પેરિસ ઓલિમ્પિક 2024 26મી જુલાઈથી શરૂ થઈ રહ્યું છે અને 11મી ઓગસ્ટે સમાપ્ત થશે. આ વખતે ભારતમાંથી 117 એથ્લેટ ઓલિમ્પિકમાં ભાગ લઈ રહ્યા છે અને ભારતના મેડલની સંખ્યા બે આંકડા સુધી પહોંચવાની આશા છે. આ આશા વચ્ચે હવે પેરિસ ઓલિમ્પિક શરૂ થાય તે પહેલા જ BCCIએ ભારતીય ઓલિમ્પિક સંઘ (IOA)ને 8.5 કરોડ રૂપિયા આપવાની જાહેરાત કરી છે.
BCCI સેક્રેટરી જય શાહે સોશિયલ મીડિયા પ્લેટફોર્મ X પર લખ્યું કે મને એ જાહેરાત કરતા ગર્વ છે કે BCCI પેરિસ ઓલિમ્પિક 2024માં ભારતનું પ્રતિનિધિત્વ કરતા અમારા એથ્લેટ્સનું સમર્થન કરે છે. અમે અભિયાન માટે ભારતીય ઓલિમ્પિક સંઘને 8.5 કરોડ રૂપિયા આપી રહ્યા છીએ. અમે સમગ્ર ભારતીય ટુકડીને શુભેચ્છા પાઠવીએ છીએ. ભારતને ગૌરવ અપાવો. જય હિન્દ.
જણાવી દઈએ કે પેરિસ ઓલિમ્પિકમાં ભાગ લેવા માટે ભારતથી રવાના થઈ રહેલી 117 ખેલાડીઓની ટીમમાં 70 પુરૂષ અને 47 મહિલા ખેલાડીઓનો સમાવેશ થાય છે. આમાં એથ્લેટ્સની સૌથી મોટી ટુકડીમાં ઇવેન્ટ્સમાં ભાગ લેનારા 29 ખેલાડીઓનો સમાવેશ થાય છે જેનું નેતૃત્વ નીરજ ચોપરા કરશે, જેણે ટોક્યો ઓલિમ્પિકમાં ભાલા ફેંક સ્પર્ધામાં ગોલ્ડ મેડલ જીત્યો હતો. ઓલિમ્પિકના ઈતિહાસમાં આ બીજી સૌથી મોટી ભારતીય ટુકડી છે. 117 ખેલાડીઓ સાથે કુલ 140 સપોર્ટ સ્ટાફ મેમ્બર્સ પણ જઈ રહ્યા છે.
ઓલિમ્પિકના ઈતિહાસમાં ભારતે કુલ 10 ગોલ્ડ મેડલ જીત્યા છે
ઓલિમ્પિકના ઈતિહાસમાં ભારતે અત્યાર સુધીમાં કુલ 10 ગોલ્ડ મેડલ જીત્યા છે, જેમાંથી 8 ગોલ્ડ મેડલ હોકીમાંથી આવ્યા છે. જ્યારે અભિનવ બિન્દ્રા અને નીરજ ચોપરા એવા ભારતીય ખેલાડીઓ છે જેમણે વ્યક્તિગત ઈવેન્ટમાં ગોલ્ડ જીત્યો હતો. ગત ઓલિમ્પિકમાં ભારતે 7 મેડલ જીત્યા હતા, જે ઓલિમ્પિકમાં ભારતનું સર્વશ્રેષ્ઠ પ્રદર્શન હતું.
