ગાંધીનગર : ગુજરાત માધ્યમિક શિક્ષણ બોર્ડ દ્વારા આવતીકાલ તારીખ 27 ફેબ્રુઆરીથી રાજ્યભરમાં ધોરણ 10 અને 12ની પરીક્ષાનો પ્રારંભ થશે. આ પરીક્ષામાં અંદાજે 14.28 લાખથી વધુ વિદ્યાર્થીઓ નોંધાયેલા છે. આ પરીક્ષા માટે શિક્ષણ વિભાગ દ્વારા તમામ તૈયારીઓ પૂર્ણ કરી દેવામાં આવી છે.
ગુજરાત માધ્યમિક શિક્ષણ બોર્ડ દ્વારા આવતીકાલ 27 મી ફેબ્રુઆરીથી શરૂ થતી ધોરણ 10 અને 12ની બોર્ડની પરીક્ષામાં ધોરણ 10માં 8,92,882 વિદ્યાર્થીઓ, ધોરણ 12 સામાન્ય પ્રવાહમાં 4,23,909 અને ધોરણ 12 વિજ્ઞાન પ્રવાહમાં 1,11,384 એમ કુલ 14,28,175 પરીક્ષાર્થીઓ નોંધાયેલા છે.
બૉર્ડની પરીક્ષામાં વિદ્યાર્થીઓ શાંતિપૂર્ણ વાતાવરણમાં પરીક્ષા આપે તે માટે બોર્ડ દ્વારા તમામ તૈયારીઓ પૂર્ણ કરી, આગોતરું આયોજન હાથ ધરવામાં આવ્યું છે. આ ઉપરાંત પરીક્ષામાં ગેરરીતિઓ ન થાય તે માટે તમામ પરીક્ષા કેન્દ્રો ઉપર સીસીટીવી મૂકવામાં આવ્યા છે. આ સીસીટીવી માટે સુપરવાઇઝરની પણ વ્યવસ્થા કરવામાં આવી છે.
પરીક્ષા દરમિયાન વિદ્યાર્થીઓને કોઈ મુશ્કેલી ન પડે તે માટે બોર્ડ દ્વારા કેટલીક માર્ગદર્શિકાઓ જાહેર કરવામાં આવી છે. જેમાં શાળા તરફથી આપવામાં આવેલા પ્રવેશપત્ર-હોલટિકીટમાં વિષય, તારીખ, સમય, અને પરીક્ષા સ્થળના લોકેશનની જાણકારી પણ આપવામાં આવી છે.
પરીક્ષાના પ્રથમ દિવસે પરીક્ષાથીઓએ પરીક્ષા શરૂ થવાના 30 મિનિટ અગાઉ પરીક્ષા સ્થળે અચૂક પહોચીં જવું. પરીક્ષા ખંડમાં કોઈપણ પ્રકારનું સાહિત્ય, ઇલેક્ટ્રોનિક ગેજેટ, સાયન્ટિફિક કેલ્ક્યુલેટર, સ્માર્ટ વોચ, મોબાઇલ ફોન વગેરે જેવા ઉપકરણો સાથે લઈ જવા નહીં. ઓએમઆર ઉત્તરવહીમાં જવાબ માટે વર્તુળ કરવા માટે કાળી શાહીવાળી બોલપેન સિવાય અન્ય કોઈ પેન કે પેન્સિલનો ઉપયોગ ન કરવો.
