મોસ્કો: રશિયન શહેર કોસ્ટ્રોમા (Kostroma)માં શનિવારે એક કેફે (Cafe)માં આગ (Fire) લાગવાથી ઓછામાં ઓછા 15 લોકોના મોત થયા હતા. ઇમરજન્સી અધિકારીઓએ જણાવ્યું હતું કે કાફેમાં વહેલી સવારે થયેલી બોલાચાલી દરમિયાન કોઈએ ફ્લેર ગનનો ઉપયોગ કર્યો હતો, જેના કારણે આગ લાગી હતી. રેસ્ક્યુ ટીમે 250 લોકોને બહાર કાઢ્યા હતા. કોસ્ટ્રોમા ઉત્તરી મોસ્કોથી લગભગ 340 કિલોમીટર દૂર સ્થિત છે. અધિકારીઓએ જણાવ્યું કે આગ દરમિયાન કાફેની છત તૂટી પડી હતી. તેમણે કહ્યું કે આ મામલે ફોજદારી તપાસ શરૂ કરવામાં આવી છે અને પોલીસ ફ્લેર ગનનો ઉપયોગ કરનાર વ્યક્તિની શોધમાં છે.
આગને પગલે રેસ્ટોરન્ટમાં નાસભાગ મચી
મળતી માહિતી અનુસાર, આગની ઘટના રશિયાની રાજધાની મોસ્કોથી 340 કિમી ઉત્તરમાં સ્થિત કોસ્ટ્રોમા શહેરમાં એક રેસ્ટોરન્ટમાં બની હતી. અધિકારીઓએ જણાવ્યું કે રેસ્ટોરન્ટમાં બે લોકો વચ્ચે કોઈ મુદ્દે ઝઘડો થયો હતો. જે બાદ એકે ફ્લેર ગન વડે ફાયરિંગ કર્યું હતું. રેસ્ટોરન્ટમાં આગ ફાટી નીકળી હતી. આગને પગલે રેસ્ટોરન્ટમાં નાસભાગ મચી ગઈ હતી અને આ ઘટનામાં 15 લોકો ગૂંગળામણ અને આગને કારણે મૃત્યુ પામ્યા હતા, અધિકારીઓએ જણાવ્યું હતું. ઘટનાની ગંભીરતાનો અંદાજ એ વાત પરથી લગાવી શકાય છે કે રેસ્ટોરન્ટમાં 250થી વધુ લોકો હાજર હતા. માહિતી મળતાં જ રાહત બચાવ ટીમ ઘટનાસ્થળે પહોંચી અને 250 લોકોને બચાવ્યા.
પોલીસે એક શકમંદની અટકાયત કરી
કટોકટીની સ્થિતિ મંત્રાલયે જણાવ્યું હતું કે કોસ્ટ્રોમામાં નાઈટક્લબમાં નિરીક્ષણ હાથ ધરવામાં આવ્યું ન હતું કારણ કે બિલ્ડિંગનો માલિક એકમાત્ર માલિક છે અને ભાડૂતે 2019 માં સુપરવાઇઝરી ઓથોરિટીને કહ્યું હતું કે તેણે આ સુવિધા પર પ્રવૃત્તિઓ બંધ કરી દીધી છે. રશિયન પોલીસે કોસ્ટ્રોમામાં આગ લાગવાની ઘટનામાં શંકાસ્પદ વ્યક્તિની અટકાયત કરી છે.
કોલસાની ખાણમાં લાગેલી આગમાં 52ના મોત
નવેમ્બર 2021માં રશિયાના સાઇબિરીયા પ્રાંતમાં કોલસાની ખાણમાં આગ લાગી હતી. આ ઘટનામાં 52 લોકોના મોત થયા હતા અને 38 લોકો ઘાયલ થયા હતા. મૃતકોમાં છ બચાવકર્મીઓનો પણ સમાવેશ થાય છે. રશિયામાં કોલસાની ખાણમાં પાંચ વર્ષમાં આ સૌથી મોટો અકસ્માત હતો. આ ઘટના બાદ સાઇબિરીયાના કેમેરોવો વિસ્તારમાં ત્રણ દિવસનો શોક જાહેર કરવામાં આવ્યો છે.
