પાકિસ્તાનની સરહદે આવેલા રાજ્યોમાં આવતીકાલે ગુરુવારે સાંજે એક મોકડ્રીલ યોજાશે. આ મોક ડ્રીલ ગુજરાત, પંજાબ, રાજસ્થાન અને જમ્મુ અને કાશ્મીરમાં યોજાશે. આ સમય દરમિયાન લોકોને સતર્ક રહેવાની સૂચના આપવામાં આવશે.
સરકારે ચાર રાજ્યો – જમ્મુ અને કાશ્મીર, પંજાબ, રાજસ્થાન અને ગુજરાતમાં મોક ડ્રીલનો આદેશ આપ્યો છે. આ ચાર રાજ્યો પાકિસ્તાન સાથે સરહદો વહેંચે છે. ભારત અને પાકિસ્તાન વચ્ચે 3300 કિલોમીટરથી વધુ લાંબી સરહદ છે. જમ્મુ અને કાશ્મીરને અડીને આવેલી સરહદને નિયંત્રણ રેખા એટલે કે LoC કહેવામાં આવે છે. જ્યારે, પંજાબ, રાજસ્થાન અને ગુજરાત સાથેની સરહદને આંતરરાષ્ટ્રીય સરહદ (IB) કહેવામાં આવે છે.
અગાઉ પણ કેન્દ્ર સરકારે પાકિસ્તાન સાથેના તણાવ વચ્ચે 7 મેના રોજ દેશના 244 જિલ્લાઓમાં મોક ડ્રીલ કરવાની જાહેરાત કરી હતી પરંતુ 6-7મેની રાત્રે ભારતે પાકિસ્તાનમાં આતંકવાદી છાવણીઓ સામે લશ્કરી કાર્યવાહી કરી દીધી હતી. ઓપરેશન સિંદૂર હેઠળ ભારતે પાકિસ્તાનમાં નવ આતંકવાદી છાવણીઓ પર હુમલો કર્યો હતો જેમાં 100થી વધુ આતંકવાદીઓ માર્યા ગયા હતા. પાકિસ્તાનમાં વધુ 12 આતંકવાદી ઠેકાણાઓની યાદી તૈયાર છે. પીઓકેથી લઈને પાકિસ્તાનની અંદર સુધી આતંકવાદના મૂળિયાંને નાબૂદ કરવા માટે એક ઓપરેશન ચાલી રહ્યું છે.
પાકિસ્તાનમાં સ્થિત વધુ 12 આતંકવાદી ઠેકાણાઓ પર ભારત દ્વારા નજર રાખવામાં આવી રહી છે. પાકિસ્તાનમાં સ્થિત 12 વધુ આતંકવાદી કેમ્પોને નિશાન બનાવી શકાય છે. અગાઉ ભારતે સ્પષ્ટ કર્યું હતું કે આતંકવાદના બાકીના ઠેકાણાઓને પણ નષ્ટ કરવામાં આવશે. ભારત હુમલા માટે સંપૂર્ણપણે તૈયાર છે.
ભારતના સરહદી વિસ્તારોમાં એર ડિફેન્સ સિસ્ટમ એલર્ટ પર છે. પાકિસ્તાનની ગભરાટ અને નિયંત્રણ રેખા પર તેના ગોળીબારને ધ્યાનમાં રાખીને સેનાએ કાશ્મીરના 10 જિલ્લાઓમાં નિયંત્રણ કેન્દ્રો સ્થાપ્યા છે.
આતંકવાદની કમર તોડવા માટે ભારતીય સેનાએ ઓપરેશન સિંદૂર દ્વારા પાકિસ્તાન અને પીઓકેમાં આતંકવાદી ઠેકાણાઓ પર હવાઈ હુમલા કર્યા હતા. ભારતીય સેના, વાયુસેના અને નૌકાદળના સંયુક્ત ઓપરેશન હેઠળ પાકિસ્તાન અને પીઓકેમાં આવેલા નવ આતંકવાદી ઠેકાણાઓ પર હવાઈ હુમલા કરવામાં આવ્યા હતા જેમાં બહાવલપુર, મુરીદકે, ગુલપુર, ભીમ્બર, ચક અમરુ, બાગ, કોટલી, સિયાલકોટ અને મુઝફ્ફરાબાદનો સમાવેશ થાય છે. બહાવલપુરમાં પ્રતિબંધિત આતંકવાદી સંગઠન જૈશ-એ-મોહમ્મદના મુખ્યાલય અને મુરીદકેમાં લશ્કર-એ-તૈયબાના મુખ્યાલયને નિશાન બનાવવામાં આવ્યા હતા.
