ચેમ્પિયન્સ ટ્રોફી જીતનાર ટીમ ઈન્ડિયાને 58 કરોડ રૂપિયાનું રોકડ ઇનામ આપવામાં આવશે. ભારતીય ક્રિકેટ કંટ્રોલ બોર્ડ (BCCI) એ આ પુરસ્કારની જાહેરાત કરી છે. આ રકમ ટીમના તમામ ખેલાડીઓ, કોચિંગ અને સપોર્ટ સ્ટાફમાં વહેંચવામાં આવશે.
બીસીસીઆઈના સચિવ દેવજીત સૈકિયાએ જણાવ્યું હતું કે દરેક ખેલાડીને 3 કરોડ રૂપિયા, મુખ્ય કોચને 3 કરોડ રૂપિયા અને સહાયક કોચિંગ સ્ટાફને 50 લાખ રૂપિયા મળશે. બીસીસીઆઈના દરેક અધિકારીઓને 25 લાખ રૂપિયા આપવામાં આવશે. પસંદગી સમિતિના સભ્યોને પણ 50 લાખ રૂપિયા મળશે.
9 માર્ચે રમાયેલી ચેમ્પિયન્સ ટ્રોફીની ફાઇનલમાં ભારતે ન્યુઝીલેન્ડને 4 વિકેટે હરાવ્યું હતું. ફાઇનલમાં ટોસ જીતીને પ્રથમ બેટિંગ કર્યા બાદ ન્યુઝીલેન્ડે 50 ઓવરમાં સાત વિકેટ ગુમાવીને 251 રન બનાવ્યા હતા. જવાબમાં ભારતે 49 ઓવરમાં છ વિકેટ ગુમાવીને લક્ષ્ય હાંસલ કર્યું હતું. રોહિતે કેપ્ટનશીપની ઇનિંગ્સ રમી હતી. તેણે ભારતને મુશ્કેલ પરિસ્થિતિમાંથી બહાર કાઢવા માટે 76 રન બનાવ્યા હતા.
ભારતે બધી મેચ જીતી હતી
ભારતે તેની બધી મેચ દુબઈમાં રમી અને બધી જ મેચ જીતી હતી. ટીમ ઈન્ડિયાએ ટુર્નામેન્ટમાં પોતાના અભિયાનની શરૂઆત બાંગ્લાદેશને 6 વિકેટે હરાવીને કરી હતી. ત્યારબાદ ભારતે પાકિસ્તાનને 6 વિકેટથી અને ન્યુઝીલેન્ડને 44 રનથી હરાવ્યું. અને સેમિફાઇનલમાં તેઓએ ઓસ્ટ્રેલિયાને 4 વિકેટથી હરાવ્યું. 9 મહિનામાં કેપ્ટન તરીકે રોહિત શર્માનું આ બીજું ICC ટાઇટલ છે. તેણે ગયા વર્ષે 29 જૂને T-20 વર્લ્ડ કપ પણ જીત્યો હતો. આ તેનું ત્રીજું ચેમ્પિયન્સ ટ્રોફી ટાઇટલ છે.
ICC એ પણ ચેમ્પિયન્સ ટ્રોફીની ઇનામી રકમમાં 53 ટકાનો વધારો કર્યો
ICC એ ચેમ્પિયન્સ ટ્રોફીની ઇનામી રકમમાં 53 ટકાનો વધારો કર્યો. ભારતીય ટીમને 2.4 મિલિયન યુએસ ડોલર એટલે કે આશરે 19.5 કરોડ રૂપિયા મળ્યા. ઇન્ટરનેશનલ ક્રિકેટ કાઉન્સિલ (ICC) એ ચેમ્પિયન્સ ટ્રોફીની કુલ ઇનામી રકમમાં $6.9 મિલિયન (લગભગ રૂ. 60 કરોડ)નો વધારો કર્યો છે. વિજેતા ઉપરાંત રનર-અપ ન્યુઝીલેન્ડ ટીમને $1.12 મિલિયન (લગભગ રૂ. 9.72 કરોડ) મળ્યા, જ્યારે સેમિફાઇનલમાં બહાર થયેલી બે ટીમો, ઓસ્ટ્રેલિયા અને દક્ષિણ આફ્રિકાને $56,000 (રૂ. 4.86 કરોડ) મળ્યા.
