા નંબર પરથી વોટ્સએપ કોલ આવ્યો હતો.
જેમાં સામેની વ્યક્તિએ જણાવ્યુ હતું કે, હું ટેલિફોન વિભાગમાંથી બોલું છું અને તમને 10 મિનિટ પછી દિલ્હી ક્રાઈમ બ્રાંચમાંથી સુનીલકુમાર ગૌતમનો ફોન આવશે, તમે તેની સાથે વાત કરી લેજો તેવું કહી ફોન કટ કરી દીધો હતો. 10 મિનિટ પછી એક અજાણ્યા વ્હોટ્સઅપ નંબરથી ફોન આવ્યો અને હું દિલ્હી ક્રાઈમ બ્રાંચમાથી બોલું છું તેમ કહી દિલ્હી ક્રાઈમ બ્રાંચમાં સંદીપ કુમાર જે ICICI બેંક મેનેજર હતાં, તેઓ વિરૂધ્ધ મની લોન્ડરિંગનો ગુનો દાખલ થયો છે અને સંદીપકુમારે જે ફ્રોડ કરેલ છે, તેમાથી તમને સંદિપકુમારે 10% હિસ્સો આપ્યો હોવાનું સુપ્રીમ કોર્ટમા નિવેદન આપ્યું છે. સાયબર ફ્રોડ કરનારે કહ્યું કે, સંદીપ કુમારના ઘરે રેઈડ કરતા આઠ મિલિયન રોકડ રકમ, 180 જુદી જુદી બેંકોની પાસબૂક, ડેબિટ કાર્ડ, ક્રેડિટ કાર્ડ, ચેકબૂકો તથા મોટા જથ્થાનું ડ્રગ્સ કબ્જે કરેલ છે. જેના હિસ્સેદાર તમે પણ છો અને આ કેસમાં તમને આખી જીંદગી જેલમાં રહેવું પડશે. તેમ કહી વૃદ્ધને મની લોન્ડરીંગ તથા ડ્રગ્સના કેસમાં ફીટ કરી દેવાની ધમકી આપી હતી.
