મહારાષ્ટ્ર: વિધાન પરિષદની ચૂંટણીના પરિણામો આવ્યા બાદ મહારાષ્ટ્ર(Maharashtra)માં રાજકીય ઉથલપાથલ(Political Crisis) શરુ થઇ ગઈ છે. મંગળવારે સવારે ઉદ્ધવ સરકારના 19 બળવાખોર ધારાસભ્યો(MLA)એ સુરત(Surat) ખાતે ધામા નાખ્યા છે અને તેમની સાથે શિવસેનાના વરિષ્ઠ નેતા અને મંત્રી એકનાથ શિંદે પણ છે. આ માહિતી મળતાની સાથે જ મહારાષ્ટ્ર સરકારમાં હલચલ વધી ગઈ છે.
શિંદેને ભાજપે આપી ઇડીની ધમકી: રાઉત
મહારાષ્ટ્ર સરકાર સામે ચાલી રહેલા રાજકીય સંકટ વચ્ચે શિવસેનાના નેતા સંજય રાઉતે કહ્યું કે મેં એકનાથ શિંદે સાથે વાત કરી છે. આ તમામ વિકાસ પાછળ ભાજપનો હાથ છે. ઈડીની કાર્યવાહીથી ડરીને એકનાથ શિંદેએ બળવો કર્યો છે. ઘણા ધારાસભ્યોએ અમારો સંપર્ક કર્યો છે કે તેમને બળજબરીથી ત્યાં લઈ જવામાં આવ્યા છે. અમારા એક ધારાસભ્ય રાત્રે જ સુરતથી મુંબઈ આવવાનો પ્રયાસ કરી રહ્યા હતા. તેમની સાથે વધુ ચાર ધારાસભ્યો પણ હતા પરંતુ ગુજરાત પોલીસે અમારા ધારાસભ્યોને પકડી લીધા છે. તેમણે કહ્યું કે જો મહારાષ્ટ્ર પોલીસને ગુજરાતમાં જવાનો મોકો મળશે તો તે બધાને પરત લાવશે.
એકનાથ શિંદે અમારી સાથે: સંજય રાઉત
મહારાષ્ટ્રમાં વધી રહેલા રાજકીય સંકટ વચ્ચે શિવસેનાના નેતા સંજય રાઉતે ભાજપ પર આકરા પ્રહારો કર્યા છે. તેમણે કહ્યું કે સુરતમાં અમારા ધારાસભ્યોને ડરાવવામાં આવ્યા છે. ભાજપ ઓપરેશન લોટસ જેવી રણનીતિ અપનાવી રહી છે પરંતુ જોઈએ તે કેટલી સફળ થાય છે. તેમણે વધુમાં કહ્યું કે અમે તે ધારાસભ્યો સાથે વાત કરી છે. તેમણે વધુમાં કહ્યું કે એકનાથ શિંદે અમારી સાથે છે, તેમની કેટલીક ગેરસમજ છે જે દૂર કરવામાં આવશે.
ઉદ્ધવ ઠાકરેની બેઠકમાં 20 ધારાસભ્યો પહોંચ્યા
મહારાષ્ટ્રમાં ગહન રાજકીય કટોકટી વચ્ચે, મીડિયા અહેવાલો દાવો કરે છે કે ઉદ્ધવ ઠાકરેએ એકનાથ શિંદેના બળવાખોર વલણ બાદ કટોકટી બેઠક બોલાવી હતી, જેમાં માત્ર 20 ધારાસભ્યો જ પહોંચ્યા હતા. શિવસેનાના 35 ધારાસભ્યો બેઠકમાં હાજર રહ્યા ન હતા.
મહારાષ્ટ્ર સરકારના ત્રણેય પક્ષો વચ્ચે સંપૂર્ણ સંકલન છેઃ શરદ પવાર
NCP નેતા શરદ પવારે ટ્વીટ કરીને કહ્યું કે મહારાષ્ટ્ર વિધાન પરિષદની ચૂંટણીમાં ક્રોસ વોટિંગ થયું હોવાનું કહેવામાં આવી રહ્યું છે, પરંતુ છેલ્લા 50 વર્ષમાં મેં જોયું છે કે ઘણી વખત ક્રોસ વોટિંગ છતાં સરકાર ચાલી છે. આમ છતાં અમારા ગઠબંધનમાં કોઈ ફરક નથી. તેમણે કહ્યું કે એ વાત સાચી છે કે અમારા મોરચાનો એક પણ ઉમેદવાર જીતી શક્યો નથી. મુંબઈ પાછા ગયા બાદ આ અંગે ચર્ચા કરશે. મને ખાતરી છે કે આમાંથી કોઈક રસ્તો નીકળશે. મહારાષ્ટ્ર સરકારના ત્રણેય સહયોગીઓ વચ્ચે સંપૂર્ણ સંકલન છે.
ગત વખતે અમારા ધારાસભ્યોને ગુડગાંવમાં રાખવામાં આવ્યા હતા, જ્યારે તેઓ બહાર આવ્યા ત્યારે ઉદ્ધવ સરકાર બની હતી
મહારાષ્ટ્ર સરકાર સામે મોટું સંકટ ઊભું થયું છે. શિવસેનાના વરિષ્ઠ નેતા અને મહારાષ્ટ્ર સરકારમાં કેબિનેટ મંત્રી એકનાથ શિંદે બે ડઝનથી વધુ ધારાસભ્યો સાથે ‘નોટ રીચેબલ’ બની ગયા છે. આ વચ્ચે એનસીપી નેતા શરદ પવારે ટ્વીટ કરીને કહ્યું કે છેલ્લા અઢી વર્ષમાં આવું ત્રીજી વખત બન્યું છે. ધારાસભ્યને ઉભા કરવાનું કામ છેલ્લા બે વખતથી કરવામાં આવ્યું હતું. ગત વખતે અમારા ધારાસભ્યોને ગુડગાંવમાં રાખવામાં આવ્યા હતા, ત્યાંથી તેઓ બહાર આવ્યા હતા, ત્યારપછી ઉદ્ધવ ઠાકરેની સરકાર બની હતી.
સાંજે 4 વાગ્યે શિવસેના કરશે શક્તિપ્રદર્શન
મહારાષ્ટ્રમાં સીએમ ઉદ્ધવ ઠાકરેના સત્તાવાર નિવાસસ્થાન પર બેઠક બાદ ધારાસભ્યો સાંજે 4 વાગ્યે સેના ભવનમાં શક્તિ પ્રદર્શન કરશે. નોંધનીય છે કે થોડા સમય પહેલા શિંદેનું સમર્થન કરી રહેલા 3 ધારાસભ્યોને ઉદ્ધવના નિવાસસ્થાને લાવવામાં આવ્યા હતા, જેમાં દાદા ભુસે, સંજય રાઠોડ, સંજય બાંગરનો સમાવેશ થાય છે.
શિવસેનાએ એકનાથ શિંદેને ધારાસભ્ય દળના નેતા પદેથી હટાવ્યા
સૂત્રો પાસેથી મળતી માહિતી મુજબ, શિવસેનાએ એકનાથ શિંદેને તેના વિધાયક દળના નેતાના પદ પરથી હટાવવાનો નિર્ણય લીધો છે. શિવસેના ધારાસભ્ય દળના નવા નેતા તરીકે શિવડીના ધારાસભ્ય અજય ચૌધરીની પસંદગી કરવામાં આવી છે.
સત્તા માટે ક્યારેય છેતરપિંડી નહીં કરીએઃ એકનાથ શિંદે
શિવસેનાના બળવાખોર નેતા એકનાથ શિંદેએ ટ્વિટ કરીને લખ્યું કે અમે બાળાસાહેબના કટ્ટર શિવસૈનિક છીએ. બાળાસાહેબે આપણને હિન્દુત્વ શીખવ્યું છે. તેમના વિચારો અને આનંદ દિઘે સાહેબના ઉપદેશને કારણે આપણે ક્યારેય છેતરપિંડી કરી નથી અને સત્તા મેળવવા માટે ક્યારેય હાર માનીશું નહીં.
મહારાષ્ટ્રના રાજકીય સંકટ પર શરદ પવારે કહ્યું- આ ત્રીજી વખત થઈ રહ્યું છે
મહારાષ્ટ્રના રાજકીય સંકટ પર શરદ પવારનું નિવેદન આવ્યું છે. તેમણે કહ્યું કે મહારાષ્ટ્રમાં આવું ત્રીજી વખત થઈ રહ્યું છે. તેમણે કહ્યું કે NCPનો કોઈ ધારાસભ્ય અહીંથી ત્યાં ગયો નથી. તેમણે કહ્યું કે આ શિવસેનાનો આંતરિક મામલો છે. ઠાકરેની સરકાર પડી જશે? તેના પર પવારે કહ્યું કે કોઈ વિકલ્પ બહાર આવશે. પવારે કહ્યું કે કોંગ્રેસ, એનસીપી અને શિવસેના બધા સાથે છે. આજે અમે સાથે મળીને આ અંગે ચર્ચા કરીશું અને સાંજ સુધીમાં તમને જાણ કરીશું.
કોઈ રાજકીય ભૂકંપ નહીં આવેઃ રાઉત
શિવસેનાના નેતા સંજય રાઉતે કહ્યું કે મેં સાંભળ્યું છે કે અમારા ધારાસભ્યો ગુજરાત રાજ્યના સુરતમાં છે અને તેમને જવા દેવામાં આવી રહ્યા નથી, પરંતુ તેઓ ચોક્કસપણે પાછા આવશે કારણ કે તેઓ બધા શિવસેનાને સમર્પિત છે. મને ખાતરી છે કે અમારા તમામ ધારાસભ્યો પાછા ફરશે અને બધું સારું થઈ જશે. મહારાષ્ટ્રમાં ઉદ્ધવ સરકાર પાડવામાં ગુજરાતના સી.આર.પાટીલનું જ ષડયંત્ર છે. સુરતમાં શિવસેનાના બળવાખોર નેતાઓને રહેવા માટેની વ્યવસ્થા પણ સીઆર પાટીલે જ કરી છે. સંજય રાઉતે કહ્યું કે મહારાષ્ટ્રમાં કોઈ રાજકીય ભૂકંપ આવવાનો નથી. બધું સારું થઇ જશે. તેમણે કહ્યું કે મહાવિકાસ આઘાડી સરકારને તોડી પાડવાના પ્રયાસો થઈ રહ્યા છે પરંતુ ભાજપે યાદ રાખવું પડશે કે મહારાષ્ટ્ર રાજસ્થાન કે મધ્યપ્રદેશથી ઘણું અલગ છે.
એકનાથ શિંદેએ યોગ્ય સમયે નિર્ણય લીધોઃ નારાયણ રાણે
શિવસેનાના નેતા એકનાથ શિંદેએ બળવો કર્યા બાદ બીજેપી નેતા નારાયણ રાણેએ ટ્વીટ કર્યું, “શબ્બાસ એકનાથ શિંદે, તમે યોગ્ય સમયે નિર્ણય લીધો છે. મહારાષ્ટ્રમાં રાજકીય ઉથલપાથલ વચ્ચે કોંગ્રેસે પોતાના તમામ ધારાસભ્યોને દિલ્હી બોલાવ્યા છે. આશા છે કે ટૂંક સમયમાં તમામ ધારાસભ્યો દિલ્હી પહોંચી જશે. મહારાષ્ટ્ર કોંગ્રેસના નેતાઓ મુંબઈમાં બાલાસાહેબ થોરાટના સત્તાવાર નિવાસસ્થાને મળ્યા. આ દરમિયાન કોંગ્રેસ નેતા અશોક ચૌહાણ પણ હાજર હતા.
ભાજપના નેતા ફડણવીસ દિલ્હી જવા રવાના થયા
મહારાષ્ટ્રમાં રાજકીય ગરમાવો વચ્ચે ભાજપના નેતા દેવેન્દ્ર ફડણવીસ દિલ્હી જવા રવાના થઈ ગયા છે. માનવામાં આવે છે કે અહીં તેઓ બીજેપીના સિનિયર નેતાઓ સાથે મુલાકાત કરશે અને હાલની સ્થિતિ પર ચર્ચા-વિચારણા કરશે. જો એકનાથ શિંદે સાથે આવેલા શિવસેનાના ધારાસભ્યો બીજેપીને સમર્થન આપશે તો ઉદ્ધવ સરકાર માટે મુશ્કેલી ઊભી થઈ શકે છે.
એકનાથ શિંદે સાથે આવેલા બળવાખોર ધારાસભ્યોનું લીસ્ટ
1. એકનાથ શિંદે – કોપરી
2. અબ્દુલ સત્તાર – સિલ્લોડ – ઔરંગાબાદ
૩. શંભૂરાજ દેસાઇ – સતારા
4. સંદિપાન ભૂમરે – પૈઠણ – ઔરંગાબાદ
5. ઉદયસિંહ રાજપૂત – કન્નડ- ઔરંગાબાદ
6. ભરત ગોગાવલે – મહાડ – રાયગઢ
7. નિતીન દેશમુખ – બાળાપુર – અકોલા
8. અનિલ બાબર – ખાનાપુર – આટપાડી – સાંગલી
9. વિશ્વનાથ ભોઇર – કલ્યાણ પશ્ચિમ
10. સંજય ગાયકવાડ – બુલઢાણા
11. સંજય રામુલકર – મેહકર
12. મહેશ સિંદે – કોરેગાંવ – સતારા
13. શહાજી પાટીલ – સાંગોલા – સોલાપૂર
14. પ્રકાશ અબિટકર – રાધાપુરી – કાોલ્હાપૂર
15. સંજય રાઠોડ – દિગ્રસ – યવતમાળ
16. જ્ઞાનરાજ ચૌગુલે -ઉમરગાસ – ઉસ્માનાબાદ
17. તાનાજી સાવંત – પરોડા – ઉસ્માનાબાદ
18. સંજય શિરસાટ – ઔરંગાબાદ પશ્ચિમ
19. રમેશ બોરનારે – બૈજાપૂર – ઔરંગાબાદ
