આણંદ : ગુજરાત પ્રદેશ ભાજપ અધ્યક્ષ સી.આર. પાટીલે બુધવારના રોજ અચાનક જ મલાતજ મેલડી માતાના નવચંડી યજ્ઞમાં પરિવાર સાથે દર્શન કર્યાં હતાં. તેમના આગમનના પગલે જિલ્લા ભાજપના નેતાઓ પણ મલાતજ પહોંચ્યાં હતાં. આ પ્રસંગે સી.આર. પાટીલની સાકરતુલા કરી સન્માન કરવામાં આવ્યું હતું. સોજિત્રાના મલાતજ ગામે આવેલા મેલડી માતાના મંદિરે ચાલી રહેલા નવચંડી યજ્ઞમાં દર્શનાર્થે ગુજરાત પ્રદેશ ભાજપ પ્રમુખ સી.આર. પાટીલ તેમના પત્ની સાથે આવ્યાં હતાં. આ પ્રસંગે સ્થાનિક આગેવાનો અને વિવિધ સમાજ દ્વારા તેમનું સાકરતુલા કરી સન્માન કરવામાં આવ્યું હતું. આ સન્માન બદલ સી.આર. પાટીલે આભારવ્યક્ત કરતાં જણાવ્યું હતું કે, મેલડી માતાના ચરણોમાં નમન કરું છું અને પ્રાર્થના કરીશ કે અહીંયા ઉપસ્થિત સૌ ભક્તો કૃપા વરસાવે. મા મેલડીની કૃપા થાય તો જીવન ધન્ય જાય. આ પ્રસંગે સી.આર. પાટીલ સાથે જિલ્લા ભાજપ પ્રમુખ વિપુલભાઈ પટેલ, મહેન્દ્રભાઈ પટેલ સહિતના આગેવાનો પણ હાજર રહ્યાં હતાં.
