નવી દિલ્હી: કોરોનાના નવા વેરિઅન્ટ ઓમિક્રોનનો ભય વિશ્વભરમાં ફેલાયો છે. દક્ષિણ આફ્રિકામાં સૌ પ્રથમ વાર દેખાયેલો આ ઓમિક્રોન વેરિઅન્ટ વિશ્વના 14 દેશોમાં ફેલાઈ ચૂક્યો છે અને હવે તે ભારતમાં પણ પ્રવેશી ચૂક્યો છે. આ સાથે જ દેશમાં કોરોનાના કેસ પણ વધવા માંડ્યા છે. મુંબઈમાં બે લોકોમાં ઓમિક્રોન વેરિએન્ટની પુષ્ટિ થઈ છે. બંને 25 નવેમ્બરે દક્ષિણ આફ્રિકાથી પરત આવ્યા હતા અને તેમનો કોરોના રિપોર્ટ પોઝિટિવ આવ્યો હતો. ત્યારબાદ ઓમિક્રોન છે કે નહીં તેની તપાસ માટે સેમ્પલ પુણેની NIV માં જીનોમ સિક્વેન્સિંગ માટે મોકલવામાં આવ્યા હતા. હવે તેનો રિપોર્ટ પોઝિટિવ આવ્યો છે. આ સાથે મહારાષ્ટ્રમાં ઓમિક્રોન સંક્રમિતોની સંખ્યા 10 થઈ ગઈ છે. દેશભરમાં અત્યાર સુધી 23 લોકોમાં ઓમિક્રોન વેરિએન્ટની પુષ્ટિ થઈ છે.
આજે દક્ષિણ ભારતના આ શહેરોમાં એક સાથે 112 વિદ્યાર્થીઓ કોરોના પોઝીટીવ નોંધાતા તંત્ર દોડતું થયું છે. ઓમિક્રોન (Omicron) વેરિઅન્ટના ખતરા વચ્ચે કર્ણાટકની (Karnataka) એક સરકારી શાળા (Government School) અને તેલંગાણાની (Telangana) એક મેડિકલ કોલેજમાં (Medical College) કોરોના (Corona) વિસ્ફોટના મામલા સામે આવ્યા છે. કર્ણાટકના ચિકમગલુરમાં એક સરકારી રેસિડેન્શિયલ સ્કૂલના 59 વિદ્યાર્થીઓ તેમજ 10 ટીચિંગ અને નોન-ટીચિંગ સ્ટાફ કોરોના સંક્રમિત મળી આવ્યા છે. તે જ સમયે, તેલંગાણાના કરીમનગરમાં ચલમેડા આનંદ રાવ મેડિકલ સાયન્સ ઇન્સ્ટિટ્યૂટમાં 43 વિદ્યાર્થીઓ (Student) કોવિડ પોઝિટિવ (Positive) હોવાનું જાણવા મળ્યું છે.
કર્ણાટકના ચિક્કામગાલુરુના ટોચના જિલ્લા અધિકારીએ જણાવ્યું હતું કે ચેપગ્રસ્ત વાયરસના (Virus) કોઈ લક્ષણો જોવા મળ્યા નથી. ચિક્કામગાલુરુના ડેપ્યુટી કમિશનર કેએન રમેશે કહ્યું કે ગભરાવાની જરૂર નથી કારણ કે મેડિકલ ટીમો તૈનાત કરવામાં આવી છે અને એમ્બ્યુલન્સ (Ambulance) સ્ટેન્ડબાય પર રાખવામાં આવી છે. દરમિયાન, શાળા, જેમાં 450 નિવાસી વિદ્યાર્થીઓ નોંધાયેલા છે, તેને સીલ અને સેનિટાઇઝ (Sanitize) કરવામાં આવી છે. તેમણે કહ્યું કે ચેપગ્રસ્ત વિદ્યાર્થીઓ અને સ્ટાફને હોસ્ટેલના (Hostel) એક ભાગમાં અલગ રાખવામાં આવ્યા છે.
તે જ સમયે, તેલંગાણાના બોમક્કલ ગામની મેડિકલ કોલેજમાં 43 વિદ્યાર્થીઓમાં કોરોના સંક્રમણ સામે આવ્યા બાદ વિગતવાર માહિતીની હજુ રાહ જોવાઈ રહી છે. જિલ્લા તબીબી આરોગ્ય અધિકારીએ રવિવારે જણાવ્યું હતું કે, હાલમાં બાકીની માહિતી કોલેજ દ્વારા આપવાની છે. સોમવાર સુધીમાં, તેલંગાણામાં કોરોનાના કુલ 3 હજાર 787 સક્રિય કેસ હતા. તે જ સમયે, રાજ્યમાં કોરોનાને કારણે અત્યાર સુધીમાં કુલ 3 હજાર 999 દર્દીઓએ પોતાનો જીવ ગુમાવ્યો છે. બીજી તરફ, કર્ણાટકના દક્ષિણ ભાગમાં, શૈક્ષણિક સંસ્થાઓમાં નવેમ્બરના મધ્યભાગથી છૂટાછવાયા કોરોના કેસના અહેવાલો છે. રોગચાળાના ફાટી નીકળવાના કારણે 19 મહિનાના અંતરાલ પછી નવેમ્બરના પ્રથમ સપ્તાહમાં રાજ્યમાં શાળાઓ ફરીથી ખોલવામાં આવી હતી.
