ભાજપે સોમવારે ઉપરાજ્યપાલને પત્ર લખીને ‘શીશ મહેલ’ સાથે મર્જ થયેલી અન્ય મિલકતોને રદ કરવાની વિનંતી કરી છે. પ્રદેશ પ્રમુખ વીરેન્દ્ર સચદેવાએ જણાવ્યું હતું કે ચાર સરકારી મિલકતોને મર્જ કરીને ‘શીશમહેલ’નો વિસ્તાર કરવામાં આવ્યો છે. તમને જણાવી દઈએ કે તાજેતરની વિધાનસભા ચૂંટણી દરમિયાન ભ્રષ્ટાચારના મુદ્દા પર અરવિંદ કેજરીવાલને ઘેરવા માટે ભાજપ દ્વારા ‘શીશમહેલ’નો ઉપયોગ રાજકીય હથિયાર તરીકે કરવામાં આવ્યો હતો.
અમારા મુખ્યમંત્રી આ બંગલામાં નહીં રહે
સચદેવાએ કહ્યું કે અમારી સરકાર બન્યા પછી આ બંગલાનો ઉપયોગ કેવી રીતે કરવો તે નક્કી કરશે. પણ અમારા મુખ્યમંત્રી આ ઘરમાં નહીં રહે. એ વાત જાણીતી છે કે આ બંગલો 2015 થી ઓક્ટોબર 2024 સુધી દિલ્હીના મુખ્યમંત્રી તરીકે અરવિંદ કેજરીવાલનું સત્તાવાર નિવાસસ્થાન હતું. પરંતુ કેજરીવાલે મુખ્યમંત્રી પદ પરથી રાજીનામું આપ્યા બાદ તે ખાલી કરી દીધું હતું.
બંગલાની તપાસ ચાલી રહી છે
રોહિણીથી નવા ચૂંટાયેલા ભાજપ ધારાસભ્ય અને ભૂતપૂર્વ વિપક્ષી નેતા વિજેન્દ્ર ગુપ્તાએ જણાવ્યું હતું કે ભાજપના મુખ્યમંત્રી બંગલામાં રહેશે નહીં કારણ કે તે કથિત અનિયમિતતાઓની તપાસ હેઠળ છે. તેમણે કહ્યું કે અલાયદી મિલકતોની જમીનનો ઉપયોગ સરકારી રહેઠાણોના બાંધકામ જેવા અન્ય સત્તાવાર હેતુઓ માટે કરવામાં આવશે.
જણાવી ગઈએ કે ભાજપે કેજરીવાલ પર ‘શીશમહેલ’ના નિર્માણ અંગે બે વર્ષ સુધી ભ્રષ્ટાચારનો આરોપ લગાવ્યો હતો. ભાજપનો આરોપ છે કે કેજરીવાલે ગેરકાયદેસર રીતે તેનું પુનર્નિર્માણ કરાવ્યું. કોરોના સમયગાળા દરમિયાન તેના બાંધકામમાં ઘણા પૈસા ખર્ચવામાં આવ્યા હતા. મોંઘા પડદા અને ફર્નિચર લગાવવામાં આવ્યા હતા. લેફ્ટનન્ટ ગવર્નરને લખેલા પત્રમાં કહેવામાં આવ્યું છે કે કેજરીવાલે પડોશી સરકારી મિલકત પર ગેરકાયદેસર કબજો કરીને બંગલાને ખૂબ જ વૈભવી શીશ મહેલમાં રૂપાંતરિત કરી દીધો છે.
