રેપો રેટ 5.25% પર યથાવત, સતત બીજી વખત વ્યાજદરમાં કોઈ ફેરફાર નહીં
ભારતીય રિઝર્વ બેંક (RBI) ની મોનેટરી પોલિસી કમિટી (MPC) દ્વારા મહત્વપૂર્ણ નીતિ નિર્ણય લેવામાં આવ્યો છે. કમિટીએ સર્વસંમતિથી રેપો રેટ 5.25 ટકા પર યથાવત રાખવાનો નિર્ણય લીધો છે. આ સતત બીજી બેઠક છે જેમાં વ્યાજદરમાં કોઈપણ પ્રકારનો ફેરફાર કરવામાં આવ્યો નથી. સાથે જ સ્ટેન્ડિંગ ડિપોઝિટ ફેસિલિટી (SDF) દર 5% અને માર્જિનલ સ્ટેન્ડિંગ ફેસિલિટી (MSF) દર 5.5% પર યથાવત રાખવામાં આવ્યા છે. આ વખતે MPCએ પોતાની નીતિ સ્થિતિ “ન્યુટ્રલ” રાખવાનો નિર્ણય કર્યો છે, જે સૂચવે છે કે આવનારા સમયમાં આર્થિક પરિસ્થિતિ મુજબ દરોમાં ફેરફાર શક્ય છે.
ખાસ વાત એ છે કે આ નિર્ણય ત્યારે આવ્યો છે જ્યારે વૈશ્વિક સ્તરે અમેરિકા-ઈરાન તણાવ અને તેલ પુરવઠા અંગે અનિશ્ચિતતા વધી રહી છે. RBI ગવર્નરે જણાવ્યું હતું કે ભારતનું અર્થતંત્ર મજબૂત આધાર પર ઉભું છે અને વૈશ્વિક પડકારો સામે ટકી રહેવાની ક્ષમતા ધરાવે છે. તેમણે ચેતવણી આપી કે જો વૈશ્વિક સપ્લાય ચેઇન વધુ ખોરવાય અથવા યુદ્ધની પરિસ્થિતિ લાંબી ચાલે, તો મોંઘવારી અને વૃદ્ધિ પર અસર થઈ શકે છે.
આર્થિક વૃદ્ધિના અંદાજમાં પણ ફેરફાર કરવામાં આવ્યો છે. RBIએ નાણાકીય વર્ષ 2026 માટે GDP વૃદ્ધિ દર 7.4% થી વધારીને 7.6% કર્યો છે, જ્યારે 2027 માટે વૃદ્ધિ દર 6.9% રહેવાનો અંદાજ વ્યક્ત કર્યો છે. આ સુધારો ભારતીય અર્થતંત્રની મજબૂત સ્થિતિને દર્શાવે છે.
શેરબજારમાં આ નિર્ણયનો સકારાત્મક પ્રભાવ જોવા મળ્યો હતો. જાહેરાત બાદ બેન્કિંગ અને ફાઇનાન્સ ક્ષેત્રના શેરોમાં તેજી નોંધાઈ હતી. કેટલાક ક્ષેત્રોમાં 20% સુધીનો ઉછાળો પણ નોંધાયો, જ્યારે ટેલિકોમ્યુનિકેશન સેક્ટરમાં પણ 19.89% સુધીની વૃદ્ધિ જોવા મળી. ગત નીતિ પર નજર કરીએ તો RBIએ છેલ્લી પાંચ બેઠકમાંથી ચાર વખત વ્યાજદર યથાવત રાખ્યા છે. વર્ષ 2025 દરમિયાન ફેબ્રુઆરી, એપ્રિલ, જૂન અને ડિસેમ્બરમાં કુલ મળીને 125 બેસિસ પોઈન્ટનો ઘટાડો કરવામાં આવ્યો હતો. હાલની નીતિથી સ્પષ્ટ થાય છે કે RBI મોંઘવારી નિયંત્રણ અને આર્થિક વૃદ્ધિ વચ્ચે સંતુલન જાળવવાનો પ્રયાસ કરી રહી છે.
