પશ્ચિમ બંગાળમાં ભારે વરસાદ બાદ શનિવારે રાત્રે દાર્જિલિંગમાં સાત સ્થળોએ ભૂસ્ખલન થયું. મિરિક-સુખિયાપોખરી રોડ પર ઢાળ પરનો એક ભાગ તૂટી પડ્યો જેના કારણે અનેક ઘરો ધરાશાયી થયા. અત્યાર સુધીમાં 17 લોકોના મોત થયા છે. ભૂસ્ખલનને કારણે રસ્તા પર કાટમાળ બચાવ કામગીરીમાં અવરોધ ઉભો કરી રહ્યો છે. નજીકના અનેક વિસ્તારોમાં વાહનોની અવરજવર અને સંદેશાવ્યવહાર ખોરવાઈ ગયો છે. મિરિકમાં એક લોખંડનો પુલ પણ તૂટી પડ્યો છે.
ભારે વરસાદને કારણે તીસ્તા નદીમાં પૂર આવ્યું છે. તીસ્તા બજાર નજીક બાલુખોલામાં પૂરને કારણે સિલિગુડીને સિક્કિમ અને કાલિમપોંગ સાથે જોડતો હાઇવે સંપૂર્ણપણે બંધ થઈ ગયો છે. દાર્જિલિંગ શહેરના ઘણા ભાગો પણ કપાઈ ગયા છે. દાર્જિલિંગમાં ભૂસ્ખલનને કારણે ઘણા ઘરો કાટમાળમાં ફેરવાઈ ગયા છે અને મુખ્ય રસ્તાઓને નુકસાન થયું છે. દરમિયાન અધિકારીઓએ એ પણ અહેવાલ આપ્યો છે કે ઘણા દૂરના ગામોનો સંપર્ક સંપૂર્ણપણે કપાઈ ગયો છે.
અધિકારીઓએ જણાવ્યું હતું કે મૃત્યુઆંક વધી શકે છે કારણ કે ઘણા વિસ્તારોમાં શોધ અને બચાવ કામગીરી હજુ પણ ચાલુ છે. સમાચાર એજન્સી પીટીઆઈ અનુસાર ઉત્તર બંગાળ વિકાસ મંત્રી ઉદયન ગુહાએ પરિસ્થિતિને ચિંતાજનક ગણાવી. તેમણે કહ્યું કે સ્થાનિક અધિકારીઓ પાસેથી મળેલી માહિતી અનુસાર અત્યાર સુધીમાં 17 લોકોના મોત થયા છે. એએફપીના અહેવાલ મુજબ 20 લોકોના મોત થયા છે.
દાર્જિલિંગમાં જિલ્લા વહીવટીતંત્ર પોલીસ અને આપત્તિ વ્યવસ્થાપન ટીમો દ્વારા રાહત અને બચાવ કામગીરી હાથ ધરવામાં આવી રહી છે જ્યારે સૌથી વધુ અસરગ્રસ્ત વિસ્તારોમાંના એક મિરિક તળાવ વિસ્તારમાં એનડીઆરએફને તૈનાત કરવામાં આવી છે.
પીએમ મોદીએ X પર લખ્યું કે સત્તાવાળાઓ દાર્જિલિંગ અને આસપાસના વિસ્તારોમાં ભારે વરસાદ અને ભૂસ્ખલન પર નજીકથી નજર રાખી રહ્યા છે. મારી સંવેદનાઓ અસરગ્રસ્ત પરિવારો સાથે છે. હું ઘાયલોના ઝડપથી સ્વસ્થ થવાની કામના કરું છું. રાષ્ટ્રપતિ દ્રૌપદી મુર્મુએ કહ્યું, “પશ્ચિમ બંગાળના દાર્જિલિંગમાં ભૂસ્ખલનથી થયેલા જાનહાનિ ખૂબ જ દુઃખદ છે. હું પીડિતોના પરિવારો પ્રત્યે મારી સંવેદના વ્યક્ત કરું છું.”
