ઢાકા: બાંગ્લાદેશમાં સ્થિતિ વણસી ગઈ છે અને વડાપ્રધાન શેખ હસીનાએ રાજીનામું આપી દીધું છે. હિંસા વચ્ચે પ્રદર્શનકારીઓ વડાપ્રધાનના આવાસમાં પણ ઘૂસી ગયા હતા અને ત્યાં તોડફોડ અને લૂંટફાટ કરી હતી. દેખાવકારોએ શેખ હસીનાના રૂમમાંથી તેમની સાડી પણ લૂંટી લીધી હતી. વિરોધને જોતા અને સુરક્ષાના કારણોસર હસીનાએ બાંગ્લાદેશ છોડી દીધું છે.
દેખાવકારોએ વડાપ્રધાનના રૂમને પણ છોડ્યો ન હતો અને ત્યાં પણ લૂંટફાટ કરી હતી. જેને જે વસ્તુ મળી તે ઉપાડીને ચાલ્યો ગયો. આ લૂંટ સાથે જોડાયેલા ઘણા વીડિયો પણ સામે આવ્યા છે, જેમાં જોઈ શકાય છે કે લોકો પીએમના આવાસમાં ઘૂસી ગયા છે અને તોડફોડની સાથે લૂંટ ચલાવી રહ્યા છે. લોકો લેમ્પ, શોપીસ, સાડી, ગાદલા-ઓશીકા જેવી વસ્તુઓ પણ ઉંચકીને લઈ જતા જોવા મળ્યા હતા.
બાંગ્લાદેશના આર્મી ચીફે પ્રેસ કોન્ફરન્સમાં આ વાત કહી
બાંગ્લાદેશના આર્મી ચીફે પ્રેસ કોન્ફરન્સમાં કહ્યું, ‘સેના સાથેની ચર્ચામાં મુખ્ય રાજકીય પક્ષોના પ્રતિનિધિઓ હાજર હતા. વિદ્યાર્થીઓને શાંત રહેવા અને ઘરે પાછા જવા વિનંતી કરવામાં આવી છે. દેશમાં કોઈ ઈમરજન્સીની જરૂર નથી, અમે આજ રાત સુધીમાં સંકટનો ઉકેલ શોધી લઈશું. પીએમ શેખ હસીનાએ રાજીનામું આપી દીધું છે. દેશનું સંચાલન વચગાળાની સરકાર કરશે.
પ્રદર્શનકારીઓ વડાપ્રધાનના આવાસમાં ઘૂસી ગયા હતા
બાંગ્લાદેશમાં દેશના જુદા જુદા ભાગોમાં દેખાવકારો અને હસીનાના સમર્થકો વચ્ચે અથડામણ થઈ છે. પ્રદર્શનકારીઓ વડાપ્રધાનના આવાસમાં ઘૂસી ગયા છે. આ અથડામણમાં 300 થી વધુ લોકોના મોત થયા છે. અથડામણ રવિવારે સવારે થઈ જ્યારે વિરોધીઓ ‘ભેદભાવ સામે વિદ્યાર્થીઓ’ના બેનર હેઠળ આયોજિત ‘અસહકાર કાર્યક્રમ’માં ભાગ લેવા પહોંચ્યા. અવામી લીગ, છાત્ર લીગ અને જુબો લીગના કાર્યકરોએ તેમનો વિરોધ કર્યો જેના પગલે બંને પક્ષો વચ્ચે ઘર્ષણ થયું. આ દરમિયાન રાજધાની ઢાકા સહિત દેશભરમાં સેના તૈનાત કરવામાં આવી છે. પોલીસને શેરીઓમાંથી હટાવી દેવામાં આવી છે.
