પુણેના માવલ તાલુકામાં એક ચોંકાવનારી ઘટના બની છે. તલેગાંવ દાભાડે શહેર નજીક પ્રખ્યાત પર્યટન સ્થળ કુંડમાલા ખાતે ઈન્દ્રાયણી નદી પર બનેલો એક જૂનો પુલ તૂટી પડ્યો છે. રવિવાર હોવાથી અહીં મોટી માત્રામાં લોકો ફરવા આવ્યા હતા. અહીં પ્રવાસીઓની ભીડ હતી. પૂલ પડવાથી અનેક લોકો નદીમાં વહી ગયા હતા. આ દુર્ઘટનામાં 30 પર્યટકો તણાયા હોવાની તેમજ 2 ના મોત થયા હોવાની માહિતી મળી છે.
રજાનો દિવસ હોવાથી અહીં મોટી સંખ્યામાં લોકો ફરવા આવ્યા હતા. બ્રિજ પર લોકોની સંખ્યા વધી ગઈ હતી તેથી એવી આશંકા છે કે પુલ તૂટી પડ્યો અને ઘણા પ્રવાસીઓ ઈન્દ્રાયણી નદીમાં ડૂબી ગયા. ઘટનાની માહિતી મળતાં સ્થાનિક પોલીસ, ગ્રામજનો અને આપત્તિ રાહત કાર્યકરો ઘટનાસ્થળે પહોંચી ગયા છે અને બચાવ કાર્ય શરૂ કરવામાં આવ્યું છે. માવલ વિસ્તારમાં બે દિવસથી ભારે વરસાદ પડી રહ્યો છે અને ઈન્દ્રાયણીનું પાણીનું સ્તર વધી ગયું છે. આ કારણે એજન્સીઓ નદીમાં પડી ગયેલા પ્રવાસીઓને બચાવવા માટે તમામ પ્રયાસો કરી રહી છે.
કહેવામાં આવી રહ્યું છે કે આ ઘટના બપોરે 3.40 વાગ્યાની આસપાસ બની હતી. પુલના જે ભાગમાં લોકો પડ્યા હતા ત્યાં પથ્થરો પણ હતા. પથ્થર પર પડેલા લોકોને ગંભીર ઈજાઓ પહોંચી છે. ઘણા લોકો નદીના પ્રવાહમાં તણાઈ ગયા છે. દુર્ઘટનામાં 2 લોકોના મોત થયા છે. જેમના મૃતદેહ મળી આવ્યા છે.
મુખ્યમંત્રી દેવેન્દ્ર ફડણવીસે જાહેરાત કરી છે કે રાજ્ય સરકાર પુણે જિલ્લાના તાલેગાંવ નજીક ઈન્દ્રાયણી નદી પર પુલ તૂટી પડવાની ઘટનામાં માર્યા ગયેલા લોકોના પરિવારોને 5 લાખ રૂપિયાની આર્થિક સહાય આપશે. આ ઉપરાંત ઘાયલોની સારવારનો ખર્ચ પણ રાજ્ય સરકાર ઉઠાવશે.
પીએમ મોદીએ સીએમ ફડણવીસ સાથે વાત કરી
પુણેમાં પુલ અકસ્માત બાદ પીએમ મોદીએ સીએમ ફડણવીસ સાથે વાત કરી છે. નોંધનીય છે કે પીએમ મોદી હાલમાં ભારતમાં નથી, તેઓ હાલમાં સાયપ્રસમાં છે. પીએમએ મહારાષ્ટ્રના મુખ્યમંત્રી દેવેન્દ્ર ફડણવીસ સાથે વાત કરી. મુખ્યમંત્રીએ તેમને અસરગ્રસ્ત લોકોને મદદ કરવા માટે ચાલી રહેલા પ્રયાસો વિશે માહિતી આપી.
કુંડમાલા પાર કરતો પુલ તૂટી પડ્યો
પિંપરી-ચિંચવડ પોલીસ કમિશનરેટની તાલેગાંવ દાભાડે પોલીસ ઘટનાસ્થળે પહોંચી ગઈ છે. કુંડમાલા પાર કરવા માટે એક પુલ છે, એક બાજુથી બીજી બાજુ જવા માટે. આ પુલ તૂટી પડ્યો છે.
રજા હોવાથી ત્યાં ઘણી ભીડ હતી
રવિવાર હોવાથી ત્યાં મોટી સંખ્યામાં પ્રવાસીઓ હાજર હતા. કેટલાક લોકો પુલ પર ઉભા હતા. તે સમયે પુલ તૂટી પડવાને કારણે આ અકસ્માત થયો હતો. હજુ સુધી સ્પષ્ટ નથી કે કેટલા લોકો ડૂબી ગયા છે. પ્રાથમિક માહિતી મુજબ લગભગ 30 લોકો તણાઈ ગયા છે. લગભગ 200 પ્રવાસીઓ ઘટનાસ્થળે હાજર હતા. અકસ્માત પછી બધાને સ્થળ પરથી દૂર કરવામાં આવ્યા છે, જેથી બચાવ કામગીરીમાં કોઈ મુશ્કેલી ન પડે.
પુલ અંગે અગાઉ પણ ફરિયાદો કરવામાં આવી હતી
એવું કહેવામાં આવી રહ્યું છે કે અગાઉ પણ પુલની ખરાબ હાલત અંગે ફરિયાદો વહીવટીતંત્ર સુધી પહોંચી હતી પરંતુ તેના પર કોઈ કામ થયું ન હતું. પુલ પર ઘણો કાટ હતો. સાવચેતી રાખવા માટે સતત જાહેરાતો કરવામાં આવી રહી હતી. પુણેમાં છેલ્લા કેટલાક દિવસોથી સતત વરસાદ પડી રહ્યો છે જેના કારણે ઇન્દ્રાયણી નદીમાં પ્રવાહ ઝડપી હતો.
