આર્જેન્ટિનાના ફૂટબોલ દિગ્ગજ લિયોનેલ મેસ્સીના કાર્યક્રમ દરમિયાન કોલકાતાના સોલ્ટ લેક સ્ટેડિયમમાં થયેલી અંધાધૂંધી બાદ બંગાળ સરકારના રમતગમત મંત્રી અરૂપ બિસ્વાસે પોતાના પદ પરથી રાજીનામું આપી દીધું છે. મુખ્યમંત્રી મમતા બેનર્જીને લખેલા પત્રમાં બિસ્વાસે જણાવ્યું હતું કે તેઓ આ ઘટનાની નિષ્પક્ષ અને સ્વતંત્ર તપાસ સુનિશ્ચિત કરવા માટે રાજીનામું આપી રહ્યા છે.
ચાહકો શનિવારે (13 ડિસેમ્બર, 2025) કોલકાતાના સોલ્ટ લેક સ્ટેડિયમમાં લિયોનેલ મેસ્સીના આગમનની આતુરતાથી રાહ જોઈ રહ્યા હતા. ઘણા ચાહકોએ મોંઘી ટિકિટ ખરીદી હતી પરંતુ જ્યારે મેસ્સી પહોંચ્યા ત્યારે તેઓ VIP લોકોના ટોળાથી ઘેરાયેલા હતા. મેસ્સીની આસપાસ રાજકારણીઓ, પોલીસ અધિકારીઓ અને VIP લોકોનો માનવ ઘેરો ગોઠવાઈ ગયો જેના કારણે દર્શકો તેમની એક ઝલક પણ જોઈ શક્યા નહીં. ગુસ્સે ભરાયેલા ચાહકોએ સ્ટેડિયમમાં તોડફોડ કરી.
જ્યારે પરિસ્થિતિ કાબુ બહાર થઈ ગઈ ત્યારે પોલીસે ભારે લાઠીચાર્જ કર્યો. રેપિડ એક્શન ફોર્સ (RAF) ના જવાનોને વ્યવસ્થા પુનઃસ્થાપિત કરવા માટે તૈનાત કરવામાં આવ્યા હતા. હંગામા બાદ મેસ્સી નિર્ધારિત સમય કરતા પહેલા સ્ટેડિયમ છોડીને ચાલ્યા ગયા. આ ઘટનાના સંદર્ભમાં ઇવેન્ટના મુખ્ય આયોજક શતાદ્રુ દત્તાની ધરપકડ કરવામાં આવી છે. ટિકિટના ઊંચા ભાવ અને ફૂટબોલ આઇકોન સુધી મર્યાદિત પહોંચને લઈને સ્થળ પર થયેલા વિરોધ પ્રદર્શનો અને તોડફોડ બાદ આ ધરપકડ કરવામાં આવી હતી.
કેસની તપાસ માટે SIT ની રચના
સોલ્ટ લેક સ્ટેડિયમમાં તોડફોડની તપાસ માટે ચાર સભ્યોની સ્પેશિયલ ઇન્વેસ્ટિગેશન ટીમ (SIT) ની રચના કરવામાં આવી છે. પશ્ચિમ બંગાળના મુખ્ય સચિવ મનોજ પંતે વરિષ્ઠ IPS અધિકારીઓનો સમાવેશ કરતી ચાર સભ્યોની SIT ની રચના કરી હતી. મુખ્ય સચિવે જણાવ્યું હતું કે DCP બિધાનનગર અનિશ સરકારને ફરજમાં બેદરકારી બદલ સસ્પેન્ડ કરવામાં આવ્યા છે અને વિભાગીય કાર્યવાહી શરૂ કરવામાં આવી છે.
મુખ્ય સચિવે જણાવ્યું હતું કે DCP બિધાનનગર અનિશ સરકારને ફરજમાં બેદરકારી બદલ સસ્પેન્ડ કરવામાં આવ્યા છે અને વિભાગીય કાર્યવાહી શરૂ કરવામાં આવી છે. તેમણે કહ્યું કે બંગાળના રમતગમત સચિવ રાજેશ કુમાર સિંહાને કારણદર્શક નોટિસ જારી કરવામાં આવી છે અને સોલ્ટ લેક સ્ટેડિયમના મુખ્ય કાર્યકારી અધિકારી ડીકે નંદનની સેવાઓ પાછી ખેંચી લેવામાં આવી છે.
