મહારાષ્ટ્રની અંબરનાથ મ્યુનિસિપલ કાઉન્સિલમાં ભાજપ-કોંગ્રેસ ગઠબંધન થોડા જ સમયમાં તૂટી ગયું છે. ગઠબંધનના સમાચાર આવ્યા બાદ બંને પક્ષોની ટીકા થઈ. હવે, કોંગ્રેસ પાછળ હટી ગઈ છે.
દરમિયાન, મુખ્યમંત્રી દેવેન્દ્ર ફડણવીસે પણ પોતાનો વાંધો વ્યક્ત કર્યો છે.નોંધનીય છે કે બંને પક્ષો અંબરનાથ મ્યુનિસિપલ કાઉન્સિલમાં એકનાથ શિંદેની પાર્ટીને તોડવા માટે ભેગા થયા હતા.
જોકે, આ ગઠબંધન લાંબો સમય ટકી શક્યું નહીં. હવે, કોંગ્રેસ પાર્ટીએ અંબરનાથ બ્લોક પ્રમુખને સસ્પેન્ડ કરી દીધા છે, જેમના પર ભાજપ સાથે સ્થાનિક જોડાણ કરવાનો આરોપ છે.
કોંગ્રેસની કાર્યવાહી પહેલા, મુખ્યમંત્રી દેવેન્દ્ર ફડણવીસે અંબરનાથ અને અકોલામાં કોંગ્રેસ અને AIMIM સાથે જોડાણ કરવા બદલ ભાજપના નેતાઓની આકરી ટીકા કરી હતી અને કાર્યવાહીની ધમકી આપી હતી.
તેમણે સ્પષ્ટતા કરી હતી કે આવા જોડાણો પક્ષના વરિષ્ઠ નેતૃત્વની મંજૂરી વિના કરવામાં આવ્યા હતા અને સંગઠનાત્મક શિસ્તનું ઉલ્લંઘન કર્યું હતું.
ફડણવીસે કહ્યું હતું કે, “હું સ્પષ્ટ કરી રહ્યો છું કે કોંગ્રેસ કે AIMIM સાથે કોઈપણ ગઠબંધન સ્વીકાર્ય રહેશે નહીં. જો કોઈ સ્થાનિક નેતાએ પોતાની મેળે આવો નિર્ણય લીધો હોય, તો તે શિસ્ત વિરુદ્ધ છે અને તેની સામે કાર્યવાહી કરવામાં આવશે.”
તેમણે વધુમાં કહ્યું કે આવા ગઠબંધનને રદ કરવા માટે પહેલાથી જ સૂચનાઓ જારી કરવામાં આવી છે.
