ચક્રવાત મોન્થાએ મંગળવારે રાત્રે આંધ્રપ્રદેશના દરિયાકાંઠાના વિસ્તારોમાં તબાહી મચાવી દીધી. એક ગંભીર ચક્રવાતી વાવાઝોડા તરીકે જમીન પર ત્રાટક્યા બાદ તેણે દક્ષિણ ભારતના ઘણા ભાગોમાં જનજીવન ખોરવી નાખ્યું. આ વાવાઝોડાની અસર ઓડિશા, તેલંગાણા, છત્તીસગઢથી લઈને ઉત્તર પ્રદેશ અને બિહાર સુધી અનુભવાઈ રહી છે.
ભારતીય હવામાન વિભાગ (IMD) ના જણાવ્યા અનુસાર ચક્રવાત મોન્થા મંગળવારે આંધ્રપ્રદેશના દરિયાકાંઠે માછલીપટ્ટનમ અને કલિંગપટ્ટનમ વચ્ચે કાકીનાડા નજીક ત્રાટક્યું હતું. તે સમયે પવન 90 થી 100 કિલોમીટર પ્રતિ કલાકની ઝડપે ફૂંકાયો હતો. દરિયાકાંઠાના વિસ્તારોમાં ઊંચા મોજાં ઉછળ્યા હતા અને ઘણા વિસ્તારોમાં વૃક્ષો અને વીજળીના થાંભલા ઉખડી ગયા હતા.
આંધ્રપ્રદેશના કોનસીમા જિલ્લામાં ભારે પવનને કારણે એક ઝાડ પડવાથી એક વૃદ્ધ મહિલાનું મોત થયું હતું. તે જ જિલ્લામાં ભારે પવનને કારણે નાળિયેરીના ઝાડ પડવાથી એક નાનો છોકરો અને એક ઓટો ડ્રાઈવર ઘાયલ થયા હતા.
ઓડિશામાં જનજીવન ખોરવાયું
ઓડિશાના 15 જિલ્લાઓમાં સામાન્ય જનજીવન ખોરવાઈ ગયું છે. અનેક વિસ્તારોમાં વીજ પુરવઠો ખોરવાઈ ગયો છે, અને વૃક્ષો પડી જવાના બનાવો નોંધાયા છે. તાજેતરના IMD બુલેટિન મુજબ, ચક્રવાત આગામી 24 કલાકમાં ઉત્તર તરફ આગળ વધશે, જે પૂર્વી અને મધ્ય ભારતના ભાગોમાં પહોંચશે. ચક્રવાત મોન્થાને કારણે ઓડિશામાં ભારે વરસાદની આગાહી છે.
આ રાજ્યોમાં વાવાઝોડા સાથે અતિ ભારે વરસાદની ચેતવણી
આંધ્રપ્રદેશ, છત્તીસગઢ, સૌરાષ્ટ્ર-કચ્છ, તેલંગાણા અને વિદર્ભમાં ભારેથી અતિ ભારે વરસાદની ચેતવણી પણ જારી કરવામાં આવી છે. બિહાર, ઝારખંડ, પશ્ચિમ બંગાળ, ગુજરાત, મધ્યપ્રદેશ, મહારાષ્ટ્ર અને ગોવામાં પણ ભારે વરસાદની આગાહી છે. વધુમાં, પૂર્વીય ઉત્તર પ્રદેશમાં વીજળી અને વાવાઝોડાની પણ શક્યતા છે.
IMD એ જણાવ્યું છે કે ઘણા રાજ્યોમાં વીજળી અને ભારે પવન (30 થી 60 કિમી પ્રતિ કલાક) સાથે વાવાઝોડાની શક્યતા છે. છત્તીસગઢ, તેલંગાણા, વિદર્ભ અને કેરળમાં 40-60 કિમી પ્રતિ કલાકની ઝડપે પવન ફૂંકાઈ શકે છે.
કર્ણાટક, ઓડિશા, ઝારખંડ અને બંગાળના કેટલાક ભાગોમાં 30-40 કિમી પ્રતિ કલાકની ઝડપે પવન ફૂંકાઈ શકે છે. ઉત્તર આંધ્રપ્રદેશના દરિયાકાંઠે 65 થી 75 કિમી પ્રતિ કલાકની ઝડપે પવન ફૂંકાય તેવી શક્યતા છે.
હવામાન વિભાગે એલર્ટ જાહેર કર્યું
હવામાન વિભાગે માછીમારોને દરિયામાં ન જવાની કડક સલાહ આપી છે. કર્ણાટક, ગોવા, ગુજરાત, આંધ્રપ્રદેશ, ઓડિશા અને બંગાળના દરિયાકાંઠે ઊંચા મોજા અને તોફાની સમુદ્ર ઉછળશે. પૂર્વ-મધ્ય અરબી સમુદ્ર અને બંગાળની ખાડીના ઘણા ભાગોમાં 35 થી 65 કિમી પ્રતિ કલાકની ઝડપે પવન ફૂંકાશે.
ચક્રવાત મોન્થા આગામી બે દિવસ સુધી તેલંગાણા, છત્તીસગઢ, ઝારખંડ, બિહાર અને પૂર્વી ઉત્તર પ્રદેશમાં ભારે વરસાદ અને ભારે પવન લાવશે તેવી ધારણા છે. હવામાન વિભાગે આપત્તિ વ્યવસ્થાપન એજન્સીઓને સતર્ક રહેવા અને સંવેદનશીલ વિસ્તારોમાં રાહત અને બચાવ ટીમો તૈનાત કરવા સૂચના આપી છે.
મોન્થાએ ફરી એકવાર સાબિત કર્યું છે કે ચક્રવાતોની અસર ફક્ત દરિયાકાંઠાના રાજ્યો સુધી મર્યાદિત નથી પરંતુ પૂર્વી અને મધ્ય ભારતમાં તેની અસર ઊંડે સુધી અનુભવી શકાય છે.
ઝારખંડમાં મોન્થાની અસર, 19 જિલ્લામાં વરસાદનું એલર્ટ
વાવાઝોડાને કારણે મંગળવારે રાંચી સહિત અનેક જિલ્લાઓમાં વરસાદ શરૂ થયો હતો. હવામાન વિભાગે શુક્રવાર સુધી રાંચી સહિત 19 જિલ્લાઓમાં ભારે વરસાદ માટે યલો એલર્ટ જારી કર્યું છે. આપત્તિ વ્યવસ્થાપન મંત્રી ડૉ. ઇરફાન અન્સારીએ તમામ જિલ્લા મેજિસ્ટ્રેટને સતર્ક રહેવા અને જરૂરી તૈયારીઓ કરવા સૂચના આપી છે. વરસાદને કારણે તાપમાનમાં ઝડપથી ઘટાડો થવાની ધારણા છે.
રાંચીના હવામાનશાસ્ત્રી અભિષેક આનંદના જણાવ્યા અનુસાર, મંગળવારે આંધ્રપ્રદેશના દરિયાકાંઠાના વિસ્તારોમાં ટકરાયા બાદ ચક્રવાત મોન્થા ઉત્તરપશ્ચિમ તરફ આગળ વધી રહ્યું છે. આના કારણે આગામી ત્રણ દિવસમાં તાપમાનમાં 5 ડિગ્રી સુધીનો ઘટાડો થઈ શકે છે. ઝારખંડમાં ચક્રવાત મોન્થાની અસર 1 ઓક્ટોબર સુધી રહી શકે છે. ચક્રવાત મોન્થાને કારણે ભારે વરસાદથી તાપમાનમાં તીવ્ર ઘટાડો થશે. જેમ જેમ તાપમાન ઘટશે તેમ તેમ લોકોને ઠંડીનો અનુભવ થશે અને શિયાળો આવશે. જેમ જેમ ઓક્ટોબર પસાર થશે અને નવેમ્બર નજીક આવશે તેમ તેમ તાપમાનમાં વધુ તીવ્ર ઘટાડો થશે.
રાજ્યમાં હવામાનમાં આ ફેરફારને કારણે દિવસ દરમિયાન ઠંડીમાં વધારો થઈ શકે છે. આગામી ત્રણ દિવસમાં મહત્તમ તાપમાનમાં ત્રણથી પાંચ ડિગ્રીનો ઘટાડો થવાની ધારણા છે. મંગળવારે રાંચીમાં મહત્તમ તાપમાન 29.3 ડિગ્રી અને લઘુત્તમ તાપમાન 20.6 ડિગ્રી નોંધાયું હતું. અહીં તાપમાન સામાન્ય કરતા એક ડિગ્રી વધારે છે. હવામાનશાસ્ત્રી અભિષેક આનંદ જણાવ્યું હતું કે ચક્રવાત મોન્થા રાજ્યમાં એક ગંભીર ચક્રવાતી તોફાનમાં ફેરવાઈ ગયું છે. ધ્રપ્રદેશના દરિયાકાંઠે ટકરાયા પછી, તે ઉત્તર-પશ્ચિમ દિશામાં આગળ વધશે. આને કારણે, શુક્રવાર સુધી રાજ્યના વિવિધ ભાગોમાં વરસાદની આગાહી છે.
વાવાઝોડાના નામ મોન્થાનો અર્થ શું થાય?
હવામાન વિભાગે જણાવ્યું હતું કે “મોન્થા” નામ થાઈ ભાષા પરથી આવ્યું છે, જેનો અર્થ સુગંધિત ફૂલ થાય છે. પરંતુ તેના નામથી વિપરીત ચક્રવાત વિનાશની ગંધ ફેલાવી રહ્યો છે.
