પટનાઃ (Patna) બિહારની પટના યુનિવર્સિટીના વિદ્યાર્થી હર્ષરાજની (Harshraj) હત્યાના વિરોધમાં પટનાના કારગિલ ચોકમાં વિદ્યાર્થીઓએ પ્રદર્શન કર્યું હતું. વિદ્યાર્થીઓએ હત્યારાઓની તાત્કાલિક ધરપકડની માંગ સાથે વિરોધ પ્રદર્શન કર્યું હતું. વિદ્યાર્થીઓના પ્રદર્શનને કારણે રસ્તા પર ટ્રાફિક જામ થઈ ગયો હતો. ત્યારબાદ પોલીસે લાઠીચાર્જ કરવો પડ્યો હતો. લાઠીચાર્જ બાદ પોલીસે જામ હટાવીને ટ્રાફિક ચાલુ કર્યો હતો.
વિદ્યાર્થી નેતા અને કાયદાના વિદ્યાર્થી હર્ષની હત્યાના વિરોધમાં મંગળવારે વિદ્યાર્થીઓ રસ્તા પર ઉતરી આવ્યા હતા. વિદ્યાર્થીઓએ અશોક રાજપથ બ્લોક કરીને વિરોધ શરૂ કર્યો હતો. વિરોધ કરી રહેલા વિદ્યાર્થીઓએ રસ્તા પર ચક્કાજામ કરીને વિદ્યાર્થીના હત્યારાઓની ધરપકડની માંગ કરી હતી. લૉ કૉલેજના વિદ્યાર્થી હર્ષરાજને પટનામાં ધોળેદિવસે બદમાશોએ માર મારી હત્યા કરી નાંખી હતી. સોમવારે 27 મેના રોજ 8 થી 10 બદમાશોએ આ ઘટનાને અંજામ આપ્યો હતો. મૃતક વિદ્યાર્થી બિહારના હાજીપુરનો રહેવાસી હતો. આ ઘટના બાદ વિસ્તારમાં ભયનો માહોલ છે.
આ ઘટના પટનાના સુલતાનગંજ પોલીસ સ્ટેશન વિસ્તારમાં બની હતી. હર્ષરાજ પરીક્ષા આપીને લો કોલેજમાંથી બહાર નિકળ્યો હતો. તે જ સમયે બદમાશોએ તેને ઘેરી લીધો અને માર મારવા લાગ્યા હતા. ઇજાગ્રસ્ત હાલતમાં તેને પીએમસીએચમાં દાખલ કરવામાં આવ્યો હતો જ્યાં સારવાર દરમિયાન તેનું મોત થયું હતું. પ્રત્યક્ષદર્શીઓના જણાવ્યા અનુસાર તમામ બદમાશોએ માસ્ક પહેરેલા હતા. ઘટનાને અંજામ આપ્યા બાદ તમામ બદમાશો ભાગી ગયા હતા.
પોલીસની પ્રાથમિક તપાસમાં જાણવા મળ્યું છે કે હર્ષરાજ પટનામાં રહેતો હતો ત્યારે કાયદાનો અભ્યાસ કરતો હતો. થોડા દિવસો પહેલા હર્ષનો કેટલાક લોકો સાથે વિવાદ થયો હતો. આ જ વિવાદમાં તેની હત્યા કરવામાં આવી હોવાની આશંકા છે. પોલીસ આ મામલે તપાસ કરી રહી છે પોલીસ ઘટના સ્થળની આસપાસ લાગેલા સીસીટીવી ફૂટેજની તપાસ કરી રહી છે.
નીતિશ કુમારની પાર્ટી જનતા દળ યુનાઈટેડના મંત્રી અને બિહારની સમસ્તીપુર લોકસભા સીટ પરથી પાર્ટીના ઉમેદવાર ડો.અશોક ચૌધરીની પુત્રી શાંભવી ચૌધરીએ પોતાની ફેસબુક વોલ પર હર્ષ વિશે લખ્યું છે. તેણે લખ્યું કે હર્ષ જે હંમેશા એક ભાઈ તરીકે મજબૂત હતો તે હવે આપણી વચ્ચે નથી. બદમાશોએ હત્યાને અંજામ આપ્યો છે. પોલીસ પ્રશાસનને વિનંતી છે કે તે આની નજીકથી તપાસ કરે અને દોષિતો સામે પગલાં લે.
