સુરત: (Surat) સુરત શહેરમાં પાંચ દિવસથી સતત વાદળછાયું વાતાવરણ સર્જાતાં જાણે હિલ સ્ટેશન જેવો માહોલ સર્જાયો છે. હવામાન વિભાગે આગામી ૨૪ કલાકમાં વેસ્ટર્ન ડિસ્ટર્બન્સની અસર ઘટતાં આકાશમાં સંપૂર્ણ ઉઘાડ દેખાય તેવી સંભાવના વ્યક્ત કરી છે.
હવામાન વિભાગના જણાવ્યા મુજબ અરબ સાગર પર ગયા અઠવાડિયે બે વેસ્ટર્ન ડિસ્ટર્બન્સને પગલે વાતાવરણમાં એકાએક પલટો જોવા મળ્યો હતો. હવે વેસ્ટર્ન ડિસ્ટર્બન્સની અસર ઘટતાં મંગળવારે બપોરે વાદળો દૂર થતાં સૂર્યનારાયણ દેખાયા હતા. આગામી ૨૪ કલાક બાદ શહેરમાં આકાશ સંપૂર્ણ ઉઘાડ લે તેવી સંભાવના હવામાન વિભાગે વ્યક્ત કરી છે. જો કે, હજી પણ પંજાબ ઉપર એક વેસ્ટર્ન ડિસ્ટર્બન્સ હોવાથી તેની અસર આગામી એક-બે દિવસમાં દક્ષિણ ગુજરાતમાં જોવા મળશે.
શહેરમાં મંગળવારે મહત્તમ તાપમાન અડધા ડિગ્રી વધારા સાથે ૨૬.૬ ડિગ્રી સેલ્સિયસ નોંધાયું હતું. જ્યારે લઘુત્તમ તાપમાન ૧૭.૨ ડિગ્રી સેલ્સિયસ યથાવત રહેવા પામ્યું છે. શહેરમાં મંગળવારે હવામાં ૪૪ ટકા ભેજની સાથે આઠ કિલોમીટર પ્રતિ કલાક ઉત્તરનો પવન ફુંકાયો હતો. મંગળવારે ફરી પવનની દિશા બદલાતાં ઉત્તરની થતાં હવામાન વિભાગે આગામી બે દિવસ બાદ લઘુત્તમ તાપમાનમાં ઘટાડો થવાની આગાહી કરી છે. જેના પગલે ફરી રાત્રે ઠંડીનો ચમકારો અનુભવાશે.
રાજ્યમાં બીજા દિવસે પણ ધુમ્મસ વચ્ચે કમોસમી વરસાદ
ગાંધીનગર: રાજ્યમાં (State) મંગળવારે બીજા દિવસે પણ સવારથી જ વાતાવરણમાં પલટો જોવા મળ્યો હતો. અમદાવાદ સહિત ઉત્તર ગુજરાતનાં કેટલાંક શહેરોમાં ધુમ્મસભર્યું વાતાવરણ જોવા મળ્યું હતું. જ્યારે ઉત્તર ગુજરાતના (Gujarat) ડિસા સહિતના આસપાસના વિસ્તારોમાં રાત્રિના સમયે કમોસમી વરસાદ (Rain) નોંધાયો હતો. મંગળવારે રાજ્યમાં સૌથી વધુ ઠંડી (Cold) 7.8 ડિગ્રી નોંધાઈ હતી.
હવામાન ખાતાનાં સૂત્રોના જણાવ્યા પ્રમાણે રાજ્યના ઉત્તર ગુજરાત, સૌરાષ્ટ્ર સહિતના કેટલાક વિસ્તારોમાં આગામી દિવસોમાં ઠંડી વધે તેવી સંભાવના છે. હવામાન ખાતાનાં સૂત્રોના જણાવ્યા પ્રમાણે રાજ્યનાં અન્ય શહેરોમાં અમદાવાદમાં 13.5 ડિગ્રી., ડીસામાં 11.6 ડિગ્રી., ગાંધીનગરમાં 12.0 ડિગ્રી., વડોદરામાં 16.0 ડિગ્રી., સુરતમાં 17.2 ડિગ્રી., વલસાડમાં 11.5 ડિગ્રી., અમરેલીમાં 11.2 ડિગ્રી., ભાવનગરમાં 14.6 ડિગ્રી., રાજકોટમાં 10.7 ડિગ્રી., સુરેન્દ્રનગરમાં 12.0 ડિગ્રી., ભુજમાં 11.0 ડિગ્રી. અને નલિયામાં 7.8 ડિગ્રી. ઠંડી નોંધાઈ હતી.
નવસારી જિલ્લામાં એક જ દિવસમાં લઘુત્તમ તાપમાનમાં એક ડિગ્રીનો ઘટાડો થવા સાથે કલાકે 5.5 કિલોમીટરની ઝડપે પવન ફૂંકાતા રહેતા આખો દિવસ ઠંડીનો માહોલ જામ્યો હતો. સોમવારે સૂર્ય નારાયણે સંતાકૂકડી રમ્યા બાદ મંગળવારે સૂરજ દાદા આખો દિવસ મહેરબાન રહ્યા હતા. પરંતુ આજે વરૂણદેવે મહેર કરતાં આખો દિવસ ઠંડીનો માહોલ સર્જાયો હતો. લોકોએ દિવસ દરમ્યાન પણ ગરમ કપડાં પહરેવા પડ્યા હતા.
