પ્રયાગરાજના મહા કુંભના મેળામાં માળા વેચનારી અને વાયરલ થયેલી છોકરી મોનાલિસાને ફિલ્મમાં કામ આપવાની ઓફર કરનારા દિગ્દર્શક સનોજ મિશ્રાની દિલ્હી પોલીસે કેસમાં ધરપકડ કરી છે. દિલ્હી હાઈકોર્ટ દ્વારા તેમની જામીન અરજી ફગાવી દેવામાં આવ્યા બાદ નબી કરીમ પોલીસ સ્ટેશને આ કાર્યવાહી કરી છે. સનોજ મિશ્રા પર ઝાંસીની એક યુવતીનું ફિલ્મોમાં કામ આપવાનું વચન આપીને જાતીય શોષણ કરવાનો આરોપ છે અને પછી ધમકીઓ આપીને તેને ચૂપ રાખવાનો આરોપ છે.
પીડિતાના જણાવ્યા મુજબ તે 2020 માં ટિકટોક અને ઇન્સ્ટાગ્રામ દ્વારા સનોજ મિશ્રાને મળી હતી. તે સમયે તે ઝાંસીમાં રહેતી હતી. થોડા સમય વાતો કર્યા પછી 17 જૂન, 2021 ના રોજ સનોજે તેણીને ફોન કર્યો અને કહ્યું કે તે ઝાંસી રેલ્વે સ્ટેશન પર પહોંચી ગયો છે.
પીડિતાએ તેને મળવાનો ઇનકાર કર્યો હતો પરંતુ સનોજે આત્મહત્યા કરવાની ધમકી આપી હતી. ડરથી તે તેને મળવા ગઈ. બીજા દિવસે 18 જૂન, 2021 ના રોજ સનોજે ફરીથી તેણીને આત્મહત્યા કરવાની ધમકી આપીને રેલ્વે સ્ટેશન પર બોલાવી અને ત્યાંથી તેણીને એક રિસોર્ટમાં લઈ ગયો જ્યાં તેણે તેણીને ડ્રગ્સ આપીને તેના પર બળાત્કાર ગુજાર્યો હતો.
પીડિતાએ પોતાની FIRમાં જણાવ્યું છે કે સનોજે તેના વાંધાજનક ફોટોગ્રાફ્સ અને વીડિયો બનાવ્યા હતા અને જો તે વિરોધ કરશે તો તેને જાહેર કરવાની ધમકી આપી હતી. ત્યાર બાદ લગ્નના બહાને સનોજે તેણીને ઘણી વખત અલગ અલગ જગ્યાએ બોલાવી તેની સાથે શારીરિક સંબંધો બાંધ્યા અને ફિલ્મોમાં કામ અપાવવાનું વચન આપીને તેને લલચાવી. આ આશા સાથે પીડિતા મુંબઈ ગઈ અને સનોજ સાથે રહેવા લાગી. ત્યાં પણ સનોજે તેનું શોષણ કરવાનું ચાલુ રાખ્યું અને ઘણી વખત તેને માર માર્યો.
પીડિતાનો આરોપ છે કે સનોજે તેને ત્રણ વાર ગર્ભપાત કરાવવા માટે દબાણ કર્યું હતું. ફેબ્રુઆરી 2025 માં સનોજે તેને છોડી દીધી અને જો તેણી ફરિયાદ કરશે તો તેના અશ્લીલ ફોટા અને વીડિયો સોશિયલ મીડિયા પર વાયરલ કરવાની ધમકી આપી હતી.
દિલ્હી પોલીસે પીડિતાની ફરિયાદ પર સનોજ મિશ્રા વિરુદ્ધ કેસ નોંધ્યો હતો. તપાસ બાદ તેની ધરપકડ કરવામાં આવી હતી. સનોજે જામીન માટે દિલ્હી હાઈકોર્ટનો સંપર્ક કર્યો હતો પરંતુ કોર્ટે તેની અરજી ફગાવી દીધી હતી. ત્યાર બાદ પોલીસે તેને કસ્ટડીમાં લીધો. આ મામલો ત્યારે વધુ ચર્ચામાં આવ્યો જ્યારે સનોજનું નામ મહાકુંભ મેળાની વાયરલ ગર્લ મોનાલિસા સાથે જોડાયું જેને તેણે પોતાની ફિલ્મ ‘ધ મણિપુર ડાયરી’માં કાસ્ટ કરવાનો દાવો કર્યો હતો. પોલીસ હવે આ મામલાની તપાસ કરી રહી છે.
