પાકિસ્તાન અને બલુચિસ્તાન વચ્ચેનો સંઘર્ષ વધુ વ્યાપક બન્યો છે. પોલીસ અને જનતા વચ્ચે થયેલી અથડામણમાં 4 પોલીસકર્મીઓ સહિત 8 લોકોના મોત થયા છે. આમાં ચાર મજૂરોનો પણ સમાવેશ થાય છે. બલુચિસ્તાન પ્રાંતમાં અલગ અલગ ઘટનાઓમાં અજાણ્યા બંદૂકધારીઓએ ચાર પોલીસકર્મીઓ અને ચાર મજૂરોની હત્યા કરી હોવાના અહેવાલ છે. પહેલી ઘટના શનિવારે નોશકી શહેરના ગરીબાબાદ વિસ્તારમાં બની હતી, જ્યાં મોટરસાઇકલ પર આવેલા બંદૂકધારીઓએ પેટ્રોલિંગ પોલીસ ટીમ પર ગોળીબાર કર્યો હતો, જેમાં ચાર પોલીસકર્મીઓના મોત થયા હતા.
બીજો હુમલો કલાતના માંગોચર શહેરના મલંગઝાઈ વિસ્તારમાં થયો હતો, જેમાં પંજાબ પ્રાંતના ચાર મજૂરોના મોત થયા હતા. પોલીસ અધિકારી હાશિમ ખાને મીડિયાને જણાવ્યું કે પોલીસકર્મીઓના મૃતદેહને હોસ્પિટલમાં મોકલવામાં આવ્યા છે અને પોલીસે વિસ્તારને ઘેરી લીધો છે અને હુમલાખોરોની શોધખોળ માટે કાર્યવાહી શરૂ કરી છે. કલાતના ડેપ્યુટી પોલીસ કમિશનર જમીલ બલોચે જણાવ્યું હતું કે બીજા હુમલામાં અસરગ્રસ્ત મજૂરો પંજાબ પ્રાંતના સાદિકબાદના રહેવાસી હતા અને બોરવેલ ખોદવામાં રોકાયેલા હતા. અત્યાર સુધી કોઈ પણ સંગઠને આ હુમલાની જવાબદારી લીધી નથી.
બલુચિસ્તાન પોસ્ટ દ્વારા શેર કરાયેલા એક વીડિયો અનુસાર પાકિસ્તાનના ક્વેટામાં પોલીસે વિરોધીઓને સીધા માથામાં ગોળી મારી હોવાનો એક વીડિયો સામે આવ્યો છે. વીડિયોમાં જોઈ શકાય છે કે પોલીસ સીધી ગોળીબાર કરતી જોવા મળે છે. બલુચિસ્તાનમાં વિરોધીઓ સામે હિંસાની ઘટનાઓમાં સોથી વધુ લોકો ઘાયલ થયા છે જેમાંથી ઘણા સીધા ગોળીબારના પરિણામે થયા છે, જ્યારે પાંચ લોકોના મોત થયાના અહેવાલ છે. જોકે સત્તાવાર રીતે એવું કહેવામાં આવ્યું છે કે 4 કામદારોના મોત થયા છે.
બલુચિસ્તાનમાં આ હુમલા એવા સમયે થયા છે જ્યારે બલુચ યાકજાહાતી સમિતિ (BYC) દ્વારા બોલાવવામાં આવેલા વિરોધ પ્રદર્શનોને કારણે પ્રાંતમાં પરિસ્થિતિ તંગ છે. BYC દ્વારા બોલાવવામાં આવેલા વિરોધ પ્રદર્શનને કારણે રવિવારે પ્રાંતના ઘણા ભાગો બંધ રહ્યા. પોલીસે શનિવારથી BYCના કેન્દ્રીય નેતાઓની રસ્તાઓ બ્લોક કરવા અને વિસ્તારમાં સ્થાપનાઓ બંધ કરાવવાના આરોપસર ધરપકડ કરવાનું શરૂ કર્યું હતું. બલુચિસ્તાનના મુખ્ય પ્રધાન સરફરાઝ બુગતીએ આ હુમલાઓની નિંદા કરી હતી અને તેમને “આતંકવાદનું ક્રૂર કૃત્ય” ગણાવ્યું હતું.
