નવી દિલ્હી: (New Delhi) 3 જાન્યુઆરીથી દેશમાં 15 થી 18 વર્ષના બાળકોને (Children) કોરોનાની રસી (Corona vaccine) આપવામાં આવશે. અત્યારે ભારતમાં (India) 12 વર્ષથી વધુ ઉંમરના લોકો માટે બે રસી મંજૂર કરવામાં આવી છે, પરંતુ હાલમાં માત્ર ભારત બાયોટેકની (Biotech) કોવેક્સિન લાગુ કરવામાં આવશે. દેશમાં વધી રહેલા કોરોના વાયરસના નવા ઓમિક્રોન (Omicron) વેરિઅન્ટના ખતરા વચ્ચે દેશમાં 15 થી 18 વર્ષની વયના બાળકોનું રસીકરણ શરૂ થવા જઈ રહ્યું છે. 15 વર્ષથી ઉપરના બાળકોનું રસીકરણ 3 જાન્યુઆરીથી શરૂ થશે. ભારત બાયોટેકના કોવેક્સિન અને ઝાયડસ કેડિલાના ઝાયકોવ-ડીને (Zykov-D) બાળકો માટે મંજૂરી આપવામાં આવી છે. આવતા સપ્તાહથી શરૂ જઈ રહેલા બાળકોના રસીકરણને લગતા દરેક મોટા પ્રશ્નોના જવાબ જાણવા જરૂરી છે.
ગુજરાતના અધિક સચિવે કહ્યું, અમે તૈયારીઓ શરૂ કરી દીધી છે
કેન્દ્ર સરકાર દ્વ્રારા 15થી 18 વર્ષના બાળકોના રસીકરણની લીલી ઝંડી આપી દીધા બાદ હવે રાજ્ય સરકારના આરોગ્ય વિભાગ દ્વારા આ રસીકરણ માટે તૈયારીઓ શરૂ કરી દેવાઈ છે. રાજ્યના આરોગ્ય વિભાગના અધિક મુખ્ય સચિવ મનોજ અગ્રવાલે કહ્યું હતું કે, જ્યાં સુધી ગુજરાતમાં 15થી 18 વર્ષનાં બાળકોના રસીકરણની વાત છે, ત્યાં સુધી અમે તૈયારીઓ શરૂ કરી દીધી છે. રાજ્યમાં આ બાળકોની સંખ્યા 35થી 40 લાખ જેટલી હોવી જોઈએ. ચોક્કસ આંકડો તો મળી જશે. જો કે, આરોગ્ય વિભાગ દ્વારા સ્કૂલોમાં જઈને પણ રસીકરણ કરવાની તૈયારી ચાલી રહી છે. આ વિદ્યાર્થીઓ 10,11 અને ધો- 12માં અભ્યાસ કરી રહ્યા છે. તેમને અમે શાળાઓમાં જઈને રસી આપીશું.
- બાળકોને કઈ ઉંમરે રસી આપવામાં આવશે? : દેશમાં માત્ર 15 થી 18 વર્ષના બાળકોને જ કોરોનાની રસી આપવામાં આવશે. તેનાથી નાના બાળકોના રસીકરણ અંગે સરકારે કોઈ નિર્ણય લીધો નથી.
- શું 12 થી 18 વર્ષની વયના બાળકો પર ઉપયોગ માટે કોવેક્સીનને મંજૂરી આપવામાં આવી છે? : ડ્રગ્સ કંટ્રોલરે 12 થી 18 વર્ષની વયના બાળકો પર કટોકટીના ઉપયોગ માટે ભારત બાયોટેકની કોવેક્સિનને મંજૂરી આપી હોવા છતાં, સરકારે 15 થી 18 વર્ષની વયના બાળકોનું રસીકરણ શરૂ કરવાનો નિર્ણય લીધો છે.
- રસી મેળવવા માટે શું કરવાની જરૂર છે?: રસીકરણ માટે નોંધણી જરૂરી રહેશે. તે રસીકરણ માટે બનાવેલ Cowin પ્લેટફોર્મ સાથે નોંધણી કરી શકાય છે. બાળકોના રસીકરણ માટે રજીસ્ટ્રેશન ક્યારે શરૂ થશે તેની માહિતી સરકાર દ્વારા આપવામાં આવી નથી.
- કઈ રસી આપવામાં આવશે?: હાલમાં બાળકોને માત્ર ભારત બાયોટેકની કોવેક્સિન જ આપવામાં આવશે. સત્તાવાર સૂત્રોએ આ માહિતી આપી છે. હાલમાં દેશમાં 15 થી 18 વર્ષની વયના બાળકોની અંદાજિત વસ્તી 7 થી 8 કરોડ છે.
- ઝાયકોવ-ડી વિશે શું?: ઝાયડસ કેડિલાની ઝાયકોવ-ડી 20 ઓગસ્ટના રોજ મંજૂર કરવામાં આવી હતી. પરંતુ હજુ સુધી રસીકરણ કાર્યક્રમમાં તેનો સમાવેશ કરવામાં આવ્યો નથી. આ રસી 12 વર્ષથી વધુ ઉંમરના લોકોને આપવામાં આવશે.
- બાળકોને રસી આપવી તે કેટલું સલામત છે?: વિશ્વના ઘણા દેશોમાં બાળકોને કોરોનાની રસી આપવામાં આવી રહી છે. આ રસી બાળકોમાં અસરકારક સાબિત થઈ છે. તે જ વર્ષે, ભારત બાયોટેકે 2 થી 18 વર્ષની વયના બાળકો પર કોવેક્સિનનું ટ્રાયલ હાથ ધર્યું હતું. એવું કહેવામાં આવ્યું હતું કે રસી બાળકો પર અસરકારક સાબિત થઈ છે.
- શું રસીની કોઈ આડઅસર છે?: હજુ સુધી રસીની કોઈ મોટી આડઅસર નોંધાઈ નથી. આડ અસરો જેમ કે તાવ, શરીરમાં દુખાવો, અને ઈન્જેક્શન સાઇટ પર સોજો રસી આપ્યા પછી થઈ શકે છે.
- પ્રથમ અને બીજી ડોઝ ક્યારે આપવામાં આવશે?: પુખ્ત વયના લોકોને જે રસી આપવામાં આવી રહી છે તે બાળકોને પણ આપવામાં આવશે. તેથી, બાળકોની રસીમાં પણ, બે ડોઝ વચ્ચે 28 દિવસનું અંતર રહેશે. જો પ્રથમ ડોઝ 3 જાન્યુઆરીએ લેવામાં આવ્યો હોય, તો 31 જાન્યુઆરી પછી, બીજો ડોઝ આપી શકાય છે.
- શું રસી માટે પૈસા ચૂકવવા પડશે?: ના. દેશમાં કોરોના રસીકરણનો કાર્યક્રમ સંપૂર્ણપણે મફત ચાલી રહ્યો છે. ખાનગી હોસ્પિટલોમાં જ રસી માટે પૈસા ખર્ચવામાં આવી રહ્યા છે. મફત રસી માત્ર સરકારી સરકારી કેન્દ્રોમાં લગાવવામાં આવી રહી છે.
- રસી ક્યાં આપી શકાય?: સરકાર દ્વારા રસીકરણ માટે ઘણા કેન્દ્રો ઉભા કરવામાં આવ્યા છે. તમે આ કેન્દ્રો પર જઈને રસી મેળવી શકશો. જ્યાં પુખ્ત વયના લોકો રસી મેળવતા હોય ત્યાં બાળકોને રસી અપાશે કે બાળકો માટે અલગ રસીકરણ કેન્દ્ર હશે. આ અંગે હજુ સુધી સ્પષ્ટતા કરાઈ નથી.
