સુરત: ઝારખંડ (Zarkhand)ના રહેવાસી અને ઓએનજીસી (ONGC)માં સિક્યુરીટી ગાર્ડ (Security guard)તરીકે ફરજ બજાવતા બ્રેઈનડેડ શૈલેશ હરિહર સિંઘના પરિવારે ડોનેટ લાઈફ (Donate life)ના માધ્યમથી તેમના હૃદય, કિડની અને લિવરનું દાન કરી ચાર વ્યક્તિઓને નવજીવન (New life) બક્ષી માનવતાની મહેંક ફેલાવી સમાજને નવી દિશા બતાવી હતી.
શૈલેશ સિંઘને ગત 9 જુલાઈના રોજ રોડ અકસ્માતમાં મગજમાં ગંભીર ઈજા થતાં નવી સિવિલ હોસ્પિટલ ખાતે દાખલ કરવામાં આવ્યા હતાં. જ્યાંથી વધુ સારવાર માટે સનસાઈન ગ્લોબલ હોસ્પિટલમાં દાખલ કરાયાં હતાં. થોડા દિવસની સારવાર બાદ ગત 16 જુલાઈના રોજ ડોક્ટરોએ તેમને બ્રેઈનડેડ જાહેર કર્યા હતાં. તેમની પત્ની સીમા અને તેના ભાઈઓએ તેમના અંગદાનનો નિર્ણય લીધો હતો. શૈલેશ તેમનું હદય, બે કિડની અને લિવરનું દાન ડોનેટ લાઈફના માધ્યમથી કરવામાં આવ્યું હતું. જેના દ્વારા ચાર જરૂરિયાતમંદ દર્દીઓને નવજીવન મળ્યું છે. હ્રદય, કિડની અને લિવર સમયસર અમદાવાદ પહોંચાડવા માટે બે ગ્રીન કોરીડોર બનાવવામાં આવ્યા હતા. જેમાં સુરત શહેર પોલીસ તેમજ રાજ્યના વિવિધ શહેર અને ગ્રામ્ય પોલીસનો સહકાર મળ્યો હતો.
હ્દય 80 મિનિટમાં સુરતથી અમદાવાદ પહોંચ્યું
સુરતથી અમદાવાદનું 285 કિલોમીટરનું અંતર 80 મિનીટમાં કાપીને હૃદયનું ટ્રાન્સ પ્લાન્ટ જામ ખંભાળિયાના રહેવાસી 22 વર્ષીય યુવકમાં અમદાવાદની સીમ્સ હોસ્પીટલમાં કરવામાં આવ્યું હતું. આ યુવક છેલ્લા બે વર્ષથી હૃદયની બીમારીથી પીડાતો હતો. અને છેલ્લા ત્રણ મહિનાથી તેના હૃદયનું પમ્પિંગ 5 ટકા થી 10 ટકા જેટલું થઇ ગયું હતું.
કિડનીના દાનથી બે ને નવજીવન મળ્યું
સુરતની સનશાઈન ગ્લોબલ હોસ્પિટલથી અમદાવાદની ઇન્સ્ટિટ્યુટ ઓફ કિડની ડિસીઝ એન્ડ રિસર્ચ સેન્ટર હોસ્પિટલ સુધીનું 271 કિલોમીટર અંતર 240 મીનીટમાં કાપીને દાનમાં મેળવવામાં આવેલા લિવરનું ટ્રાન્સપ્લાન્ટ રાજકોટના રહેવાસી 41 વર્ષીય વ્યક્તિમાં ડૉ.પ્રાંજલ મોદી અને તેમની ટીમ દ્વારા કરવામાં આવ્યું છે. જયારે દાનમાં મેળવવામાં આવેલી બીજી કિડનીનું ટ્રાન્સપ્લાન્ટ અમદાવાદની કે.ડી. હોસ્પીટલમાં જરૂરિયાતમંદ દર્દીઓમાં કરવામાં આવ્યું હતું.
કોરોના કાળમાં છેલ્લા દોઢ મહિનામાં કુલ 31 અંગોનું દાન કરાયું
કોવિડ 19 ની મહામારીની બીજી લહેર પછી આખા દેશમાં અંગદાનનું પ્રમાણ ખુબજ ઓછું છે. ત્યારે ડોનેટ લાઈફ દ્વારા છેલ્લા દોઢ મહિનામાં છ બ્રેઈનડેડ વ્યક્તિઓના પરિવારજનો સાથે સમજણ કેળવી 3 હૃદય, 2 ફેફસાં, 12 કિડની, 6 લિવર અને 8 ચક્ષુઓ સહીત કુલ 31 અંગો અને ટીસ્યુઓના દાન મેળવી દેશના વિવિધ રાજ્યોના કુલ 30 ઓર્ગન નિષ્ફળતાના દર્દીઓને નવું જીવન આપવામાં સફળતા મળી છે.
માત્ર દક્ષિણ ગુજરાતે 833 નવજીવન અને નવી દ્રષ્ટી બક્ષી છે
સુરત અને દક્ષિણ ગુજરાતમાંથી ડોનેટ લાઈફ દ્વારા 394 કિડની, 163 લિવર, 8 પેન્ક્રીઆસ, 34 હૃદય, 14 ફેફસાં અને 294 ચક્ષુઓ કુલ 905 અંગો અને ટીસ્યુઓનું દાન મેળવીને 833 વ્યક્તિઓને નવુજીવન અને નવી દ્રષ્ટી બક્ષવામાં સફળતા મળી છે.
