અમદાવાદ: રાજ્યની વિવિધ ઇજનેરી અને ફાર્મસી સંસ્થાઓમાં ત્રીજા સેમેસ્ટરના સીધા પ્રવેશ માટે લાયક ડિપ્લોમા ઇજનેરી અને ફાર્મસીના ઉમેદવારો માટે ડિપ્લોમા ટુ ડિગ્રી કોમન એન્ટ્રન્સ ટેસ્ટ માટેની ઓનલાઈન રજિસ્ટેશન પ્રક્રિયાનો આજથી પ્રારંભ થયો છે.
ડિપ્લોમા ઇજનેરી અને ફાર્મસી પછીના ડિગ્રી ઇજનેરી અને ફાર્મસી અભ્યાસક્રમના શૈક્ષણિક વર્ષ 2026- 27માં બીજા વર્ષમાં પ્રવેશ માટે સંપૂર્ણ ઓનલાઇન પ્રક્રિયા હાથ ધરવામાં આવનાર છે. જેની રજિસ્ટ્રેશન કાર્યવાહી આજથી તા 30મી માર્ચ 2026 સુધી ચાલશે. ડિપ્લોમાથી ડિગ્રી કોમન એન્ટ્રસ ટેસ્ટ માટે રાજ્યની 16 સરકારી સંસ્થાઓ, 3 અનુદાનિત સંસ્થાઓ અને 120 સ્વનિર્ભર સંસ્થાઓ પર પ્રવેશ કાર્યવાહી કરવામાં આવશે. જેમાં 16 સરકારી સંસ્થાઓ અને 3 અનુદાનિત સંસ્થાઓની 2068 બેઠકો તથા 120 નિર્ભર સંસ્થાઓની 34,144 બેઠકો એમ કુલ 36,212 બેઠકો ઉપર કાર્યવાહી કરવામાં આવશે.
હાલના તબક્કે ઉમેદવારો ફક્ત પાસપોર્ટ ફોટો, સાઇન, અને છેલ્લા સેમેસ્ટરની ઉપલબ્ધ માર્કશીટને અપલોડ કરીને રજીસ્ટ્રેશન પ્રક્રિયા પૂર્ણ કરી શકે છે. કેટેગરીના ડોક્યુમેન્ટ તેઓ પ્રવેશ કાર્યવાહી વખતે જમા કરી શકશે. ડિપ્લોમાથી ડિગ્રી કોમન એન્ટર ટેસ્ટ માટે ઓનલાઇન રજિસ્ટ્રેશન પ્રક્રિયા આજથી શરૂ થઈ છે. ઓનલાઇન રજિસ્ટ્રેશન અને રજિસ્ટ્રેશન ફી ભરવાની છેલ્લી તારીખ 30 માર્ચ સાંજે 5:00 વાગ્યા સુધી રહેશે. રજિસ્ટ્રેશનની પ્રક્રિયા પૂર્ણ કરવા માટે ઉમેદવાર સંબંધિત ડોક્યુમેન્ટ અપલોડ કરીને અને રજિસ્ટ્રેશન ફી (નોન રિફન્ડેબલ) રૂ. 250 ફક્ત ઓનલાઇન માધ્યમથી ભરવાની રહેશે, ત્યારે જ રજિસ્ટ્રેશન પૂર્ણ થયેલું ગણાશે. કોઈપણ ઉમેદવારે ડોક્યુમેન્ટ રૂબરૂ આપવાના અથવા તેની રૂબરૂ ચકાસણી કરાવવાની જરૂર નથી. રજિસ્ટ્રેશન માટેની સંપૂર્ણ પ્રક્રિયા ઓનલાઇન જ કરવામાં આવે છે.
